केडगाव ग्रामस्थ व बुधराणी हॉस्पिटलचा संयुक्त उपक्रम
माजी महापौर संदीप कोतकर यांच्या विकासकामामुळे केडगाव उपनगराची झपाट्याने वाढ -आ. संग्राम जगताप
अहमदनगर (प्रतिनिधी)- माजी महापौर संदीप कोतकर यांनी केलेल्या विकासकामामुळे केडगाव उपनगराची झपाट्याने वाढ झाली. केडगावला महापौर पदाच्या माध्यमातून संधी मिळाली असताना त्यांनी प्रामुख्याने केडगावचा पाणी प्रश्‍न कायमचा सोडवला. सर्वसामान्य नागरिकांचे प्रश्‍न सोडवून त्यांना आधार देण्याचे काम त्यांनी केले. हाच त्यांच्या कार्याचा सामाजिक वारसा आजही केडगावमध्ये कार्यकर्त्यांच्या माध्यमातून सुरु असल्याचे प्रतिपादन आमदार संग्राम जगताप यांनी केले.
दृष्टीदोष असलेल्या गरजूंसाठी केडगाव ग्रामस्थ व बुधराणी हॉस्पिटल (पुणे) यांच्या संयुक्त विद्यमाने केडगाव येथे मोफत नेत्र तपासणी व मोतीबिंदू शस्त्रक्रिया शिबिर घेण्यात आले. माजी महापौर संदीप कोतकर यांच्या वाढदिवसानिमित्त राबविण्यात आलेल्या या सामाजिक उपक्रमास केडगाव येथील ज्येष्ठ नागरिकांचा उत्स्फुर्त प्रतिसाद लाभला.
या शिबिराचे उद्घाटन आमदार जगताप व माजी मंत्री शिवाजी कर्डिले यांच्या हस्ते झाले. यावेळी बाबाशेठ कोतकर, माजी नगरसेवक सुनील कोतकर, उद्योजक जालिंदर कोतकर, नगरसेविका गौरीताई ननावरे, नगरसेवक राहुल कांबळे, महिला बाल कल्याणच्या माजी सभापती लताताई शेळके, सामाजिक कार्यकर्ते गणेश ननावरे, गणेश आनंदकर, मनोज कोतकर, नेत्रदूत जालिंदर बोरुडे, गणेश सातपुते, भूषण गुंड, सुनील उमाप, डॉ. अभिजीत मिरेकर, डॉ. किरण आहेर आदी उपस्थित होते.
पुढे जगताप म्हणाले की, नेप्ती उपबाजार समितीच्या माध्यमातून देखील अनेक बेरोजगार युवकांना रोजगार मिळाला. राज्य सरकारकडून मोठा निधी आणून त्यांनी या परिसराचा कायापालट केला. त्यांनी दिलेले योगदान व केलेली विकास कामे नवीन पिढी पर्यंत घेऊन जाण्याची गरज आहे. तसेच केडगावकरांचे इतर प्रश्‍न सोडविण्यासाठी व विकासकामाबाबत प्रयत्नशील राहणार असल्याचे त्यांनी सांगितले.
शिवाजी कर्डिले म्हणाले की, केडगाव व शहराच्या विकासासाठी संदीप कोतकर यांनी केलेले कार्य आजही नगरकरांच्या स्मरणात कायम आहे. महापौरच्या कारकिर्दीत त्यांनी केलेले विविध विकास कामे आजही नगरकर बोलून दाखवितात. त्यांच्या वाढदिवशी त्यांनी केलेल्या कामाची आठवण झाल्याशिवाय राहत नाही. उत्तम विकास कामामुळे जनसामान्य वर्ग त्यांच्याशी जोडला गेला असल्याचे त्यांनी सांगितले. तर वाढदिवसाच्या सेलिब्रेशनची पध्दत बदलत चालली आहे. मात्र हा सेलिब्रेशन वंचितांच्या जीवनात आनंद फुलविणारा असला पाहिजे. सामाजिक भान ठेवून व गोरगरिबांची गरज ओळखून घेतलेले शिबिराचा उपक्रम कौतुकास्पद असल्याचे स्पष्ट केले.
प्रास्ताविकात बाबासाहेब वायकर यांनी केडगावमध्ये संदीप कोतकर यांच्या वाढदिवसानिमित्त सुरू असलेल्या विविध, धार्मिक, सामाजिक व सांस्कृतिक कार्यक्रमांचा आढावा घेतला. सामाजिक कार्यकर्ते गणेश ननावरे यांनी पाहुण्यांचे स्वागत केले. उमेश उमाप म्हणाले की, केडगावला संदीप कोतकर यांच्या माध्यमातून अष्टपैलू व्यक्तिमत्व मिळाल्याने या परिसराचा झपाट्याने विकास साधला गेला. सर्वसामान्यांचे नेतृत्व म्हणून ते उदयास आले. उपनगराला विकासाची दिशा देऊन कार्यकर्त्यांना त्यांनी सन्मान मिळवून देण्याचे काम केले असल्याचे त्यांनी सांगितले.
ह.भ.प. रामदास महाराज क्षीरसागर म्हणाले की, संदीप कोतकर यांनी उत्तम प्रकारे समाजसेवा करून राजकारण केले. अनेक विधायक कामे त्यांनी मार्गी लावली. आजही त्यांचे नाव प्रत्येकाच्या मनात कोरले गेले असल्याचे त्यांनी सांगितले.
सकाळी सुरु झालेले शिबिर संध्याकाळी उशीरा पर्यंत सुरु होते. यामध्ये तब्बल 980 ज्येष्ठ नागरिकांची मोफत नेत्र तपासणी करण्यात आली. रुग्णांची तपासणी अमित पिल्ले, संजय चिंधे, सिस्टर माया आल्हाट, प्रशांत शिंदे यांनी केली. 105 रुग्णांची मोतीबिंदू शस्त्रक्रियेसाठी निवड करण्यात आली आहे. त्यांच्यावर पुणे येथील बुधराणी हॉस्पिटल मध्ये शस्त्रक्रिया केली जाणार आहे. यावेळी 125 गरजूंना मोफत नंबरचे चष्मे उपलब्ध करुन देण्यात आले.
कार्यक्रमाचे सूत्रसंचालन राजेंद्र टाक यांनी केले. आभार नगरसेवक राहुल कांबळे यांनी मानले. शिबिर यशस्वी करण्यासाठी मनीष ननावरे, श्यामशेठ कोतकर, केतन कांबळे, राहुल कोतकर, वैभव कदम, महेश सरोदे, सचिन सरोदे आदींसह संदीप (दादा) कोतकर मित्र मंडळाच्या कार्यकर्त्यांने परिश्रम घेतले.