गो शाळेला चारा वाटप
फुले दांम्पत्यांच्या योगदानाने समाज सावरला -संतोष जाधव
अहमदनगर (प्रतिनिधी)- बहुजन समाज पार्टीच्या वतीने क्रांतीसुर्य महात्मा ज्योतिबा फुले यांची जयंती सामाजिक उपक्रमांनी साजरी करण्यात आली. सकाळी माळीवाडा येथील महात्मा फुले यांच्या पुतळ्यास पुष्पहार अर्पण करुन अभिवादन करण्यात आले. तर शहरातील अरुणोदय गो शाळेस चारा वाटप करण्यात आले.
बहुजन समाज पार्टीचे शहर जिल्हाध्यक्ष संतोष जाधव यांनी आपल्या वाढदिवसानिमित्त इतर खर्चांना फाटा देऊन महापुरुषांच्या विचाराने हा सामाजिक उपक्रम राबविला. यावेळी जिल्हा प्रभारी संजय डहाणे, शहर उपाध्यक्ष सिद्धार्थ पाटोळे, शहर बी.व्ही.एफ. आकाश जंजाळ, व्यापारी रवींद्र पुरी, रामभाऊ परदेशी, वंचित बहुजन आघाडीचे जिल्हाध्यक्ष प्रतीक बारसे, पै. अक्षय सांगळे, सामाजिक कार्यकर्ते सुहास पाटोळ, उमाशंकर यादव, सुनील ओहळ, आत्तार शेख आदी उपस्थित होते.
शहर जिल्हाध्यक्ष संतोष जाधव म्हणाले की, स्त्री शिक्षणाचे प्रणेते महात्मा ज्योतीबा फुले यांनी सावित्रीबाई फुले यांच्या सहकार्याने स्त्री शिक्षणाची मशाल प्रज्वलीत केली. फुले दांम्पत्यांच्या योगदानाने समाज सावरला असून, त्यांचे कार्य दिशादर्शक व प्रेरणादायी असल्याचे त्यांनी सांगितले.
संजय डहाणे यांनी बहुजन समाज पार्टीच्या वतीने दीनदुबळ्यांना आधार व नवयुवकांना प्रेरणा देण्यासाठी महात्मा फुले जयंती दिनाचा राबविलेला उपक्रम कौतुकास्पद असल्याचे त्यांनी सांगितले. उमाशंकर यादव यांनी युवकांच्या माध्यमातून बदल घडणार असून, युवकांनी महापुरुषांची जयंती इतर वायफट खर्चांना फाटा देऊन सामाजिक उपक्रम राबविण्याचे आवाहन केले.