निमगाव-निघोज येथे राज्यभरातील औषध विक्रेते एकवटणार; संघटनात्मक वाटचालीवर होणार चर्चा
राज्यातील केमिस्ट बांधवांचे लक्ष शिर्डीतील त्रैवार्षिक सभेकडे!
अहिल्यानगर (प्रतिनिधी)- महाराष्ट्र राज्य केमिस्ट ॲण्ड ड्रगिस्ट असोसिएशनच्या त्रैवार्षिक सर्वसाधारण सभेसह निवडणुकीच्या पार्श्‍वभूमीवर अहिल्यानगर शहरातील केमिस्ट भवन येथे नियोजन बैठक पार पडली. महाराष्ट्र राज्य केमिस्ट ॲण्ड ड्रगिस्ट असोसिएशनची त्रैवार्षिक सर्वसाधारण सभा व निवडणूक शुक्रवार, दि. 23 ऑक्टोबर आणि शनिवार, दि. 24 ऑक्टोबर 2026 रोजी ‘साई पालखी निवारा’, निमगाव-निघोज, शिर्डी, ता. राहाता, जि. अहिल्यानगर येथे आयोजित करण्यात आली आहे. या महत्त्वपूर्ण सभेस राज्यातील सर्व जिल्ह्यांतील सभासदांनी मोठ्या संख्येने उपस्थित राहावे, असे आवाहन अहिल्यानगर जिल्हा केमिस्ट असोसिएशनचे अध्यक्ष दत्ता गाडळकर, सचिव आबासाहेब बेद्रे, खजिनदार प्रशांत उबाळे आणि सर्व जिल्हा कार्यकारिणी सदस्यांनी केले आहे.
अखिल भारतीय व महाराष्ट्र राज्य केमिस्ट असोसिएशनचे अध्यक्ष जगन्नाथजी ऊर्फ अप्पासाहेबजी शिंदे आणि सचिव अनिल नावंदर यांच्या मार्गदर्शनाखाली ही त्रैवार्षिक सर्वसाधारण सभा व निवडणूक प्रक्रिया पार पडणार आहे. या सभेच्या नियोजनासाठी अहिल्यानगर शहरातील केमिस्ट भवन येथे आयोजित बैठकीत सभेचे नियोजन, राज्यभरातील सभासदांचा सहभाग आणि निवडणूक प्रक्रियेच्या अनुषंगाने विविध विषयांवर चर्चा करण्यात आली. यावेळी अजित पारख, शशांक रासकर, चेतन कर्डिले, गणेश वाणी, भरत सुपेकर, मनिष सोमाणी, मनोज खेडकर आदी उपस्थित होते.
महाराष्ट्र राज्य केमिस्ट ॲण्ड ड्रगिस्ट असोसिएशन ही राज्यातील औषध विक्रेते आणि औषध व्यवसायाशी संबंधित व्यावसायिकांचे प्रतिनिधित्व करणारी महत्त्वपूर्ण संघटना आहे. या संघटनेची त्रैवार्षिक सर्वसाधारण सभा आणि निवडणूक ही राज्यातील औषध विक्रेता बांधवांच्या दृष्टीने महत्त्वाची मानली जात आहे. त्यामुळे या सभेकडे राज्यभरातील केमिस्ट बांधवांचे लक्ष लागले आहे.
या सभेमध्ये संघटनेच्या मागील तीन वर्षांतील कार्याचा आढावा घेण्यात येणार आहे. तसेच औषध व्यवसायासमोरील विविध प्रश्‍न, व्यावसायिक अडचणी, बदलती परिस्थिती आणि भविष्यातील आव्हाने यांवर सविस्तर चर्चा होण्याची अपेक्षा आहे. औषध विक्रेत्यांच्या व्यवसायाशी संबंधित प्रश्‍न सोडविण्यासाठी संघटनेच्या माध्यमातून कोणत्या उपाययोजना करता येतील, यावरही विचारविनिमय होणार आहे.
औषध व्यवसायाचे नियमन, औषध विक्रेत्यांच्या व्यावसायिक समस्या, औषध कायद्यांमधील बदल, शासनस्तरावर प्रलंबित असलेले विविध प्रश्‍न आणि औषध विक्रेता बांधवांच्या हिताशी संबंधित विषय या सभेच्या केंद्रस्थानी राहण्याची शक्यता आहे. बदलत्या व्यावसायिक परिस्थितीत औषध विक्रेत्यांना भेडसावणाऱ्या अडचणींवर संघटनेने प्रभावी भूमिका घेणे, तसेच सदस्यांच्या समस्या संबंधित यंत्रणांपर्यंत पोहोचविणे, याबाबतही या सभेत चर्चा होणे अपेक्षित आहे.
या सर्वसाधारण सभेचे आणखी एक महत्त्वाचे वैशिष्ट्य म्हणजे संघटनेच्या पुढील त्रैवार्षिक कालावधीसाठी निवडणूक प्रक्रिया पार पडणार आहे. या निवडणुकीच्या माध्यमातून संघटनेच्या आगामी वाटचालीसाठी नेतृत्वाची निवड होणार असल्याने या प्रक्रियेला विशेष महत्त्व प्राप्त झाले आहे. राज्यातील विविध जिल्ह्यांतील पदाधिकारी, प्रतिनिधी आणि सभासद या निमित्ताने एकत्र येणार आहेत. त्यांच्या सहभागातून संघटनेतील समन्वय वाढविणे, परस्पर सहकार्य अधिक दृढ करणे आणि औषध विक्रेता बांधवांच्या प्रश्‍नांना प्रभावीपणे वाचा फोडण्यासाठी संघटनात्मक ताकद वाढविणे, हा या सभेमागील महत्त्वाचा उद्देश आहे.
शिर्डी येथे होणारी ही त्रैवार्षिक सर्वसाधारण सभा व निवडणूक महाराष्ट्र राज्य केमिस्ट ॲण्ड ड्रगिस्ट असोसिएशनच्या आगामी वाटचालीच्या दृष्टीने महत्त्वपूर्ण ठरणार आहे. या सभेमुळे राज्यातील औषध विक्रेता बांधवांमध्ये समन्वय, सहकार्य आणि संघटनात्मक एकजूट अधिक वृद्धिंगत होण्यास मदत होईल, अशी अपेक्षा व्यक्त केली जात आहे. या त्रैवार्षिक सर्वसाधारण सभा व निवडणुकीसाठी राज्यातील सर्व जिल्ह्यांचे अध्यक्ष, सचिव, डेलीगेट्‌स तसेच अल्टरनेट डेलीगेट्‌स मेंबर्स यांनी आवर्जून उपस्थित राहावे. सभेमध्ये होणाऱ्या मार्गदर्शनाचा लाभ घ्यावा आणि संघटनेच्या पुढील वाटचालीसाठी सक्रिय सहभाग नोंदवावा, असे आवाहन अहिल्यानगर जिल्हा केमिस्ट असोसिएशनने केले आहे.