इलेक्ट्रिकल कॉन्ट्रॅक्टर्स असोसिएशनचे नवीन कार्यालय सज्ज; इलेक्ट्रिकल उद्योगासाठी ठरणार ‘हब’
नागरिकांना वीजेची सेवा मिळण्यासाठी विद्युत महावितरणच्या खांद्याला खांदा लावून इलेक्ट्रिकल कॉन्ट्रॅक्टर्सचे योगदान -आ.संग्राम जगताप
अहिल्यानगर (प्रतिनिधी)- इलेक्ट्रिकल कॉन्ट्रॅक्टर्स असोसिएशन ऑफ महाराष्ट्र (इकॅम) अहिल्यानगर विभागाच्या नूतन कार्यालयाचा शुभारंभ केडगाव लिंक रोड येथे दिमाखात पार पडले. आमदार संग्राम जगताप यांच्या हस्ते नवीन कार्यालयाचे उद्घाटन करण्यात आले.
या कार्यक्रमास विद्युत महावितरणचे अधीक्षक अभियंता रमेशकुमार पवार, इकॅम महाराष्ट्रचे अध्यक्ष उमेश रेखे, विद्युत महावितरणचे कार्यकारी अभियंता रमेश चव्हाण, अधिकारी लक्ष्मण काकडे, इकॅमचे खजिनदार रावसाहेब रकिबे, महासचिव देवांग ठाकुर, पश्‍चिम विभागाचे चेअरमन सचिन रणदिवे, पुणे विभागाचे अध्यक्ष अनिल महाजन, धुळे-नंदुरबार विभागाचे अध्यक्ष किरण पेंढारकर, ठाणे विभागाचे अध्यक्ष माधव गद्रे, इकॅम अहिल्यानगर विभागाचे अध्यक्ष अर्जुन ससे, सचिव श्रीकांत देवढे, माजी अध्यक्ष दत्ता झिंजुर्डे, उपाध्यक्ष राम गुंड, सहसचिव आदिनाथ म्हस्के, खजिनदार प्रतिक कांडेकर, बांधकाम समिती चेअरमन मनोहर शहाणे, पॉवर सप्लाय कमिटीचे चेअरमन अमित गरुड यांच्यासह विविध समित्यांचे पदाधिकारी आणि इलेक्ट्रिकल कॉन्ट्रॅक्टर्स मोठ्या संख्येने उपस्थित होते.
प्रास्ताविकात अध्यक्ष अर्जुन ससे यांनी संघटनेच्या प्रगतीची वाटचाल सांगून महत्त्वाचा खुलासा केला. सन 2019 मध्ये संघटनेने 11 गुंठे जागा विकत घेतली आणि त्या ठिकाणी आज आधुनिक व सुसज्ज कार्यालय उभे राहिले असल्याचे त्यांनी सांगितले. कॉन्ट्रॅक्टर्सच्या अडचणी सोडवून त्यांना दिशादर्शक नेतृत्व देणे, तांत्रिक मार्गदर्शन आणि उद्योगातील गुणवत्ता वृद्धी हे कार्य अखंड सुरू राहणार असल्याचे त्यांनी स्पष्ट केले.
आमदार संग्राम जगताप म्हणाले की, सर्वसामान्य नागरिकांना वीजेची सेवा मिळण्यासाठी विद्युत महावितरणच्या खांद्याला खांदा लावून इलेक्ट्रिकल कॉन्ट्रॅक्टर्स योगदान देत आहे. नव्या वास्तूत इकॅम अहिल्यानगर विभागाने पाऊल टाकले असून, हे त्यांच्यासाठी भरभराटीचे ठरणार असल्याचे त्यांनी सांगितले. तसेच आमदार काशीनाथ दाते यांनी देखील भेट देऊन इलेक्ट्रिकल कॉन्ट्रॅक्टर्स बांधवांना शुभेच्छा दिल्या.
अधीक्षक अभियंता रमेशकुमार पवार म्हणाले की, विद्युत महावितरणच्या विकासात इलेक्ट्रिकल कॉन्ट्रॅक्टर्सचा मोठा सहभाग आहे. महावितरणाच्या प्रत्येक कामात त्यांचे योगदान असते. नवीन कार्यालयासह भविष्यात भेटीगाठी व प्रशिक्षणासाठी प्रशस्त सभागृह उभारण्याचा प्रस्ताव त्यांनी सुचवला.“ही वास्तू विकासाची दिशा दाखवणारा पाया ठरेल,” असेही ते म्हणाले.
इकॅम महाराष्ट्रचे अध्यक्ष उमेश रेखे म्हणाले की, स्वतःच्या जागेवर उभे केलेले कार्यालय संघटनेला वेगळी ओळख देते. अनेक अडचणींतून मार्ग काढत ही वास्तू साकारलेली आहे. हे पाऊल संघटनात्मक विकासासाठी अत्यंत महत्त्वाचे असल्याचे त्यांनी सांगितले.
योगेश चव्हाण यांनी इलेक्ट्रिकल कॉन्ट्रॅक्टर्स एकोप्याने काम करत असून महावितरणसोबत प्रगतीत हातभार लावत असल्याचे सांगितले. लक्ष्मण काकडे यांनी प्रश्‍न चर्चेतून सोडवण्याची कॉन्ट्रॅक्टर्सची भूमिका कौतुकास्पद आहे. अडचणींवर मात करूनच प्रगतीचा मार्ग त्यांनी खुला केल्याचे स्पष्ट केले. सचिन रणदिवे म्हणाले की, राज्यात प्रत्येक जिल्ह्यात इकॅमचे कार्यालय असावे यासाठी प्रयत्न सुरू आहेत. अहिल्यानगर विभागाने राज्यातील सर्वांत मोठ्या जागेत कार्यालय उभारून आदर्श घातला आहे.
11 गुंठे जागेवर उभे राहिलेले हे नूतन कार्यालय आधुनिक, सुसज्ज आणि भविष्यातील गरजांनुसार तयार करण्यात आले आहे. इथे पुढील काळात इलेक्ट्रिकल व्यवसायाशी संबंधित तांत्रिक प्रशिक्षण, सभासदांमधील समन्वय, मार्गदर्शन सत्रे व उद्योगविकासाचे उपक्रम राबविण्यात येणार असल्याचे पदाधिकाऱ्यांनी सांगितले.
या कार्यक्रमास इकॅमचे संचालक गणेश ननावरे, गोकुळ व्यवहारे, संदीप लोढे, विवेक मुळे, सुबोध बोध, सागर तलवार, जितेंद्र तोरणे, विकास मोकाटे, सागर ढोले, महेश कुलकर्णी, राहुल सप्रे, संदीप डोळस, मनिष फुगे, रवी ढेरंगे, अनिल वाकचौरे, ज्ञानेश्‍वर चोभे, विजय कोळगे, गणेश परभणे, मयूर आरडे, अभिजीत शहाणे, अशोक वडे, निरंजन उदावंत आदी मान्यवर उपस्थित होते. कार्यक्रमाचे सूत्रसंचालन विजय साबळे व अमोल कोळपकर यांनी केले तर आभार दत्ता झिंजुर्डे यांनी मानले.