रंगले चुरशीचे सामने; विविध गटांत एकतर्फी विजय
आराध्य, अंशुमन, माहीर, सिद्धी, प्रांजल, अजय आणि वेदांत यांची गोलांची आतषबाजी
अहिल्यानगर (प्रतिनिधी)- फिरोदिया शिवाजियन्स अकॅडमी आयोजित आठव्या आंतरशालेय फुटबॉल स्पर्धेत गुरुवारी (दि. 6 ऑगस्ट) अहमदनगर महाविद्यालयाच्या मैदानावर विविध वयोगटांतील सामने उत्साहपूर्ण वातावरणात पार पडले. शालेय खेळाडूंनी उत्कृष्ट सांघिक समन्वय, आक्रमक खेळ आणि भक्कम बचावाचे दर्शन घडवत प्रेक्षकांची वाहवा मिळवली. दिवसभर झालेल्या सामन्यांमध्ये सेक्रेटहार्ड कॉन्व्हेंट स्कूल आणि आर्मी पब्लिक स्कूलच्या संघांनी दमदार कामगिरी करत प्रतिस्पर्धी संघांवर एकहाती वर्चस्व गाजवले.
सकाळच्या सत्रात 14 वर्षांखालील मुलांच्या गटात पोदार स्कूल आणि सेक्रेटहार्ड कॉन्व्हेंट स्कूल यांच्यात झालेल्या सामन्यात सेक्रेटहार्ड कॉन्व्हेंट स्कूलने 1-0 गोलने विजय मिळवला. सामन्याच्या पाचव्या मिनिटाला आराध्य ॲथनी याने शानदार गोल करून संघाचे खाते उघडले. त्यानंतर सेक्रेटहार्डच्या बचावफळीने भक्कम कामगिरी करत पोदार स्कूलला शेवटपर्यंत एकही गोल करू दिला नाही आणि विजय निश्चित केला.
16 वर्षांखालील मुलांच्या गटात पोदार स्कूलविरुद्ध सेक्रेटहार्ड कॉन्व्हेंट स्कूलने 5-0 अशा दणदणीत फरकाने विजय मिळवला. अंशुमन विधाते याने चौथ्या मिनिटाला गोल करत संघाला आघाडी मिळवून दिली. त्याने पुन्हा 22 व्या मिनिटाला दुसरा गोल करत संघाची पकड अधिक मजबूत केली. त्यानंतर माहीर गुंदेचा याने उत्कृष्ट आक्रमक खेळाचे प्रदर्शन करत 27 व 37 व्या मिनिटाला दोन गोल केले. जोएल साठे याने 39 व्या मिनिटाला गोल करत विजयावर शिक्कामोर्तब केले. सेक्रेटहार्डच्या भक्कम बचावामुळे पोदार स्कूलला एकही गोल करता आला नाही.
16 वर्षांखालील मुलींच्या गटात आर्मी पब्लिक स्कूल आणि श्री साई इंग्लिश मिडीयम स्कूल यांच्यात झालेल्या सामन्यात आर्मी पब्लिक स्कूलच्या मुलींनी 4-0 असा शानदार विजय मिळवला. सिद्धी पोटे हिने 15 व्या मिनिटाला पहिला गोल केला. त्यानंतर प्रांजल हिने 20 व 48 व्या मिनिटाला दोन गोल करत संघाची आघाडी अधिक भक्कम केली. शर्वरी हिने 24 व्या मिनिटाला गोल करत विजयात मोलाची भर घातली. श्री साई इंग्लिश मिडीयम स्कूलला संपूर्ण सामन्यात एकही गोल करता आला नाही.
12 वर्षांखालील मुलांच्या गटात आर्मी पब्लिक स्कूलने श्री साई इंग्लिश मिडीयम स्कूलवर 2-0 असा विजय मिळवला. मोहित याने सामन्याच्या प्रारंभीच गोल करत संघाचे खाते उघडले, तर समीर याने 8 व्या मिनिटाला दुसरा गोल करत विजय निश्चित केला. या सामन्यातही आर्मी पब्लिक स्कूलच्या बचावफळीने प्रतिस्पर्ध्यांना गोल करण्याची एकही संधी दिली नाही.
दुपारच्या सत्रात 14 वर्षांखालील मुलांच्या गटात आर्मी पब्लिक स्कूल आणि श्री साई इंग्लिश मिडीयम स्कूल यांच्यातील सामना रंगला. या सामन्यात आर्मी पब्लिक स्कूलने 3-0 गोलने विजय मिळवत सकाळच्या पराभवाची भरपाई केली. अजय सांगळे याने अप्रतिम खेळाचे प्रदर्शन करत 11, 40 व 46 व्या मिनिटाला गोलांची हॅट्ट्रिक नोंदवली आणि संघाला दिमाखदार विजय मिळवून दिला.
दुपारच्या सत्रातील 16 वर्षांखालील मुलांच्या गटात आर्मी पब्लिक स्कूलने श्री साई इंग्लिश मिडीयम स्कूलवर 3-0 असा विजय मिळवला. वेदांत गवळी याने 16 व 19 व्या मिनिटाला सलग दोन गोल करून संघाला मजबूत आघाडी मिळवून दिली. त्यानंतर आदेश साबळे याने 36 व्या मिनिटाला गोल करत विजयावर शिक्कामोर्तब केले. आर्मी पब्लिक स्कूलच्या शिस्तबद्ध खेळामुळे श्री साई इंग्लिश मिडीयम स्कूलला संपूर्ण सामन्यात एकही गोल करता आला नाही.