शहर व उपनगरात वाढलेला डेंग्यूचा प्रादुर्भाव कमी होण्यासाठी केला होता पाठपुरावा
नागरिकांच्या आरोग्याच्या दृष्टीकोनाने आप महापालिकेकडे पाठपुरावा करणार -भरत खाकाळ
अहमदनगर (प्रतिनिधी)- शहर व उपनगरात डेंग्यूचा प्रादुर्भाव झपाट्याने वाढत असताना मोठ्या प्रमाणात डेंग्यूचे रुग्ण आढळत आहे. सावेडी परिसरात वाढलेला डेंग्यूचा प्रादुर्भाव कमी होण्यासाठी आम आदमी पार्टीच्या वतीने करण्यात आलेल्या पाठपुराव्याने महापालिकेच्या वतीने सावेडी गाव ते भुतकरवाडी परिसरात वेगवेगळ्या ठिकाणी डास कमी होण्यासाठी धूराची फवारणी करण्यात आली.
तर एमआयडीसी परिसरातील कामगारांना मिष्टान्न जेवणाचे वाटप करण्यात आले. आपचे शहराध्यक्ष भरत खाकाळ यांच्या पुढाकाराने हा सामाजिक उपक्रम राबविण्यात आला. यावेळी ॲड. विद्या शिंदे, ॲड. महेश शिंदे, रावसाहेब काळे, पोपट बनकर, दिलीप घुले, पोपट बोरसे, गौतम कुलकर्णी, तुकाराम भिंगारदिवे, अजित कटारिया, सिताराम खाकाळ, राजू देशपांडे, जारांगे पाटील, राजेंद्र सामल आदी उपस्थित होते.
भरत खाकाळ म्हणाले की, सर्वसामान्य नागरिकांना महापालिकेकडून मूलभूत सुविधा मिळणे हा त्यांचा हक्क आहे. मात्र नागरिकांना हक्कापासून वंचित रहावे लागत आहे. आरोग्याच्या दृष्टीकोनाने खबरदारी म्हणून डेंग्यूची साथ पसरण्या अगोदरच उपाय योजना करणे आवश्‍यक होते. मात्र शहरात मोठ्या प्रमाणात रुग्ण आढळत असताना देखील महापालिकेला धूर फवारणीसाठी सांगावे लागत आहे. आम आदमी पार्टीच्या पाठपुराव्याने धूर फवारणी करण्यात आली असून, नागरिकांच्या आरोग्याच्या दृष्टीकोनाने आप महापालिकेकडे पाठपुरावा करणार असल्याचे त्यांनी सांगितले.