वैभव पाचारणे यांचे सार्वजनिक बांधकाम विभागाला निवेदन
अहिल्यानगर (प्रतिनिधी)- केडगाव मधील नगर-पुणे रोडवरून मोतीनगर परिसराकडे वळताना वाहनांचा अतिवेग आणि वाढत चाललेली अपघातांची मालिका लक्षात घेता गतीरोधक बसविण्याची मागणी परिसरातील नागरिकांच्या वतीने सार्वजनिक बांधकाम विभागाकडे करण्यात आली आहे.
या संदर्भात केडगाव येथील वैभव सुनिल पाचारणे यांनी सार्वजनिक बांधकाम कार्यालयातील संबंधित अधिकाऱ्यांचे या प्रश्‍नावर लक्ष वेधून निवेदन दिले. मोतीनगर परिसरात आंबिका विद्यालय असल्याने येथे सकाळ-संध्याकाळ मोठ्या प्रमाणात विद्यार्थी, महिला, नागरिक व वृद्धांची वर्दळ असते. नगर-पुणे रोडवरून या भागात वळण घेताना वाहनचालक वेग न कमी करता धडधडीत वेगानेच वाहने चालवतात. या बेफाम वेगामुळे परिसरात अपघातांचे प्रमाण सतत वाढत असून स्थानिक नागरिकांमध्ये तीव्र भिती निर्माण झाली झाली आहे. शाळकरी विद्यार्थ्यांना दररोज जीवाला धोका पत्करून मुख्य रस्ता ओलांडावा लागत असल्याचे पाचारणे यांनी अर्जात नमूद केले आहे.
सदर ठिकाणी गतीरोधक नसल्यामुळे वाहनांच्या वेगावर नियंत्रण राहत नाही. त्यामुळे लहान-मोठे अपघात घडत असून, शाळकरी मुलांचे, महिलांचे आणि नागरिकांचे जीव मुठीत धरुन मार्गक्रमण करावे लागत आहे. यासाठी तातडीने सदर परिसरात गतीरोधक बसविण्याची मागणी करण्यात आली आहे.