ऑल इंडिया पँथर सेनेच्या राज्य मेळाव्यात संविधान बचाव, धर्मसत्ता हटावचा नारा
सर्व निवडणुका लढविण्याचा निर्णय
अहमदनगर (प्रतिनिधी)- निवडणुकांसाठी राम मंदिरचा मुद्दा संपल्याने, आता लव्ह जिहादचा मुद्दा जन्माला घालण्यात आला आहे. भारत हा हिंदू राष्ट्र नव्हे, तर संविधान राष्ट्र आहे. मागासवर्गीयांवर होत असलेल्या अन्यायाविरोधात बंड करण्यासाठी व राजकारणातील जातियवादींचे चेहरे उघडे पाडण्यासाठी ऑल इंडिया पँथर सेनेचा एल्गार असल्याचे प्रतिपादन राष्ट्रीय अध्यक्ष दीपकभाई केदार यांनी केले. तर संविधान बचाव धर्मसत्ता हटावचा नारा देऊन, सर्व निवडणुका लढविण्याचा निर्णय या मेळाव्यातून घेण्यात आला.
ऑल इंडिया पँथर सेनेचा राज्यव्यापी मेळावा सोमवारी (दि.30 जानेवारी) शहरात न्यू टिळक रोड येथील माऊली मंगल कार्यालयात पार पडला. यावेळी मार्गदर्शन करताना केदार बोलत होते. यावेळी पँथर सेनेचे राज्य अध्यक्ष विनोद भोळे, महासचिव सचिन तिवारी, राज्य उपाध्यक्ष बाळासाहेब शेंडगे, सरचिटणीस जितेश जगताप, प्रवक्ता बंटीभाऊ सदाशिवे, महाराष्ट्र सचिव बापूसाहेब लष्करे, भीमराज गोटे, संघटक मीनाक्षी बोर्डे, जिल्हाध्यक्ष योगेश थोरात, जिल्हा कार्याध्यक्ष पवन भिंगारदिवे, युवक जिल्हाध्यक्ष सागर ठोकळ, शहर जिल्हाध्यक्ष अतुल भिंगारदिवे, जिल्हा उपाध्यक्ष अमर घोडके, उत्तर जिल्हाध्यक्ष राम दरोडे, कानिफ पोपळघट, सचिन शेलार, नवीन भिंगारदिवे, निखील शिंदे, रुपेश बनसोडे, अमृता वाघमारे, रायगडचे मनोहर कांबळे, बीड जिल्हाध्यक्ष नितीन सोनवणे, उस्मानाबाद जिल्हाध्यक्ष अशोक कसबे, पुणे जिल्हाध्यक्ष किशोर काशीकर, करुणाताई मोकळ, पुणे जिल्हा उपाध्यक्ष अनिल गायकवाड आदींसह पदाधिकारी उपस्थित होते.
पुढे केदार म्हणाले की, अहमदनगर हा आंबेडकरी चळवळीचा बालेकिल्ला आहे. या भूमीतूनच राजकीय पर्वाची भूमिका जाहीर केली आहे. समाज रक्षणाचा पँथरचा हा लढा असून, गुलामगिरी नष्ट करण्यासाठी हा संघर्ष आहे. मागासवर्गीय समाजावर सर्वात जास्त अत्याचार नगर जिल्ह्यात होत आहे. या अत्याचाराचा बिमोड करण्यासाठी पँथर एकवटले आहे. दंगलीतून नव्हे, तर समतेतून सत्ता मिळवून समाज घडविण्याचे कार्य पँथर सेना करणार आहे. स्वाभिमानाची ही चळवळ असून, गुलामगिरी झुगारणारी असल्याचे त्यांनी सांगितले.
प्रास्ताविक जिल्हाध्यक्ष योगेश थोरात यांनी केले. पाहुण्यांचा एका मोठ्या गुलाबपुष्पाच्या हारात सत्कार करण्यात आला. उपस्थितांनी हातात हात देऊन धर्मांधशक्ती विरोधात एकत्रित लढण्याचा संकल्प केला. स्वागत अतुल भिंगारदिवे यांनी केले. अमर घोडके यांनी जिल्ह्यात मागासवर्गीयांच्या वाढत्या अत्याचाराचा आढावा घेतला.
उस्मानाबादचे जिल्हाध्यक्ष अशोक कसबे यांनी पँथर मेळावा समाज जागृत करण्यासाठी असून अन्यायाला वाचा फोडण्याचे काम पँथर सेना करीत असल्याचे सांगितले. बीड जिल्हाध्यक्ष नितीन सोनवणे यांनी मूलभूत प्रश्‍नांना बगल देऊन प्रस्थापित वेगवेगळ्या मुद्दयांवर सर्वसामान्यांना झुळवत ठेवत आहे. मागासवर्गीयांना दाबण्याचे काम होत असून, सत्तेतून बदल घडविण्यासाठी निवडणुकीत उतरण्याचा निर्णय क्रांतीकारक ठरणार असल्याचे सांगितले. अमर अमर घोडके यांनी निळ्या वादळाला साथ देऊन, निवडणुकीत मोठ्या ताकतीने मागे उभे राहण्याचे आवाहन केले.
प्रदेश संघटक मीनाक्षी बोर्डे म्हणाल्या की, समाजात जातीयवादाचा खेळ मांडला गेला आहे. हा विध्वंसक प्रकार सुरू असून, त्याला रोखण्यासाठी आंबेडकरवादी चळवळ उभी ठाकली असल्याचे त्यांनी सांगितले. परभणी जिल्हा अध्यक्ष निवृत्ती वाघमारे व पुणे जिल्हाध्यक्ष अनिल गायकवाड यांनी आपल्या भूमिका मांडल्या. श्रीगोंदा तालुका अध्यक्ष निखिल शिंदे, किशोर काशीकर, संतोष शेंडगे, मनोहर कांबळे यांनी दलित पँथरची वाटचाल स्पष्ट केली. कार्यक्रमाचे सूत्रसंचालन उद्धव कालापहाड यांनी केले. आभार सागर ठोकळ यांनी मानले.