आम आदमी पार्टी, जय युवा अकॅडमी व उमेद सोशल फाउंडेशनचा संयुक्त उपक्रम
साथीचे आजार टाळण्यासाठी सार्वजनिक स्वच्छता आवश्‍यक -ॲड. महेश शिंदे
अहमदनगर (प्रतिनिधी)- आपल्या परिसराची स्वच्छता ठेवण्याची जबाबदारी प्रत्येकाची आहे. साथीचे आजार टाळण्यासाठी सार्वजनिक स्वच्छता आवश्‍यक बनली आहे. जिल्हा रुग्णालयात उपचारासाठी रुग्णांना घेऊन त्यांचे नातेवाईक येतात. येणाऱ्यांना पुन्हा आजार उद्भवू नये, म्हणून रुग्णालय परिसरात स्वच्छता मोहिम राबविण्यात आल्याचे जय असोसिएशन ऑफ एनजीओचे (महाराष्ट्र राज्य) अध्यक्ष ॲड. महेश शिंदे यांनी सांगितले.
आम आदमी पार्टी, जय युवा अकॅडमी व उमेद सोशल फाउंडेशन प्रतिष्ठानच्या वतीने स्वच्छता हीच सेवा उपक्रमातंर्गत अहमदनगर जिल्हा रुग्णालयाच्या परिसरात स्वच्छता अभियान राबविण्यात आले. या मोहिमेत आम आदमी पार्टीचे शहराध्यक्ष भरत खाकाळ, जिल्हा सचिव प्रा. अशोक डोंगरे, ज्येष्ठ सदस्य रवी सातपुते, दिलीप घुले, मेजर रावसाहेब काळे, मेजर शिवाजी वेताळ, गणेश मारवाडे, तुकाराम भिंगारदिवे, सुनील गडाख, परेश पटेल, विक्रम क्षीरसागर, अनिल साळवे, सचिन साळवी, पोपट बनकर, ॲड. विद्या शिंदे, राजेंद्र कर्डिले आदी सहभागी झाले होते.
पुढे शिंदे म्हणाले की, सध्या थंडी, ताप, डेंगू आदी साथीच्या आजारांची साथ सुरू आहे. डासांचा प्रादुर्भाव कमी करण्यासाठी स्वच्छतेला महत्त्व दिले गेले पाहिजे. प्रत्येकाने स्वच्छता पाळून ही मोहिमे व्यापकपणे राबविण्याचे त्यांनी आवाहन केले.
प्रा. अशोक डोंगरे म्हणाले की, स्वच्छता हा आपल्या जीवनाचा अविभाज्य घटक आहे. निरोगी आरोग्य हीच खरी संपत्ती असून, शहरातील प्रत्येक भागात शासकीय कार्यालय व पोलीस स्टेशन परिसरात आप व स्वयंसेवी संघटनेच्या माध्यमातून कृतिशीलपणे स्वच्छता मोहीम राबविण्यात येणार असल्याचे त्यांनी सांगितले.
भरत खाकाळ यांनी आम आदमी पार्टीच्या स्वच्छते मोहिमेत मोठ्या संख्येने युवावर्ग, महिला व नागरिक स्वतःहून सहभागी होत आहे. समाजकारणाला प्राधान्य देऊन सुरु असलेल्या कार्याने प्रभावित होऊन आम आदमी पार्टीला सर्वसामान्य नागरिक जोडले जात असल्याचे सांगितले.
या स्वच्छता मोहिमेत जिल्हा रुग्णालय परिसरातील कचरा, प्लास्टिक पिशव्या, बॉटलची सफाई करुन, काटेरी गवत, झाडे-झुडपे हटविण्यात आली. या मोहिमेचे नियोजन मेजर रावसाहेब काळे यांनी केले होते. मोहिमेसाठी जिल्हा रुग्णालय प्रशासनाचे सहकार्य मिळाले. अनिल साळवे यांनी आभार मानले.