विविध जिल्ह्यातून शेतकरी, शेतमजूर व कार्यकर्ते सहभागी
अहमदनगर (प्रतिनिधी)- अहमदनगर (प्रतिनिधी)- महाराष्ट्रातील शेतकर्यांच्या प्रश्‍नावर महाराष्ट्र राज्य किसान व लाल बावटा शेतमजूर संघटनेच्या वतीने नागपूरच्या हिवाळी अधिवेशनावर धडकणार्या मोर्चाला प्रारंभ झाले आहे. विविध जिल्ह्यातून शेतकरी संघटना व कार्यकर्ते या मोर्चात सहभागी होत असून, 26 डिसेंबरला हा मोर्चा हिवाळी अधिवेशनावर धडकणार असल्याची माहिती भारतीय कम्युनिस्ट पक्षाचे राज्य सेक्रेटरी कॉ. अ‍ॅवड. सुभाष लांडे यांनी दिली.
यवतमाळ येथून या मोर्चाची सुरुवात झाली आहे. अतिवृष्टीमुळे व पुरामुळे बाधित झालेल्या शेतकर्यांना एकरी 50 हजार रुपये नुकसानभरपाई मिळाली पाहिजे, अनेक वर्षांपासून कसत असलेल्या जमिनीचे पट्टे शेतकरी शेतमजूरांच्या नावावर करा, शेतकरी शेतमजूरांना पेन्शन सुरू करा, गायरान जमीन धारकांना ते कसत असलेल्या जमिनीवरुन हुसकावून लावण्याचे कटकारस्थान बंद करा, वाघ, बिबटे यांच्या हल्ल्यात मृत्युमुखी पडलेल्या शेतकर्यांच्या वारसांना नुकसान भरपाई द्यावी, वाघ, बिबटे, डुक्कर आदी प्राण्यांमुळे शेती करणे अवघड झाले असून, या प्राण्यांचा बंदोबस्त करण्यासाठी उपाययोजना करा, नुकसान भरपाईच्या केवळ घोषणा नको अंमलबजावणी करा, शेतकरयांना दिवसा पूर्ण दाबाने अखंडित वीज पुरवठा करा आदी मागण्यांसाठी हा मोर्चा काढण्यात आलेला आहे.
26 डिसेंबरला भव्य स्वरुपात हा मोर्चा नागपूरच्या हिवाळी अधिवेशनावर धडकणार आहे. यामध्ये कॉ. लांडे, राष्ट्रीय कौन्सिल सदस्य व किसान नेते कॉ. तुकाराम भस्मे, किसान सभेचे राज्य अध्यक्ष कॉ हिरालाल परदेशी, सरचिटणीस कॉ. राजन क्षीरसागर, उपाध्यक्ष कॉ ड बन्सी सातपुते किसान सभेचे राज्य कार्यकारिणी सदस्य कॉ. अरुण वणकर, कॉ. अनिल घाटे, कॉ. अनिल हेपट, कॉ. सुनील गेटाम, लाल बावटा शेतमजूर संघटनेचे बंडू गोल्लर, एआयएसएफ चे राज्य अध्यक्ष कॉ विराज देवांग, महीला फेडरेशनच्या सुरेखा हेपट, कॉ. दिलीप महाजन सहभागी झाले आहेत.
