विद्यार्थ्यांसाठी विविध स्पर्धेचे आयोजन
महिलांच्या सक्षमीकरणासाठी व दुर्बल घटकातील विद्यार्थ्यांना शिक्षणाच्या प्रवाहात आणण्यासाठी तसेच दिव्यांग विद्यार्थ्यांना आधार देण्यासाठी महिला एकत्र येऊन सेवाप्रीत सोशल फाउंडेशनच्या माध्यमातून योगदान देत आहे.
विविध व्यवसाय करणार्‍या महिलांना एक व्यासपिठ निर्माण करुन त्यांच्या व्यवसायाला चालना देण्यासाठी सेवाप्रीतने उमंग फेस्टचे आयोजन केले आहे. या फेस्टचे हे दुसरे वर्ष आहे. मागील वर्षी झालेल्या फेस्टला नगरकरांचा उत्स्फुर्त प्रतिसाद मिळाला होता. यावर्षी देखील चांगला प्रतिसाद मिळण्याची अपेक्षा आयोजकांनी व्यक्त केली आहे.
शनिवार व रविवारी दोन दिवस होत असलेल्या उमंग मेळाव्यात महिलांचे खाद्य पदार्थ, हस्तकला, विविध साहित्य, वस्त्रांचे स्टॉल लावण्यात येणार आहे. या कार्यक्रमात सहभागी होणार्‍या महिलांसाठी विविध सांस्कृतिक, मनोरंजनात्मक कार्यक्रम घेण्यात येणार आहे. तसेच विद्यार्थ्यांसाठी हस्ताक्षर, चित्रकला, गोष्टी सांगणे, टाकाऊ पासून टिकाऊ वस्तू बनविणे, फॅन्सी ड्रेस स्पर्धेचे आयोजनही करण्यात आले आहे. या स्पर्धेत विद्यार्थ्यांना सहभागी होण्याचे व महिलांना या कार्यक्रमाचा लाभ घेण्याचे आवाहन करण्यात आले आहे.
सकाळी 10 ते रात्री 10 पर्यंत हा कार्यक्रम पार पडणार आहे. उमंग फेस्टमध्ये महिलांना आपल्या व्यवसायाशी निगडीत स्टॉल लावण्याचे तर इतर महिलांना या फेस्टमध्ये सहभागी होऊन महिलांना प्रोत्साहन देऊन अनाथ विद्यार्थ्यांना शिक्षणाच्या प्रवाहात आनण्यासाठी सहकार्य करण्याचे सेवाप्रीतच्या वतीने सांगण्यात आले आहे.