जागतिक पाळीव प्राणी दिवसनिमित्त जिल्हा पशुवैद्यकीय सर्व चिकित्सालय व जायंट्स ग्रुपचा उपक्रम
मुक्या प्राण्यांना दया दाखविणे हे मनुष्याचे कर्तव्य -संजय गुगळे
नगर (प्रतिनिधी)- जागतिक पाळीव प्राणी दिवसनिमित्त शहरात जनावर व पशुंची निशुल्क तपासणी करुन त्यांना रोग प्रतिबंधक (ॲन्टी रेबीज), धनुर्वातचे लसीकरण करुन जंत प्रतिबंधक मोफत औषधे देण्यात आले. जिल्हा पशुवैद्यकीय सर्व चिकित्सालय व जायंट्स ग्रुप ऑफ अहिल्यानगर यांच्या संयुक्त विद्यमाने घेण्यात आलेल्या या शिबिराला शहरातील पशुपालकांचा उत्स्फूर्त सहभाग लाभला.
जुने बस स्थानक येथील जिल्हा पशु सर्व चिकित्सालय येथे पार पडलेल्या शिबिराप्रसंगी जायंट्स वेल्फेअर फाउंडेशनचे स्पेशल कमिटी सदस्य संजय गुगळे, जिल्हा पशुसंवर्धन उपायुक्त डॉ. सुनील तुंबारे, जि.प. जिल्हा पशुसंवर्धन अधिकारी डॉ. दशरथ दिघे, जिल्हा पशु सर्व चिकित्सालयाचे सहाय्यक आयुक्त डॉ. मुकुंद राजळे आदी उपस्थित होते.
संजय गुगळे म्हणाले की, पशुसेवा ही ईश्‍वरसेवा आहे. मुक्या प्राण्यांना दया दाखविणे हे मनुष्याचे कर्तव्य आहे. पशुपक्षी आपल्या भावना त्यांच्या वेगळ्या भाषेतून व्यक्त करतात. त्यांचे दुःख वेदना समजून पशुचिकित्सक त्यांच्यावर सर्व प्रकारचे उपचार करत आहे. जायंट्स ग्रुपच्या वतीने राबविण्यात येणाऱ्या विविध सामाजिक उपक्रमाची माहिती देवून, जनावरांसाठी सातत्याने मोफत आरोग्य तपासणी शिबिर घेतले जात असल्याचे सांगितले.
डॉ. सुनील तुंबारे यांनी प्राण्यांपासून निर्माण झालेल्या बहुतांश गंभीर आजारावर उपाय नाही. यासाठी पाळीव प्राण्यांच्या आरोग्याची देखील काळजी घेणे महत्त्वाचे आहे. जंगले नष्ट करुन वाढलेल्या शहरीकरणामुळे मानव आणि प्राण्यांमध्ये संघर्ष निर्माण होत आहे. मानव, पाळीव आणि वन्य प्राणी, वनस्पती आणि व्यापक वातावरण यांचे आरोग्य जवळून जोडलेले आणि एकमेकांवर अवलंबून आहे. ही घडी विस्कटली जात असताना मानवाला यामध्ये पुढाकार घेऊन समतोल साधण्याची गरज निर्माण झाली असल्याचे त्यांनी सांगितले.
या शिबिरात घोडे, कुत्रे, गाई, म्हशी, मांजर, शेळ्या आदी 110 पाळीव प्राण्यांची आरोग्य तपासणी करुन उपचार करण्यात आले. तसेच गरजेनुसार मोफत औषधही वितरीत करण्यात आले. शिबीरासाठी पशुधन विकास अधिकारी डॉ. वसंत गारुडकर, डॉ. ज्ञानेश्‍वर काळे, तुषार घुले, कार्तिक शिंगटे ,गणेश गव्हाणे, विशाल ढगे, गडाख, शुभम, गीते, जायंट्स ग्रुपचे अध्यक्ष राजेंद्र कटारिया, सचिव अमित मुनोत, अध्यक्ष पूजा पातुरकर, अजय मेडिकलचे दर्शन गुगळे, गोमटी चौधरी, अनुज चंगेडिया यांचे सहकार्य लाभले. पाळीव प्राण्यांसाठी घेण्यात आलेल्या आरोग्य शिबिरात अजय मेडिकलच्या वतीने पशुपालकांना मोफत औषध उपलब्ध करुन देण्यात आले होते.