रिपाईची जिल्हा पोलीस अधीक्षकांकडे मागणी
मोर्चातून दोन समाजात तेढ निर्माण केली जात असल्याचा आरोप
अहमदनगर (प्रतिनिधी)- दोन समाजात तेढ निर्माण होऊन शहराची शांतता भंग होऊ नये, यासाठी शहरात बुधवारी (दि.14 डिसेंबर) हिंदुत्ववादी संघटनांच्या वतीने काढण्यात येणार्‍या मोर्चाची परवानगी नाकारण्याची मागणी रिपब्लिकन पार्टी ऑफ इंडियाच्या (गवई) वतीने जिल्हा पोलीस अधीक्षकांकडे निवेदनाद्वारे करण्यात आली आहे. निवेदनावर शहर जिल्हाध्यक्ष सुशांत म्हस्के, अल्पसंख्यांक आघाडीचे जिल्हाध्यक्ष गुलाम शेख, नईम शेख, हुसेन चौधरी, अजीम खान, विजय शिरसाठ, अभिजीत पंडित, निजाम शेख, जावेद सय्यद यांच्या स्वाक्षर्‍या आहेत.
बुधवारी शहरात काही हिंदुत्ववादी संघटनेच्या वतीने हिंदू जन आक्रोश नावाचा मोर्चा काढण्यात येत आहे. या मोर्चाच्या माध्यमातून जातीय तेढ निर्माण करणारे वक्तव्य होण्याची शक्यता आहे. हा मोर्चा शहरातून जात असताना काही अनुचित प्रकार घडल्यास याला जबाबदार कोण राहणार. 16 ते 18 वयोगटातील युवकांचे माते भडविवण्याचे काम करण्यात येत आहे. युवकांच्या डोक्यात जातीयवादी प्रवृत्ती भरली जात असल्याचा आरोप रिपाईच्या वतीने करण्यात आला आहे.
शहरात काही दिवसापासून जातीयवादाच्या छोट्या मोठ्या घटना घडत आहे. शहरात सर्वत्र पोस्टर लावण्यात आले असून, पोस्टरद्वारे बुरखाधारी महिला दाखवून एका समाजाला उद्देशून हा मोर्चा काढण्यात येत असल्याचे स्पष्ट करण्यात आले आहे. पोलीस प्रशासनाने देखील जातीय दंगल घडविण्याचा कट कोणी रचत नाही ना? याचा तपास करण्याची गरज असल्याचे निवेदनात म्हंटले आहे.
शहराची शांतता भंग होऊ नये, सर्व समाजात एकोपा कायम राहण्यासाठी अशा चुकीच्या प्रथांना बंदी घालण्यात यावी व काढण्यात येणारा मोर्चा थांबविण्यासाठी परवानगी नाकारण्याची मागणी रिपाईच्या वतीने करण्यात आली आहे.
