महाविकास आघाडी व भारतीय कम्युनिस्ट पक्षासह सर्व डाव्या पुरोगामी पक्षांचा सहभाग
राज्यातील सर्व पदाधिकारी, कार्यकर्त्यांना सहभागी होण्याचे आवाहन
अहमदनगर (प्रतिनिधी)- महापुरूषांचा अवमान करणारे राज्यपाल भगतसिंह कोश्यारी यांना राज्यपाल पदावरून हटविण्याच्या मागणीसाठी महाविकास आघाडी व भारतीय कम्युनिस्ट पक्षासह सर्व डाव्या पुरोगामी पक्षाच्या वतीने शनिवारी (दि.17 डिसेंबर) मुंबई येथे महामोर्चा काढण्यात येणार आहे. कोश्यारी हटाव, महाराष्ट्र बचाव या घोषणेने मोर्चाची सुरुवात होणार असून, या मोर्चात राज्यातील सर्व भाकपचे पदाधिकारी, कार्यकर्ते डावे पुरोगामी पक्ष व संघटनांना सहभागी होण्याचे आवाहन भाकपचे राज्य सचिव अ‍ॅड.कॉ. सुभाष लांडे यांनी केले आहे.
शिवाजी महाराज, महात्मा फुले, सावित्रीबाई फुले यांचा अवमान राज्यपाल कोश्यारी यांनी जाणीवपूर्वक अवमान केला आहे. महाराष्ट्रद्रोही कृत्य केले जात असताना सत्ताधारी शिदे-फडणवीस सरकार गप्प आहे. कर्नाटक मधील निवडणुकजिंकण्यासाठी तेथील भाजप सरकार महाराष्ट्रातील गावावर आपले हक्क सांगत आहे. महाराष्ट्र सरकार कर्नाटक बँकेतून आपल्या राज्यातील सरकारी नोकरांचे पगार करण्याचा निर्णय घेते आहे. सध्याचे मिंधे सरकार केंद्रातील सरकारबरोबर मुंबईला महाराष्ट्रापासून तोडून केंद्रशासीत करण्याचे षडयंत्र रचत आहे. भाजप, आरएसएसचे नेते महापुरुषाचे अवमान करणारे विधान करून बदनामी करीत असल्याचा आरोप कॉ. सुभाष लांडे यांनी केला आहे.
महाराष्ट्रातील रोजगार निर्मिती करणारे उद्योग राज्याबाहेर गुजरात आणि इतरत्र नेले जात आहेत. कामगार, शेतकरी, बेरोजगार तरुण त्यांच्या हक्काच्या मागण्यांसाठी आंदोलन करीत आहेत, पण शिंदे फडणवीस सरकार त्याकडे दुर्लक्ष करीत आहे. याउलट समाजात तेढ निर्माण होईल असे मुद्दे समोर आणले जात आहेत. जातीयवादी प्रवृत्तींना सरकार पाठीशी घालत आहेत. मुख्य प्रश्‍न बाजूला ठेवून चुकीचे मुद्दे मुद्दामहून समोर आणले जात असल्याचे कॉ. लांडे यांनी म्हंटले आहे.
मुंबई येथे शनिवारी सकाळी 10 वाजता भायखला, राणीबाग मैदान येथे होणार्‍या मोर्चात भारतीय कम्युनिस्ट पक्ष व जनसंघटना सर्व ताकदीनिशी सहभागी होणार असल्याचे भारतीय कम्युनिस्ट पक्षाचे राष्ट्रीय सचिव कॉ. डॉ भालचंद्र कांगो, सहसेक्रेटरी कॉ.प्रा. राम बाहेती, कॉ राजू देसले यांनी स्पष्ट केले आहे. या मोर्चाच्या तयारीसाठी मुंबई येथे झालेल्या बैठकीला भारतीय कम्युनिस्ट पक्षाच्या वतीने सचिव मंडळ सदस्य कॉ. प्रकाश रेड्डी, पक्षाचे मुंबई कौन्सिल सेक्रेटरी कॉ. मिलिंद रानडे उपस्थित होते.
