अधिकारी व कर्मचारी उपलब्ध होत नसल्याने सर्वसामान्यांचे कामे रखडली
अन्याय निवारण निर्मूलन सेवा समितीने वेधले जिल्हाधिकार्‍यांचे लक्ष
अहमदनगर (प्रतिनिधी)- पारनेर महसुल विभाग व तहसील कार्यालयात असलेल्या कर्मचार्‍यांच्या अपुर्‍या मनुष्यबळामुळे सर्वसामान्य नागरिकांच्या कामात दिरंगाई होत असून, त्यात महाराष्ट्र लोकसेवा आयोगाच्या परीक्षाकामी सदरचे मनुष्यबळ वापरण्यात आल्याने शेतकरी व विद्यार्थी वर्गाला आपल्या कामासाठी हेलपाटे मारावे लागत आहे. या प्रकरणाची त्वरीत दखल घेऊन पारनेर महसुल विभाग व तहसील कार्यालयात त्वरीत मनुष्यबळ वाढवावे, अन्यथा अपुर्‍या कर्मचार्‍यांवर सततच्या परीक्षाकामांसाठी नियुक्ती करण्यात येऊ नये, या मागणीचे निवेदन अन्याय निवारण निर्मूलन सेवा समितीचे जिल्हाध्यक्ष अरुण रोडे यांनी जिल्हाधिकारी यांना दिले आहे.
पारनेर तालुका क्षेत्रफळाच्या दृष्टीने अतिशय व्यापक आहे. ग्रामीण भागातील जनतेची जास्तीत जास्त कामे महसूल विभाग व पंचायत समिती विभागाशी निगडित असतात. गाव पातळीवरील तलाठी व ग्राम विकास अधिकारी यांची तुटपुंजी संख्या जवळपास प्रत्येक तलाठी कर्मचारी व ग्राम विकास अधिकारी यांच्याकडे असलेल्या अतिरिक्त कारभार तसेच तहसील व पंचायत समिती कार्यालयातील अपूर्ण मनुष्यबळामुळे सर्वसामान्य शेतकरी वर्ग भरडला जात आहे. शुल्लक कामासाठी सर्वसामान्य नागरिकांना विनाकारण सदर कार्यालयात हेलपाटे मारावे लागतात. त्यातच सद्यस्थितीत अवकाळी पावसामुळे किती नुकसान झाले? त्याचे पंचनामे करण्यात अपुर्‍या कर्मचारी वर्गामुळे अनेक अडचणी निर्माण होत आहे. शालेय विद्यार्थ्यांचे प्रवेश प्रक्रियेसाठी उत्पन्न व रहिवासी दाखले देखील मिळणे अवघड होऊन बसले असल्याचे निवेदनात म्हंटले आहे.
सध्या महाराष्ट्र लोकसेवा आयोगाचे परीक्षा कामासाठी सर्व मनुष्यबळ पारनेर तालुक्यातील महसूल विभाग व पंचायत समिती कार्यालयातील तसेच क्षेत्रीय कर्मचार्‍यांची नियुक्ती करण्यात आलेली आहे. आधीच तुटपुंजे कर्मचारी असताना, त्यात परीक्षेचे दोन ट्रेनिंग हे कामकाज कार्यालयीन वेळेत घेतल्यामुळे आठवड्यातील कामकाजाच्या पाच दिवसांपैकी तीन दिवस दोन्ही विभागाचे कर्मचारी जास्तीत जास्त संख्येने परीक्षेकामी अडकून पडलेले आहे. त्यामुळे सर्वसामान्य जनता, आपत्तीग्रस्त शेतकरी व शालेय विद्यार्थी भरडला जात असल्याचे संघटनेच्या वतीने स्पष्ट करण्यात आले आहे.
महाराष्ट्र लोकसेवा आयोग व इतर परीक्षांसाठी यापुढे केवल पारनेर तालुक्यातील महसुल विभाग व पंचायत समिती कार्यालयातील अधिकारी व कर्मचारी यांची नियुक्ती न करता इतर तालुक्यातील कर्मचारी अधिकारी यांची देखील नियुक्ती करण्याची मागणी देखील संघटनेच्या वतीने करण्यात आली आहे.
