स्वसंरक्षणाबरोबर परंपरेचे जतन करण्याचा उपक्रम
शिवकालीन मर्दानी खेळ हे आपल्या संस्कृतीचे मूळ व स्वसंरक्षण मुलींसाठी काळाची गरज -पै. नाना डोंगरे
अहिल्यानगर (प्रतिनिधी)- अहमदनगर शोतोकान कराटे डो असोसिएशन आणि अहिल्यानगर जिल्हा सिलंबम असोसिएशन यांच्या संयुक्त विद्यमाने निमगाव वाघा (ता. नगर) येथे शालेय मुला-मुलींसाठी स्वसंरक्षण व शिवकालीन मर्दानी खेळांचे प्रशिक्षण शिबिराला प्रारंभ झाले आहे. या प्रशिक्षण वर्गात गावाच्या पंचक्रोशीतील मुला-मुलींनी उत्स्फूर्तपणे सहभाग घेतला.
या शिबिराचे उद्घाटन ग्रामपंचायत सरपंच उज्वलाताई कापसे यांच्या हस्ते झाले. कार्यक्रमाच्या अध्यक्षस्थानी सिलंबम असोसिएशनचे अध्यक्ष आणि ग्रामपंचायत सदस्य पै. नाना डोंगरे होते. यावेळी शोतोकान कराटे डो असोसिएशनचे अध्यक्ष व प्रशिक्षक सुरेश जाधव, राष्ट्रीय मर्दानी युध्दकला गुरुकुल नाशिकचे परिश्रुत क्षीरसागर, कराटे प्रशिक्षक सरफराज सय्यद, डॉ. प्रशांत जाधव, पिंटू जाधव, भारती पाचारणे, भानुदास कापसे, पै. संदीप डोंगरे आणि संदीप उद्धार आदी मान्यवर उपस्थित होते.
या शिबिरास जिल्हा परिषद प्राथमिक शाळा, निमगाव वाघा येथे प्रारंभ झाला असून, विद्यार्थ्यांना कराटे, लाठी-काठी, तलवारबाजी, भाला, दांडपट्टा यांसारख्या शिवकालीन मर्दानी युद्धकला तसेच स्वसंरक्षणाच्या आधुनिक तंत्रांची शिकवण दिली जात आहे. या प्रसंगी पै. नाना डोंगरे यांना कविवर्य नारायण सुर्वे जन्मशताब्दी निमित्त मराठी साहित्य मंडळ (ठाणे) यांच्या वतीने राज्यस्तरीय समाजभूषण पुरस्कार मिळाल्याबद्दल त्यांचा यावेळी सन्मान करण्यात आला.
पै. नाना डोंगरे म्हणाले की, शिवकालीन मर्दानी खेळ हे आपल्या संस्कृतीचे मूळ आहेत. या युद्धकला फक्त युद्धासाठी नव्हे तर शिस्त, आत्मविश्वास आणि शौर्य जागविण्यासाठी उपयुक्त आहेत. आजच्या युगात स्वसंरक्षण हा प्रत्येक विद्यार्थी आणि विशेषतः मुलींसाठी आवश्यक विषय झाला आहे. अशा प्रशिक्षण शिबिरांमुळे विद्यार्थी शारीरिकदृष्ट्या सबळ होतात आणि मानसिकदृष्ट्या सक्षम बनत असल्याचे त्यांनी सांगितले.
सरपंच उज्वलाताई कापसे म्हणाल्या की, आपल्या मुला-मुलींनी आधुनिक शिक्षणासोबतच स्वसंरक्षणाच्या कलाही आत्मसात केल्या पाहिजेत. कराटे आणि मर्दानी खेळ यांचा संगम म्हणजे आत्मविश्वास आणि साहसाचे प्रतीक आहे. या शिबिरातून विद्यार्थ्यांमध्ये अनुशासन, आदरभाव, देशप्रेम आणि परिश्रमाची सवय रुजेल. ग्रामपंचायतीच्या वतीने अशा उपक्रमांना नेहमीच पाठबळ दिले जाणार असल्याचे स्पष्ट केले. सुरेश जाधव यांनी हा उपक्रम केवळ स्वसंरक्षणापुरता मर्यादित नसून, “संस्कार, साहस आणि स्वाभिमान” यांचा वारसा पुढील पिढीकडे पोहोचविणारा ठरत असल्याचे सांगितले.
या प्रशिक्षण शिबिरात शेकडो विद्यार्थी सहभागी झाले असून, त्यांना प्रशिक्षकांच्या मार्गदर्शनाखाली प्रत्यक्ष सराव करत आहे. विद्यार्थ्यांनी शिवरायांच्या पराक्रमी परंपरेचे, दर्शन घडवित लाठी-काठी, तलवारबाजी आणि दांडपट्टा सादरीकरणातून सर्वांचे लक्ष वेधले.