प्रयास व नम्रता दादी-नानी ग्रुपचा उपक्रम
दुर्धर आजार कायमचे नष्ट करण्यासाठी आयुर्वेद हा सर्वोत्तम पर्याय -डॉ. अंशु मुळे
अहमदनगर (प्रतिनिधी)- सर्व आजारांवर अतिशय परिणामकारक सिद्ध होत असलेल्या आयुर्वेद शास्त्राचा भारतीयांनी अवलंब करण्याची गरज आहे. जीवनमान बदलल्याने आजार व व्याधी वाढल्या आहेत. भारताने आयुर्वेद ही जगाला दिलेली सर्वात मोठी देणगी असून, त्याने मनुष्याच्या सर्व व्याधी व दुर्धर आजार मुळापासून बरे होतात. जीर्ण आजार शरीरातील इतर अवयवांमध्ये दोष निर्माण करतात. या दुर्धर आजारांना कायमचे नष्ट करण्यासाठी आयुर्वेद हा सर्वोत्तम पर्याय असल्याचे प्रतिपादन डॉ. अंशु मुळे यांनी केले.
प्रयास ग्रुप व नम्रता दादी-नानी ग्रुपच्या वतीने निरोगी आरोग्यासाठी आयुर्वेद या विषयावर व्याख्यानाचे आयोजन करण्यात आले होते. यावेळी मार्गदर्शन करताना डॉ. अंशु मुळे बोलत होत्या. यावेळी ग्रुपच्या अध्यक्षा अलकाताई मुंदडा, उपाध्यक्षा अनिता काळे, संचालिका शकुंतला जाधव, उषा गुगळे, शशीकला झरेकर, स्वप्ना शिंगवी, हिरा शहापूरे, दादी नानी ग्रुपच्या उपाध्यक्षा शोभा पोखरणा, सुजाता पूजारी, दिपा मालू आदींसह महिला मोठ्या संख्येने उपस्थित होत्या.
पुढे डॉ. मुळे म्हणाल्या की, ज्या व्यक्तीचे मन, आत्मा व सर्व इंद्रिये आनंदी, समाधानी आहेत त्या व्यक्तीस निरोगी म्हणावे. तात्पुरत्या स्वरूपात पडण्यावर फरकावर समाधान न मानता शरीरातून कायमस्वरूपी आजार निघून जाण्यासाठी आयुर्वेदचा अवलंब केला गेला पाहिजे. शरीराबरोबर मनाचे आरोग्यही तेवढेच महत्त्वाचे असल्याचे स्पष्ट करुन त्यांनी सकाळी उठण्यापासून ते रात्री लवकर झोपण्यापर्यंत पंचंद्रिय उत्तम ठेवण्यासाठी मार्गदर्शन केले. चुकीच्या लाईफस्टाईलने आरोग्यावर होणार्या विपरीत परिणामाची माहिती दिली.
प्रास्ताविकात अलकाताई मुंदडा यांनी स्पर्धेच्या युगात वावरतांना महिलांनी आपल्या आरोग्याची काळजी घेणे देखील महत्त्वाचे आहे. एका महिलेवर सर्व कुटुंबीयांचे आरोग्य आधारलेले असते. निरोगी व आनंदी जीवनासाठी स्वतःला वेळ देणे गरजेचे असल्याचे सांगितले. तर मागील पंचवीस वर्षापासून महिलांसाठी घेण्यात येणार्या विविध उपक्रमाची त्यांनी माहिती दिली.
ग्रुपच्या उपाध्यक्षा अनिता काळे यांची महाराष्ट्र महिला मंचच्या जिल्हाध्यक्षपदी नियुक्ती झाल्याबद्दल त्यांचा ग्रुपच्या वतीने सत्कार करण्यात आला.
यावेळी महिलांसाठी दिपा मालू यांनी विविध मनोरंजनात्मक व बौध्दिक खेळाच्या स्पर्धा घेतल्या. या स्पर्धेतील विजेत्या महिला वर्षा खरे, उषा भाटिया, दिपा राज, ज्योत्सना कुलकर्णी, गायत्री आंबेकर, छाया गांधी यांना उपस्थित पाहुण्यांच्या हस्ते बक्षिसं देण्यात आली. नगरसेवक प्रकाश भागानगरे यांच्या वतीने सर्व महिलांसाठी अल्पोपहाराची व्यवस्था करण्यात आली होती. कार्यक्रमाचे सूत्रसंचालन स्वप्ना शिंगवी यांनी केले. आभार सुजाता पुजारी यांनी मानले.
