मेळाव्याला महाराष्ट्रासह इतर राज्यातून युवक-युवतींसह पालकांची उपस्थिती
जनावरांप्रमाणे जीवन पध्दती म्हणजे लिव्ह इन रिलेशन -संजय कळमकर
अहमदनगर (प्रतिनिधी)- जनावरांप्रमाणे जीवन पध्दती म्हणजे लिव्ह इन रिलेशन होय. मोबाईलमध्ये गुंतलेल्या अभासी जीवनामुळे या जीवन पध्दतीला युवा वर्ग आहारी जात आहे. एकमेकांचा कंटाळा आल्यावर सोडून देण्याचे प्रकार घडत आहे. अभासी जीवनाने स्वत:चे भविष्य उध्वस्त न करता, लग्नाचे पावित्र्य नाते जपण्याचे आवाहन साहित्यिक संजय कळमकर यांनी केले.
चर्मकार विकास संघ व लोकनेते माजी आमदार सिताराम घनदाट (मामा) सामाजिक प्रतिष्ठानच्या वतीने टिळक रोड येथील लक्ष्मीनारायण मंगल कार्यालयात आयोजित करण्यात आलेल्या चर्मकार समाजाच्या निशुल्क राज्यस्तरीय वधु-वर व पालक परिचय मेळाव्याच्या उद्घाटनाप्रसंगी कळमकर बोलत होते. यावेळी चर्मकार विकास संघाचे प्रदेशाध्यक्ष संजय खामकर, अभिनेते काळूराम ढाबळे, प्रा.डॉ. अमन बगाडे, नगरसेवक डॉ. सागर बोरुडे, राज्य वधु वर अध्यक्ष रामदास सोनवणे, खजिनदार अरुण गाडेकर, ज्येष्ठ सामाजिक नेते राजाराम केदार, मुंबई प्रभारी आदिनाथ बाचकर, सामाजिक कार्यकर्ते नितीन बारस्कर, उद्योजक रामदास उदमले, सर्जेराव गायकवाड, राजेंद्र धस, मच्छिंद्र दळवी, रत्नमाला उदमले, रुक्मणी ननवरे,प्रतिभा खामकर, अण्णासाहेब खैरे, अशोक खैरे आदी उपस्थित होते.
पुढे बोलताना कळमकर म्हणाले की, पहिले संस्कार घरातून मिळायचे. मात्र घरातील मंडळीच मोबाईलच्या अभासी जीवनात गुंतत चालल्याने नवीन पिढीत संस्कार लोक पावत आहे. लग्न जुळविणे हे पूर्वी पुण्याचे कार्य समजले जायचे. मात्र याचे धंद्यात रुपांतर झाले आहे. तर मोठ्या प्रमाणात एजंटाची टोळी निर्माण झाली आहे. मुला-मुलींसाठी योग्य स्थळ निवडण्यासाठी समाजाने पुढाकार घेऊन अशा पध्दतीने वधू-वर मेळावे घेणे काळाची गरज बनली असल्याचे त्यांनी सांगितले. चर्मकार विकास संघाने समाजाची गरज ओळखून उचललेले पाऊन प्रेरणादायी असल्याचे त्यांनी स्पष्ट केले. तर आपल्या विनोदी शैलीतून पूर्वी व सध्या लग्न जुळवण्याच्या पद्धतीवर बोलताना सभागृहात हशा पिकली होती.
प्रारंभी संत रविदास महाराज यांच्या प्रतिमेचे पूजन करुन दीपप्रज्वलनाने कार्यक्रमाची सुरुवात झाली. या वधू-वर मेळाव्यासाठी अविवाहित, घटस्फोटीत, विधुर, विधवा व अपंग वधू-वरांसह पालक वर्ग मोठ्या संख्येने उपस्थित होते. प्रा. डॉ. अमन बगाडे यांनी विवाहप्रथा व्यवस्थे विषयी मार्गदर्शन केले. देशाचे दिवंगत राष्ट्रपती डॉ.एपीजे अब्दुल कलाम यांच्या जयंती वाचन प्रेरणा दिनानिमित्त या कार्यक्रमात पुस्तकांचे प्रदर्शन भरविण्यात आले होते.
संजय खामकर म्हणाले की, चर्मकार विकास संघाच्या माध्यमातून राज्यात समाजाला जोडण्याचे काम करण्यात आले. समाजातील युवक-युवतींसाठी घेतल्या जाणाऱ्या वधू-वर मेळाव्यासाठी महाराष्ट्र बाहेरुन देखील इतर राज्यातील समाजबांधव सहभागी होत आहे. या उपक्रमाला समाजाचा उत्तमपणे प्रतिसाद मिळत आहे. लग्न जुळण्यास समाजासाठी एक चांगले व्यासपीठ निर्माण झाले आहे. अहमदनगर जिल्ह्यातच नव्हे तर राज्यातील अनेक जिल्ह्यात अशा पद्धतीने संघटनेच्या माध्यमातून मेळावे घेतले जात आहे. समाजातील प्रत्येकाने सामाजिक बांधिलकी व कर्तव्याची जाणीव ठेवून योगदान द्यावे. संघटनात्मक कार्यातून विकासाच्या दिशेने वाटचाल सुरू असल्याचे त्यांनी सांगितले. तर आई-वडील आपले स्वप्न बाजूला ठेवून मुलांचे स्वप्न पूर्ण करतात. युवकांनी देखील या गोष्टीची जाणीव ठेवून त्यांचे स्वप्न व आपले चांगले भविष्य पूर्ण करावे. वधू-वर मेळाव्यातून अनेकांनी व्यवसाय थाटले असून, सामाजिक बांधिलकीतून होणाऱ्या निशुल्क मेळाव्याचा लाभ घेण्याचे त्यांनी आवाहन केले.
दिवसभर चाललेल्या या वधू-वर मेळाव्यात मोठ्या संख्येने चर्मकार समाज एकवटला होता. मेळावा यशस्वी करण्यासाठी वधू-वर पालक परिचय समितीचे पदाधिकारी,सदस्य अध्यक्ष रामदास सातपुते, अरविंद कांबळे, भारत चिंधे, खजिनदार विक्रम गुजर, अनिलकुमार शिंदे, भाऊसाहेब आंबेडकर, दिलीप उदमले, बाबासाहेब आंबेडकर, अशोक लाड, कैलास कांबळे, बाबासाहेब तेलोरे, पाराजी साळे, पांडुरंग पाखरे, बलराज गायकवाड, रामदास निर्वाण, दादासाहेब भोसले, मारुती खैरे, सुनंदा सांगळे, संतोष कानडे, मनीष कांबळे, संतोष कांबळे, दिलीप कांबळे, विठ्ठल देवरे, ज्ञानेश्‍वर रामगुडे, अर्जुन कांबळे, संतोष लोहकरे, सुदर्शन धस, रुपेश लोखंडे, गोरख वाघमारे, विकी कबाडे, अर्जुन वाघ, चांगदेव देवराय, दिलीप वाकचौरे यांनी परिश्रम घेतले. वधू-वरांच्या बायोडाटाचे वाचन अमोल डोळस व संदीप डोळस यांनी केले. कार्यक्रमाचे सूत्रसंचालन संतोष कानडे यांनी केले. आभार सुभाष सोनवणे यांनी मानले.