राष्ट्रवादी सामाजिक न्याय विभागाचे जिल्हा उपाध्यक्ष ढवळे यांचे मुख्यमंत्र्यांना निवेदन
महसूलच्या अधिकार्‍यांच्या मनमानी कारभारामुळे शेतकर्‍यांवर आत्महत्येची वेळ -बाळासाहेब ढवळे
अहमदनगर (प्रतिनिधी)- महसूलच्या अधिकार्‍यांच्या मनमानी कारभारामुळे शेतकर्‍यांवर आत्महत्येची वेळ येत असल्याचा आरोप करुन राष्ट्रवादी सामाजिक न्याय विभागाचे जिल्हा उपाध्यक्ष बाळासाहेब ढवळे यांनी महसूल मंत्री यांच्या राजीनाम्याची मागणी केली. तर विभागीय आयुक्तांनी जिल्हाधिकारी यांना दिलेल्या आदेशाचे पालन न केल्यामुळे जिल्हाधिकारी यांच्या प्रतिमेचे दहन करण्याचा इशारा ढवळे यांनी दिला आहे.
देशाला स्वातंत्र्य मिळून 75 वर्ष होत असताना शेतकर्‍यांच्या आत्महत्या थांबलेल्या नाहीत. महसूलच्या अधिकार्‍यांच्या मनमानी कारभारामुळे अनेक शेतकर्‍यांनी मंत्रालयाच्या दारासमोर पेटवून घेतले, तर अनेकांनी आत्महत्या केल्या. तरी देखील महसूल विभागाच्या अधिकार्‍यांना शेतकर्‍यांविषयी कुठलीही सहानुभूती नाही. खारे कर्जुने (ता. नगर) येथील गट नंबर 125 44/12 न्यायलयीन वाद सुरु असतांना तहसीलदार यांनी मनमानी कारभार करून 17 जानेवारी 2020 रोजी गट नंबर 126 चे शेतकरी एकनाथ चिमाजी ढवळे व बाळासाहेब एकनाथ ढवळे यांच्यावर सरकारी कामात अडथळा आनल्याबद्दल खोटे गुन्हे दाखल केले. त्यासंदर्भात जिल्हाधिकारी यांना पुरावे दिले असतांना कुठलीच कार्यवाही झाली नाही. याबाबत नाशिक आयुक्त यांनी जिल्हाधिकारी यांना पत्र पाठवून शहानिशा करून अहवाल मागितला. मात्र आज पर्यंत कुठलाही अहवाल नाशिक आयुक्तांना पाठविण्यात आलेला नसल्याचे ढवळे यांनी निवेदनात म्हंटले आहे.
महसूल मंत्री यांचे शहरात संपर्क कार्यालय नसल्याने, त्यांना भेटण्यासाठी विखे पाटील हॉस्पिटलमध्ये त्यांच्या निवासस्थानी निवेदन देण्यासाठी गेल्यास त्यांच्या अंगरक्षकाने भेटण्यास मज्जाव केला. तर सदर ठिकाणी न भेटता औरंगाबाद येथील एका कार्यक्रमात भेटण्याचा अजब सल्ला दिला. स्वत:च्या जिल्ह्यातील शेतकर्‍यांना न्याय मिळत नसल्याने, महाराष्ट्रातील शेतकर्‍यांना न्याय कधी देणार? हा प्रश्‍न उपस्थित करुन ढवळे यांनी महसूल मंत्री यांच्या राजीनाम्याची मागणी केली आहे.