महिलांना वृक्षरोपणासाठी रोपांचे वाटप करुन प्राणवायूचा सोहळा साजरा

मराठा समन्वय परिषद, हिरकणी ग्रुप व ट्रेकयात्री फाउंडेशनचा उपक्रम

निसर्गाचा समतोल समाजाला विकासाच्या दिशेने घेऊन जाणारा -अनिता काळे

अहमदनगर (प्रतिनिधी)- मराठा समन्वय परिषद, हिरकणी ग्रुप व ट्रेकयात्री (गिर्यारोहण संस्था) फाउंडेशनच्या वतीने महिलांना वृक्षरोपणासाठी रोपांचे वाटप करुन प्राणवायूचा सोहळा साजरा करण्यात आला. घराचे अंगण हिरवाईने फुलवून पर्यावरण संवर्धन चळवळीत योगदान देण्याचा संकल्प महिलांनी केला.

मराठा समन्वय परिषदेच्या राज्य कार्याध्यक्षा अनिताताई काळे यांच्या हस्ते महिलांना रोपांचे वाटप करण्यात आले. सावेडी येथील माऊली सभागृहाच्या परिसरात कार्यक्रम पार पडला. डॉ. ज्योत्स्ना डौले, डॉ. मनीषा करडे, डॉ. कीर्ती कोल्हे, डॉ. चैताली गोरे व डॉ. सुलभा पवार यांच्या प्रमुख उपस्थितीमध्ये झालेल्या कार्यक्रमासाठी जयाताई गायकवाड, अलका मुंदडा, विद्या बडवे, मीनाक्षी जाधव, वैशाली शिंदे, किशोरी भोर, सपना रणखांब, मीरा बेरड, सरला सातपुते, सारिका खांदवे, जया भुतकर, भारतीय डमाळे, वैशाली बिडवे, दीपा गुंड, आशा गायकवाड, शोभा कांबळे, कमल खेडकर, ज्योती बेल्हे, रेखा फिरोदिया, नंदिनी गांधी, सुजाता पुजारी, ट्रेकयात्रीचे रविंद्र चोभे पाटील, आकाश भैय्या पातकळ, अमित सोनग्रा, प्राजक्ता गुंजाळ, अश्‍विनी दहिवाळकर, माया कोल्हे आदींसह महिला मोठ्या संख्येने उपस्थित होत्या.

अनिता काळे म्हणाल्या की, पर्यावरण संवर्धनासाठी महिलांनी पुढाकार घेऊन ऑक्सीजनचा सोहळा राबविला आहे. वृक्ष संवर्धनासाठी प्रत्येकाने एक झाड लावून पर्यावरण संवर्धनाला हातभार लावावे. निसर्गाचा समतोल समाजाला विकासाच्या दिशेने घेऊन जाणारा आहे. तर पर्यावरणामुळे निर्माण होत चाललेले अनेक प्रश्‍न सुटण्यास मदत होणार असल्याचे त्यांनी सांगितले.
डॉ. ज्योत्स्ना डौले म्हणाल्या की, पर्यावरण संवर्धनासाठी महिलांचा पुढाकार प्रेरणादायी आहे. मोठ्या प्रमाणात शहरीकरण वाढले, वाहनांची संख्या व सिमेंटचे जंगले वाढली. यामुळे प्रदूषण वाढल्याने निसर्गाचे समतोल ढासाळले आहे. कोरोनात ऑक्सिजनचे महत्त्व सर्वांना समजले. पर्यावरण संवर्धन फक्त सरकारची जबाबदारी नसून, प्रत्येकाचे ते कर्तव्य असल्याचे त्या म्हणाल्या.

विद्या बडवे यांनी स्त्री ही संवर्धन, संगोपनाने सर्वांना वाढवते. या चळवळीत तीचे योगदान महत्त्वपूर्ण ठरणार आहे. निसर्गाने मानवाला भरभरून दिले. निसर्गाशिवाय जगणं अशक्य आहे. वृक्षतोडीने निसर्गाचे समतोल ढासाळले गेले असून, पुन्हा समृद्धी नांदण्यासाठी पर्यावरण संवर्धनाची आवश्‍यकता असल्याचे सांगितले.

रविंद्र चोभे पाटील म्हणाले की, निसर्गाच्या सानिध्यात जीवनाचा आनंद घेता येणार आहे. महिला फक्त झाडांना फेरे मारत नाही, तर ते झाड जगविण्यासाठी देखील योगदान देत आहे. महिलांच्या योगदानाने पर्यावरण संवर्धनाच्या चळवळीला गती मिळणार असल्याचे त्यांनी सांगितले. कार्यक्रमाचे सूत्रसंचालन मिनाक्षी जाधव यांनी केले. आभार सरला सातपुते यांनी मानले.