मुख्य लेखपाल कार्यालयाकडून चौकशी करण्याची अन्याय निवारण निर्मूलन सेवा समितीची मागणी
कामकाज संशयास्पद असल्याने माहिती देण्यास टाळाटाळ
अहमदनगर (प्रतिनिधी)- जनआंदोलनाने देशाला माहिती अधिकारचा कायदा देणारे ज्येष्ठ समाजसेवक अण्णा हजारे यांच्या पारनेर तालुक्यातील कार्यालया मध्ये माहिती अधिकार अर्जाची पायमल्ली होत असल्याचा आरोप करुन, या अर्जाच्या माहितीची मुख्य लेखपाल विभाग मुंबई कार्यालयाकडून चौकशी होऊन कार्यवाही होण्याची मागणी अन्याय निवारण निर्मूलन सेवा समितीचे जिल्हाध्यक्ष अरुण रोडे यांनी जिल्हाधिकारी यांच्याकडे निवेदनाद्वारे केली आहे.
पारनेर तालुक्यातील पंचायत समिती, तहसील कार्यालय व जिल्हा मराठा विद्या प्रसारक मंडळाच्या न्यू आर्टस कॉमर्स अ‍ॅण्ड सायन्स कॉलेज पारनेरच्या कार्यालयातील माहिती अधिकारात माहिती मागविण्यात आली होती. त्यानंतर 30 दिवस होऊनही माहिती अपिलात गेल्यानंतर अद्यापि माहिती मिळालेली नाही. संबंधित असणारे अपिलीय अधिकारी यांनी माहिती देण्यास टाळाटाळ केली असून, सदरची माहिती व्यापक दृष्टिकोनातून असल्यामुळे देत येत नाही. सदरची माहिती ही जनहिताच्या दृष्टिकोनातून असल्यामुळे देया येत नसल्याचे दिशाभूल करणारे उत्तरे देऊन माहिती देण्यास टाळाटाळ केली जात आहे. सदरची माहिती ही गैर कारभाराची असल्यामुळे माहिती देण्यास पारनेर तालुक्यातील अधिकारी टाळाटाळ करत असल्याचा आरोप संघटनेच्या वतीने करण्यात आला आहे.
सदरची माहिती ही त्या कार्यालयातील असून, फक्त त्यांच्या कार्यालयातील दप्तराची झेरॉक्स काढून द्यायची असते. तरी जाणीवपूर्वक माहिती अधिकार अर्जदारास दिशाभूल करून माहिती देण्यास टाळाटाळ करत आहे. कार्यालयीन कामकाज निरपेक्ष व स्वच्छ असल्यास त्यांना माहिती देण्यास काहीच हरकत नाही. परंतु सदरचे कामकाज संशयास्पद असल्याने माहिती देण्यास टाळाटाळ केली जात आहे. माहिती मिळण्यासाठी अपिलात जाऊन सुद्धा माहिती मिळालेली नाही. मागवलेली माहिती ही पारनेर तालुक्यातील सर्व जनतेच्या हितीची असल्याचे निवेदनात म्हंटले आहे.
माहिती अधिकार अर्जानुसार मुख्य लेखापाल विभाग मुंबई कार्यालय अंतर्गत समिती नेमून चौकशी करून त्या माहितीत अपहार निदर्शनास असल्यास चौकशी करून गुन्हे दाखल करण्याची मागणी अन्याय निवारण निर्मूलन सेवा समितीच्या वतीने करण्यात आली आहे. सदर माहिती न मिळाल्यास मुख्य लेखापाल विभाग मुंबई कार्यालया समोर उपोषण करण्याचा इशारा त्यांनी दिला आहे.
