19 वर्षाखालील राज्यस्तरीय मॉडर्न पेंटाथलॉन स्पर्धेचे उद्घाटन
3200 मीटर धावून व 200 मीटर जलतरण करुन स्पर्धकांचे उत्कृष्ट प्रदर्शन
अहिल्यानगर (प्रतिनिधी)- स्पर्धा इतरांशी नव्हे, तर स्वतःशी करावी. खेळात सातत्य ठेवणे हेच यशाचे गमक आहे. देशाची ओळख आणि प्रतिष्ठा खेळाडूंनी जिंकलेल्या पदकांवरून ठरते. म्हणून प्रत्येक खेळाडूने देशाचा मान उंचावण्यासाठी मनापासून प्रयत्न करावा, असे प्रतिपादन वन विभागाचे उपवनसंरक्षक धर्मवीर सालविठ्ठल यांनी केले.
अहिल्यानगर येथील वाडियापार्क जिल्हा क्रीडा संकुलात शुक्रवारी (दि. 7 नोव्हेंबर) 19 वर्षाखालील राज्यस्तरीय शालेय मॉडर्न पेंटाथलॉन क्रीडा स्पर्धेचे उद्घाटन धर्मवीर सालविठ्ठल यांच्या हस्ते झाले. यावेळी बोलताना त्यांनी खेळाडूंना सातत्य, शिस्त आणि आत्मविश्‍वासाचे महत्त्व अधोरेखित केले.
ही स्पर्धा क्रीडा व युवक सेवा संचालनालय, जिल्हा क्रीडा अधिकारी कार्यालय, जिल्हा क्रीडा परिषद अहिल्यानगर, मॉडर्न पेंटाथलॉन असोसिएशन ऑफ महाराष्ट्र राज्य संघटना आणि मॉडर्न पेंटाथलॉन असोसिएशन ऑफ अहिल्यानगर यांच्या संयुक्त विद्यमाने आयोजित करण्यात आली. या स्पर्धेच्या उद्घाटन प्रसंगी पत्रकार संजय पाठक, प्रशिक्षक शंकर मादगुंडी, जिल्हा क्रीडा अधिकारी ज्ञानेश्‍वर खुरंगे, महाराष्ट्र मॉडर्न पेंटाथलॉनचे अध्यक्ष सुनील पूर्णपात्रे, सत्यवान जाधव, प्रवीण मोरे, हर्षद इनामदार, क्रीडा अधिकारी प्रवीण कोंढावळे, विशाल गर्जे, संतोष वाबळे, प्रियंका खिंडरे, राज्य क्रीडा मार्गदर्शक बालाजी केंद्रे, विवेक सूर्यवंशी, सारिका गांधी, अविनाश काळे आदी मान्यवर उपस्थित होते.
प्रास्ताविकात बोलताना ज्ञानेश्‍वर खुरंगे म्हणाले की, महाराष्ट्रातील सर्वाधिक राज्यस्तरीय स्पर्धा घेण्याचा बहुमान अहिल्यानगर जिल्ह्याला लाभला आहे. आतापर्यंत 14 राज्यस्तरीय स्पर्धा घेण्यात आल्या आणि एक राष्ट्रीय कबड्डी स्पर्धा होणार आहे. खेळाडूंनी या संधीचा योग्य उपयोग करून जिल्ह्याचे आणि राज्याचे नाव उज्ज्वल करण्याचे त्यांनी सांगितले. सुनील पूर्णपात्रे यांनी स्वतःला ओळखून चांगले प्रदर्शन करण्याचे खेळाडूंना आवाहन केले. तर खेळाडूंची उत्तमपणे सोय केल्याबद्दल आभार व्यक्त केले. या स्पर्धेला राज्यभरातून विविध जिल्ह्यांतील 270 खेळाडूंचा उत्स्फूर्त प्रतिसाद लाभला.
मुला-मुलींच्या 19 वर्षाखालील गटातील या पेंटाथलॉन स्पर्धेत खेळाडूंना 1600 मीटर धावणे, 200 मीटर जलतरण, आणि पुन्हा 1600 मीटर धावणे असे तीन टप्पे पूर्ण करावे लागले. या तिन्ही टप्प्यांमध्ये शारीरिक व मानसिक क्षमतेचा जबरदस्त कस लावून खेळाडूंनी उत्कृष्ट प्रदर्शन केले.
खेळाडूंनी या आव्हानात्मक स्पर्धेत चिकाटी, जिद्द आणि कौशल्याचे उत्तम प्रदर्शन करत प्रेक्षकांची दाद मिळवली. स्पर्धेतील मुला-मुलींच्या गटातील पहिले चार खेळाडू राष्ट्रीय पातळीवरील स्पर्धेसाठी पात्र ठरणार आहेत. या स्पर्धेच्या यशस्वी आयोजनासाठी कैलास नगरेकर, गोपाळ मोघे, साहिल सूर्यवंशी, आफताब सय्यद, विजय फुलमाली, प्रसाद पाटोळे यांनी परिश्रम घेतले. कार्यक्रमाचे सूत्रसंचालन संतोष वाबळे यांनी केले. विशाल गर्जे यांनी आभार मानले.