सेवा पंधरवड्यात प्रशासनाचा उपक्रम; ग्रामस्थांच्या उपस्थितीत रस्ता मोकळा

सेवा पंधरवड्यात प्रशासनाचा उपक्रम; ग्रामस्थांच्या उपस्थितीत रस्ता मोकळा

शेतरस्ते हे केवळ मार्ग नसून ते शेतकऱ्यांच्या जीवनवाहिन्या -प्रताप कळसे (मंडळाधिकारी)

अहिल्यानगर (प्रतिनिधी)- अहिल्यानगर (प्रतिनिधी)- नगर तालुक्यातील जखणगाव येथे छत्रपती शिवाजी महाराज महाराजस्व अभियानांतर्गत गट नंबर 55 मधील अनेक वर्षांपासून बंद असलेला शेतरस्ता अखेर खुला करण्यात आला आहे.

सदर शेतरस्त्यातील अडथळे जेसीबीच्या सहाय्याने हटवून शेत रस्ता खुला करण्यात आला. नेप्ती महसूल मंडळात एकुण तीन रस्ते खुले करण्यात आले आहेत अशी माहिती मंडळाधिकारी नेप्ती प्रताप कळसे यांनी दिली. जिल्हाधिकारी डॉ. पंकज आशिया यांच्या आदेशानुसार, छत्रपती शिवाजी महाराज महाराजस्व अभियानांतर्गत राष्ट्रनेता पंतप्रधान नरेंद्र मोदी यांचा जन्मदिन ते राष्ट्रपिता महात्मा गांधी यांची जयंती या कालावधीत सेवा पंधरवडा साजरा होत आहे. या उपक्रमाच्या अनुषंगाने हा शेतरस्ता अखेर खुला करण्यात आला.

या कामासाठी उपविभागीय अधिकारी सुधीर पाटील, तहसीलदार संजय शिंदे यांचे मार्गदर्शन लाभले. यावेळी मंडळाधिकारी नेप्ती प्रताप कळसे, ग्राम महसूल अधिकारी जखणगाव दिपाली विधाते, ग्राम महसूल अधिकारी हिंगणगाव दिपक झेंडे, सरपंच जखणगाव डॉ. सुनील गंधे, सरपंच हिंगणगाव पोपटराव ढगे, कृषी उत्पन्न बाजार समितीचे संचालक रामदास सोनवणे, उपसरपंच हिंगणगाव अशोक सोनवणे, जेष्ठ नागरिक दादाभाऊ सोनवणे, सुदाम सोनवणे, ॲड. संतोष कांडेकर यांच्यासह मोठ्या संख्येने ग्रामस्थ उपस्थित होते.

मंडळाधिकारी प्रताप कळसे म्हणाले की, आज आपण सर्वांनी एकत्रितपणे गावातील अनेक वर्षांपासून बंद असलेला शेतरस्ता खुला केला आहे, ही खरोखरच आनंदाची बाब आहे. नेप्ती या महसूल मंडळात एकूण तीन रस्ते खुले झाले याचा मला अभिमान वाटतो. शासनाचे आदेश आणि प्रशासनाचे मार्गदर्शन याबरोबरच ग्रामस्थांच्या एकजुटीमुळेच हे शक्य झाले आहे. शेतरस्ते हे केवळ मार्ग नसून ते शेतकऱ्यांच्या जीवनवाहिन्या आहेत. रस्ते बंद राहिल्याने शेतीला वाव मिळत नाही, उत्पादन बाजारापर्यंत पोहोचणे कठीण होते आणि विकासाला अडथळा निर्माण होतो. आज झालेल्या या उपक्रमामुळे शेतकऱ्यांना शेतीसाठी सोयीस्कर मार्ग उपलब्ध झाला असल्याचे त्यांनी सांगितले. तर या पुढेही गावोगाव असे उपक्रम राबवून शेतकऱ्यांच्या समस्या दूर करण्याचा आमचा प्रयत्न राहील, यासाठी ग्रामस्थांनी प्रशासनाला नेहमी सहकार्य करण्याचे त्यांनी आवाहन केले.

हा रस्ता खुला झाल्यामुळे परिसरातील शेतकऱ्यांना शेतीकामांसाठी ये-जा सुलभ झाली असून, कृषी विकासाला चालना मिळणार आहे. गावकऱ्यांनी प्रशासनाचे मनापासून आभार मानले.