अवैध मुरुम उत्खननापोटी भाळवणी येथे कोट्यावधी दंड बुडविण्यात आल्याचा आरोप
कारवाई न झाल्यास उपोषण करण्याचा अन्याय निवारण निर्मूलन समितीचा इशारा
अहमदनगर (प्रतिनिधी)- अवैध मुरुम उत्खननापोटी कोट्यावधीचा दंड होऊनही प्रशासनाशी हातमिळवणी करुन काही लाख रुपये दंडापोटी भरुन शासनाची फसवणुक करण्यात आली असल्याचा आरोप करुन, भाळवणी (ता. पारनेर) येथील सदर प्रकरणात संपूर्ण दंड वसूल करावा किंवा दंड झालेल्या व्यक्तीची स्थावर जंगम मालमत्ता जप्त करण्याची मागणी अन्याय निवारण निर्मूलन सेवा समितीच्या वतीने करण्यात आली आहे. या मागणीचे निवेदन समितीचे जिल्हाध्यक्ष अरुण रोडे यांनी जिल्हाधिकारी यांना देऊन, कारवाई न झाल्यास उपोषण करण्याचा इशारा दिला आहे.
पारनेर तालुक्यातील भाळवणी येथील गट नंबर 37 मध्ये एका दांम्पत्याने विनापरवाना मुरुम उत्खनन केले होते. त्यांना पारनेर तहसीलदार यांनी 1 कोटी 10 लाख 44 हजार इतकी रॉयल्टी दंडापोटी आकारण्यात आली. मात्र दंडात्मक कारवाईनंतर प्रशासनाशी अर्थपूर्ण संबंध ठेवून फक्त 22 लाख इतकी रॉयल्टी रक्कम शासनाला भरण्यात आली आहे. यामध्ये शासनाची फसवणूक होऊन मोठ्या प्रमाणात शासनाचा महसूल बुडविण्यात आला असल्याचे निवेदनात म्हंटले आहे.
भाळवणी (ता. पारनेर) येथील या प्रकरणात दंड न भरणार्‍यावर महसूल अधिनियमन 1966 चे कलम 176 व 182 नुसार स्थावर जंगम मालमत्ता जप्त होण्याची मागणी करण्यात आलेली आहे. याप्रकरणी पाठपुरावा करुन देखील कारवाई होत नसल्याने संघटनेच्या वतीने 2 जानेवारी पासून जिल्हाधिकारी कार्यालयासमोर बेमुदत उपोषण करण्याचा इशारा देण्यात आला आहे.
