उद्घाटन पत्रिकेतून केंद्रीय सामाजिक न्याय मंत्री आठवले यांना डावलले
स्थानिक रिपाईच्या पदाधिकार्‍यांना विश्‍वासात घेतले गेले नसल्याचा आरोप
अहमदनगर (प्रतिनिधी)- शहरातील भारतरत्न डॉ. बाबासाहेब आंबेडकर सामाजिक न्याय भवनच्या नूतन इमारतीच्या उद्घाटन कार्यक्रम पत्रिकेत केंद्रीय सामाजिक न्याय राज्यमंत्री ना. रामदास आठवले व सत्तेत युतीबरोबर असलेल्या रिपाईच्या स्थानिक पदाधिकार्‍यांना डावलल्याने रिपब्लिकन पार्टी ऑफ इंडियाच्या (आठवले) पदाधिकारी व कार्यकर्त्यांमध्ये नाराजीचा सूर पसरला आहे. रिपाईचे युवक जिल्हाध्यक्ष अमित काळे यांनी प्रसिध्दीपत्रकात याप्रकरणी खेद व्यक्त केला आहे.
शहरामध्ये महाराष्ट्र शासनाच्या सामाजिक न्याय व विशेष सहाय्य विभागाच्यावतीने भारतरत्न डॉ. बाबासाहेब आंबेडकर सामाजिक न्याय भवन उभारण्यात आले आहे. शहराच्या वैभवात भर घालणार्‍या अशा नूतन वास्तूचे लोकार्पण होऊन जिल्ह्यातील समाज बांधवांचे प्रश्‍न सुटून त्यांना न्याय, रोजगार, आधार देण्याचे आदी कामे या न्यायभवनातून होणार आहे. ही अत्यंत अभिनंदनीय बाब आहे. हे न्याय भवन होण्यासाठी व या वास्तूच्या उभारणीसाठी आंबेडकरी चळवळीतील कार्यकर्त्यांचेही मोलाचे योगदान आहे. राज्यात व केंद्रात भाजप शिवसेना आरपीआय महायुती असून रिपब्लिकन पार्टी ऑफ इंडियाचे राष्ट्रीय अध्यक्ष व केंद्रीय सामाजिक न्याय राज्यमंत्री रामदास आठवले यांना कार्यक्रम पत्रिकेत नाव टाकण्यात आलेले नाही. रिपब्लिकन पक्षाच्या व आंबेडकरी चळवळीतील स्थानिक कार्यकर्त्यांनाही विश्‍वासात घेतले नसल्याने पक्षातील पदाधिकारी व कार्यकर्त्यांमध्ये नाराजीचा सूर असल्याचे काळे यांनी म्हंटले आहे.
निवडणुकीच्या प्रचारवेळी युतीतील पक्षाकडून ना. आठवले यांचे फोटो प्रत्येक बॅनरवर छापले जातात व निवडणूक झाली की, सामाजिक न्याय खात्याच्या कार्यक्रमातही त्यांचे नाव, फोटो वापरले जात नाही. मागील वेळीही भारत सरकारच्या सामाजिक न्याय व अधिकारिता मंत्रालयाच्या दिव्यांगासाठी मोफत सहायक साधने वाटप व तपासणी शिबिरात असा प्रकार घडला होता.
पुन्हा हा प्रकार सामाजिक न्यायभवनाच्या कार्यक्रमात होत असल्याने पक्षातील पदाधिकारी व कार्यकर्ते संताप व्यक्त करत असून, या प्रकरणी रिपाईचे राज्य उपाध्यक्ष तथा जिल्हा संपर्कप्रमुख श्रीकांत भालेराव, राज्य उपाध्यक्ष विजय वाकचौरे, उत्तर महाराष्ट्र सचिव अजय साळवे, उत्तर महाराष्ट्र उपाध्यक्ष शशिकांत पाटील, विभागीय जिल्हाप्रमुख भिमराज बागुल, जिल्हाध्यक्ष सुरेंद्र थोरात, कर्जत तालुकाध्यक्ष संजय भैलुमे, पारनेर तालुकाध्यक्ष राजेंद्र उबाळे, श्रीगोंदा तालुकाध्यक्ष राजा जगताप, पाथर्डी तालुकाध्यक्ष बाबा राजगुरू, आयटी सेलचे जिल्हा संपर्कप्रमुख मंगेश मोकळ आदींसह पक्षातील अनेक पदाधिकारी व कार्यकर्त्यांनी आपली नाराजी व्यक्त केली.
