मैत्रेय उपभोक्ता व अभिकर्ता असोसिएशनचे महात्मा गांधी यांच्या पुतळ्यासमोर धरणे
अहमदनगर (प्रतिनिधी)- मैत्री कंपनीतील गुंतवणूकदारांची रक्कम परत मिळण्याच्या मागणीसाठी मैत्रेय उपभोक्ता व अभिकर्ता असोसिएशनच्या वतीने महात्मा गांधी यांच्या पुतळ्यासमोर धरणे आंदोलन करण्यात आले. या आंदोलनात सतीश पाटील, रमेश तावरे, अशोक पाटील, गणेश चिलका, सचिन इंगळे, रेहाना खान, मच्छिंद्र निकम, कमल गीते, विनय कुलकर्णी, जितेंद्र शिनगर आदी उपस्थित होते.
महाराष्ट्रासह देशातील 2 कोटी 16 लाख ग्राहकांचे मैत्रीय सर्व्हिसेस प्रा.लि., मैत्रेय प्लॉटर्स अ‍ॅण्ड स्ट्रक्चरर्स, मैत्री रियल्टर अ‍ॅण्ड कन्स्ट्रक्शन, मैत्री सुवर्णसंधी या चार कंपन्यांमध्ये तब्बल 2600 कोटी रुपये अडकून आहेत. फेब्रुवारी 2016 पासून कंपनीवर गुन्हे दाखल होऊन कंपनी बंद झालेली आहे. याप्रकरणी तोफखाना पोलीस स्टेशन येथे गुन्हा दाखल करण्यात आलेला आहे. यामधील आरोपी संचालक लक्ष्मीकांत नार्वेकर, विजय तावरे या दोघांनाच आर्थिक गुन्हे शाखेने न्यायालयात हजर करून चार्जशीट दाखल केले. मुख्य आरोपी वर्षा मधुसूदन सत्पाळकर या फरार आहेत. तसेच जनार्दन परुळेकर हेही परभणी येथील कारागृहात आहे. या दोघांना अहमदनगर पोलिसांनी अटक केलेली नाही. मुख्य आरोपी फरार असल्याचे निवेदनात म्हंटले आहे.
कंपनीने 2016 पासून ग्राहकांचा परतावा देणे बंद केले आहे. यामुळे सर्व गुंतवणूकदार हवालदिल झाले असून, अनेकांनी आत्महत्या केलेल्या आहेत. शासन व प्रशासनाने गुंतवणूकदार, प्रतिनिधी यांना न्याय मिळण्यासाठी लवकरात लवकर पैशाचा परतावा कसा देता येईल यासाठी सहकार्य करून कारवाई करण्याची मागणी आंदोलकांनी केली.
कंपनीची संपूर्ण प्रॉपर्टी एमपीआयडी अ‍ॅक्टनुसार महाराष्ट्र शासनाने जप्त केलेली असून, ज्या प्रॉपर्टीची अडचण नसेल अशा प्रॉपर्टीची लवकरात लवकर विक्री करून ते पैसे शासनाने उघडलेल्या एस्क्रो खात्यात जमा करून ग्राहकांचा परतावा परत द्यावा, कंपनीच्या सीएमडी वर्षा सत्पालकर 45 दिवसानंतर नाशिक कोर्टाकडून जामिनावर सुटून आल्या असून, इतर गुन्ह्यांमध्ये फरार असताना त्यांना लवकरात लवकर अटक करावी, मैत्रीय प्रकरण लवकर निकाली काढण्यासाठी जलद गती न्यायालयात चालवावा, सरकारकडून एक चांगला कायदे तज्ञ सरकारी वकील नेमण्यात यावा, नेमलेले सक्षम अधिकारी व असोसिएशनच्या पदाधिकारी यांची तातडीने मंत्रालयात बैठक घेऊन प्रकरण निकाली काढण्यासाठी चर्चा व्हावी, या प्रकरणात विलंब होत असल्यास गुंतवणूकदार यांच्या परताव्यासाठी विशेष तरतूद करून परतावा द्यावा, मैत्रेय प्रतिनिधींवर ज्या ठिकाणी गैरसमजुतीतून गुन्हे दाखल आहेत मागे घेण्याची मागणी करण्यात आली. या मागणीचे निवेदन जिल्हाधिकारी यांना देण्यात आले.
