मिनी ट्रॅक्टर वाटपातील कथित गैरव्यवहाराची उच्चस्तरीय चौकशी करा; शोषित शिक्षक-कर्मचारी संघटनेचा आंदोलनाचा इशारा
आंबेडकर पुतळ्याला कायमस्वरूपी सुरक्षा कवच द्या! विविध मागण्यांसाठी मार्केट यार्ड चौकात बेमुदत ठिय्या
अहिल्यानगर (प्रतिनिधी)- अहिल्यानगर शहरातील मार्केट यार्ड चौकात असलेल्या भारतरत्न डॉ. बाबासाहेब आंबेडकर यांच्या पूर्णाकृती पुतळ्याला ऊन, पाऊस, प्रदूषण, धूळ आणि संभाव्य नुकसानीपासून संरक्षण मिळावे, यासह विविध प्रलंबित प्रश्‍नांवर तातडीने कार्यवाही करण्याच्या मागणीसाठी शोषित शिक्षक-कर्मचारी आश्रमशाळा संघटनेच्या वतीने बुधवार, दि. 21 ऑक्टोबर रोजी सकाळी 11 वाजता बेमुदत ठिय्या आंदोलन करण्यात येणार आहे. मार्केट यार्ड चौकातील डॉ. बाबासाहेब आंबेडकर यांच्या पुतळ्यासमोर हे आंदोलन होणार असल्याची माहिती संघटनेचे जिल्हाध्यक्ष तथा आंदोलनाचे संयोजक योगेश कुलथे व महिला जिल्हाध्यक्ष सौ. अलका झरेकर यांनी दिली.
महाराष्ट्र राज्य शोषित शिक्षक-कर्मचारी आश्रमशाळा संघटनेचे संस्थापक अध्यक्ष भाऊसाहेब कांबळे यांच्या प्रमुख मार्गदर्शनाखाली हे आंदोलन होणार आहे. संघटनेचे प्रदेश कार्याध्यक्ष रघुनाथ आंबेडकर यांच्यासह जिल्हा आणि राज्यस्तरीय पदाधिकारी आंदोलनात सहभागी होणार आहेत. या आंदोलनाच्या माध्यमातून पुतळ्याचे कायमस्वरूपी संरक्षण, राज्यातील अधिकृत उपोषणस्थळी महापुरुषांचे छायाचित्र लावण्याबाबत शासन निर्णय निर्गमित करणे, आश्रमशाळेतील कथित गैरव्यवहार प्रकरणातील फरार आरोपींना अटक करणे, मिनी ट्रॅक्टर वाटपातील कथित आर्थिक गैरव्यवहाराची उच्चस्तरीय चौकशी करून दोषींवर फौजदारी कारवाई करणे, तसेच राष्ट्रीय महामार्ग प्राधिकरणाकडे प्रलंबित असलेल्या मागणीवर कार्यवाही करणे, अशा विविध मागण्यांचा समावेश आहे.
अहिल्यानगर शहरातील मार्केट यार्ड परिसरात भारतरत्न डॉ. बाबासाहेब आंबेडकर यांचा पूर्णाकृती पुतळा आहे. या पुतळ्याचे ऊन, पाऊस, प्रदूषण आणि धुळीपासून संरक्षण होण्यासाठी कायमस्वरूपी छत्री, शेड अथवा पारदर्शक काचांचे सुरक्षा कवच उभारण्यात यावे, अशी मागणी संघटनेने केली आहे. पुतळ्याचे दीर्घकाळ संरक्षण व्हावे आणि संभाव्य धोके तसेच नैसर्गिक कारणांमुळे होणारे नुकसान टाळता यावे, यासाठी संबंधित प्रशासनाने तातडीने उपाययोजना कराव्यात, अशी भूमिका संघटनेने मांडली आहे.
महाराष्ट्र राज्यातील सर्व अधिकृत उपोषण आणि आंदोलनस्थळी छत्रपती शिवाजी महाराज, राजर्षी शाहू महाराज, महात्मा ज्योतिबा फुले आणि भारतरत्न डॉ. बाबासाहेब आंबेडकर या महापुरुषांची छायाचित्रे लावणे बंधनकारक करावे, अशी मागणीही आंदोलनाच्या माध्यमातून करण्यात येणार आहे. यासाठी शासनाने तातडीने शासन निर्णय (जीआर) निर्गमित करावा. पालकमंत्री राधाकृष्ण विखे पाटील आणि पारनेरचे आमदार काशिनाथ दाते यांनी या मागणीसाठी राज्य सरकारकडे आग्रह धरावा, असे आवाहन संघटनेने केले आहे.
अहिल्यानगर समाजकल्याण विभागांतर्गत असलेल्या सद्गुरू रोहिदासजी बहुउद्देशीय ग्रामीण विकास प्रतिष्ठानच्या केंद्रीय आश्रमशाळेतील कथित गैरव्यवहार प्रकरणात शासकीय गुन्हा दाखल करण्यात आल्याचे संघटनेने निवेदनात म्हटले आहे. या प्रकरणाच्या अनुषंगाने तोफखाना पोलीस ठाण्याच्या पोलीस निरीक्षकांनी 13 जुलै 2026 रोजी संघटनेला लेखी पत्र दिले होते. मात्र, या प्रकरणातील उर्वरित फरार आरोपींना अद्याप अटक करण्यात आलेली नसल्याचा दावा संघटनेने केला आहे. संबंधित आरोपींना तातडीने अटक करून प्रकरणाचा तपास पुढे न्यावा, अशी मागणी आंदोलनाद्वारे करण्यात येणार आहे.
समाजकल्याण विभागांतर्गत सन 2017 ते 2020 या आर्थिक वर्षांत मागासवर्गीय लाभार्थ्यांना करण्यात आलेल्या 162 मिनी ट्रॅक्टरच्या वाटपात कोट्यवधी रुपयांचा कथित आर्थिक गैरव्यवहार झाल्याचा आरोप संघटनेने केला आहे. या प्रकरणात सरकारी निधीचा अपहार झाल्याचा दावा करत संबंधित दोषी अधिकारी आणि अन्य जबाबदार व्यक्तींची उच्चस्तरीय चौकशी करण्याची मागणी करण्यात आली आहे.
या प्रकरणी मुंबई येथील लोकायुक्तांनी 21 नोव्हेंबर 2025 रोजी अहिल्यानगरच्या जिल्हाधिकाऱ्यांना दोषींवर कारवाई करण्याबाबत पत्र दिल्याचे संघटनेने म्हटले आहे. मात्र, त्यानंतर जिल्हाधिकारी कार्यालयाकडून पुन्हा समाजकल्याण विभागाकडेच कारवाईसंदर्भात पत्रव्यवहार करण्यात आल्याचा आक्षेप संघटनेने घेतला आहे. तसेच, लोकायुक्त आणि जिल्हाधिकारी यांच्या पत्रांवर समाजकल्याण विभागाकडून अपेक्षित कार्यवाही झाली नसल्याचा आरोपही करण्यात आला आहे.
एका मिनी ट्रॅक्टरची सरकारी किंमत सुमारे साडेतीन लाख रुपये असल्याचे नमूद करत, 162 मिनी ट्रॅक्टरच्या वाटपातील आर्थिक व्यवहारांची सखोल तपासणी करावी, संबंधित नोंदींची पडताळणी करावी आणि गैरव्यवहार सिद्ध झाल्यास दोषींविरुद्ध फौजदारी गुन्हे दाखल करावेत, अशी मागणी संघटनेने केली आहे.
अहिल्यानगर येथील राष्ट्रीय महामार्ग प्राधिकरणाच्या प्रकल्प संचालकांना 25 मार्च 2025 रोजी लेखी निवेदन देण्यात आले होते. मात्र, या निवेदनावर अपेक्षित कार्यवाही झाली नसल्याचा आरोप संघटनेने केला आहे. संबंधित अधिकाऱ्यांच्या कार्यपद्धतीची प्रशासकीय चौकशी करून दिलेल्या निवेदनातील मागण्यांचा विचार करावा, अशी मागणीही आंदोलनाच्या माध्यमातून करण्यात येणार आहे. याशिवाय इतर प्रलंबित विषयांवरही संबंधित विभागांनी तातडीने निर्णय घ्यावेत, अशी भूमिका संघटनेने घेतली आहे.
आंदोलनाच्या संयोजनाची जबाबदारी जिल्हाध्यक्ष योगेश कुलथे आणि महिला जिल्हाध्यक्ष सौ. अलका झरेकर यांच्याकडे आहे. तसेच बाबासाहेब महापुरे, अंबादास शिंदे, अनिल ठोंबरे, संतोष कांबळे, काशिनाथ पाचंगे, बबनराव झरेकर, बाबासाहेब डोळस यांच्यासह संघटनेचे जिल्हा व राज्यस्तरीय पदाधिकारी या आंदोलनात सहभागी होणार असल्याचे सांगण्यात आले.