पंतप्रधानांच्या भूमिकेवर प्रश्‍नचिन्ह
पीपल्स हेल्पलाईनचा पंतप्रधान मोदींना सवाल; इतिहास व राष्ट्रभक्तीचा गौरव करण्यास अनुत्साह का?
नगर (प्रतिनिधी)- गुजरातच्या सांस्कृतिक आणि राजकीय ओळखीला नवे परिमाण देणारी अहमदाबादच्या नामांतराची मागणी पुन्हा एकदा चर्चेत आली आहे. पीपल्स हेल्पलाईनचे ॲड. कारभारी गवळी यांनी पंतप्रधान नरेंद्र मोदींना पाठविलेल्या निवेदनाद्वारे अहमदाबादचे नाव बदलून सरदार वल्लभभाई पटेल नगर करण्याची मागणी केली आहे.
गवळी यांनी या मागणीचा उद्देश कोणत्याही राजकीय हेतूपेक्षा महान स्वातंत्र्यसैनिक, भारताच्या एकसंघतेचे प्रतीक आणि लोहपुरुष सरदार वल्लभभाई पटेल यांच्या ऐतिहासिक कार्याचा गौरव करणे हा असल्याचे स्पष्ट केले आहे.
इ.स. 1411 मध्ये गुजरातच्या सुलतान अहमदशाह पहिला यांनी साबरमती नदीकाठी वसवलेल्या या शहराला अहमदाबाद हे नाव दिले. त्याआधी हा प्रदेश अशावळ किंवा कर्णावती म्हणून ओळखला जात होता. 12व्या शतकात राजा कर्णदेव यांनी कर्णावतीची स्थापना केली होती. शतकानुशतके विविध राजवंश, मुघल सत्ताधीश आणि ब्रिटिश राजवटीतून अहमदाबादने ऐतिहासिक व सांस्कृतिक वारसा जोपासला आहे.
अलाहाबादचे नाव प्रयागराज केल्यानंतर देशभरात विविध शहरांच्या नामांतराच्या मागण्या जोर धरू लागल्या. काही संघटनांनी अहमदाबादचे नाव कर्णावती किंवा वल्लभनगर करण्याचे सुचवले होते. सरदार वल्लभभाई पटेल यांनी 562 संस्थानांचे विलीनीकरण करून एकसंघ भारताची पायाभरणी केली. त्यांच्या नावाने शहराला नवे नाव दिल्यास राष्ट्रीय एकात्मता आणि देशभक्तीचा संदेश मिळेल, असे पीपल्स हेल्पलाईनच्या वतीने म्हंटले आहे.
ॲड. गवळी म्हणाले की, पीपल्स हेल्पलाईन कोणत्याही शहराचे नाव बदलण्याच्या एकांगी मोहिमेत विश्‍वास ठेवत नाही. पण भाजपने अनेकदा हिंदू मतांच्या ध्रुवीकरणासाठी शहरांची नावे बदलली आहेत, हे वास्तव आहे. मग पंतप्रधान नरेंद्र मोदी अहमदाबादच्या नामांतराबाबत अनुत्साही का आहेत? हा प्रश्‍न जनतेसमोर स्पष्ट व्हायला हवा. सरदार पटेलांचा गौरव करण्याचा हा ऐतिहासिक क्षण असू शकतो, आणि त्याकडे दुर्लक्ष होणे म्हणजे इतिहासाशी अन्याय असल्याचे त्यांनी सांगितले.