सर्व जागा स्वबळावर लढविणार; अनेक इच्छुक उमेदवार संपर्कात
वाजिद शेख अहमदनगर (प्रतिनिधी)- बहुजन समाज पार्टी महाराष्ट्रातील लोकसभेच्या सर्व जागा स्वबळावर लढविणार आहे. लोकसभेच्या नगर दक्षिण व शिर्डी मतदार संघासाठी लवकरच उमेदवार जाहीर केले जाणार असून, त्यासाठी 5 एप्रिल रोजी शहरात मुलाखती घेतल्या जाणार आहेत. अनेक इच्छुक उमेदवार संपर्कात असून, काहींच्या भेटीगाठी देखील झालेले असताना आंबेडकरी विचाराने कार्य करणाऱ्याला उमेदवारी दिली जाणार असल्याचे सुतोवाच बहुजन समाज पार्टीचे प्रदेश महासचिव डॉ. हुलगेश चलवादी यांनी केले.
लोकसभा निवडणुकीच्या पार्श्वभूमीवर अहमदनगर जिल्ह्याच्या दौऱ्यावर आलेले प्रदेश महासचिव चलवादी व सुदीप गायकवाड यांनी जिल्ह्यातील पदाधिकारी व कार्यकर्त्यांची नगर शहरात बैठक घेवून त्यांची मते जाणून घेतली. तर निवडणुकीच्या दृष्टीकोनाने त्यांना पक्षाच्या आदेशाप्रमाणे निर्देश देण्यात आले. या बैठकीसाठी जिल्हा प्रभारी सुनील ओहोळ, राजू खरात, जिल्हाध्यक्ष उमाशंकर यादव, महिला जिल्हाध्यक्ष अनुरीता झगडे, जिल्हा उपाध्यक्ष विकास चव्हाण, जिल्हा महासचिव राजू शिंदे, जिल्हा कोषाध्यक्ष सूर्यभान गोरे, सुभाष साबळे, दत्तात्रय भोसले, त्रिपाठी सर, दत्ता सोनवणे, शिर्डी लोकसभा अध्यक्ष बाळासाहेब भोसले, विधानसभेचे प्रभारी महादेव त्रिभुवन, सुनील मगर, विठ्ठल म्हस्के, साहेबराव मनतोडे, सोहेल शेख, प्रकाश खरात, अजित पवार, मनीषा जाधव, गौतम चव्हाण, अमोल जाधव, संजय संसारे, जाकीर शहा, सुनील घोरपडे, विजय आढाव, मेहबूब पठाण, सचिन भालेराव, मच्छिंद्र ढोकणे, मोहसीन शेख, प्रवीण पोटे, सुनील पोटे, शिवराम भोसले, सुनिता कांबळे, किरण भोसले, कैलास कोळगे, सुभाष घोडके, महादेव ओहोळ, राहुल छत्तीसे आदींसह कार्यकर्ते मोठ्या संख्येने उपस्थित होते.
पुढे चलवादी म्हणाले की, संविधान वाचवण्याच्या दृष्टीकोनाने पक्षाचे प्रयत्न सुरू आहे. आंबेडकरी विचारांचा पुरस्कार करून बहन मायावती यांच्या नेतृत्वाखाली पक्ष वाटचाल करत असल्याचे त्यांनी स्पष्ट केले.
जिल्हाध्यक्ष उमाशंकर यादव यांनी लोकसभा निवडणुकीच्या दृष्टीकोनाने सक्षम करण्यात आलेल्या बुथ कमिट्या, गावोगावी जोडण्यात आलेले कार्यकर्ते व जिल्ह्यातील राजकीय परिस्थितीची माहिती दिली. सुदीप गायकवाड यांनी निवडणुकीला सामोरे जाताना प्रत्येक पदाधिकारी यांना पक्षाने दिलेली जबाबदारी प्रामाणिकपणे पूर्ण करण्याची सूचना केल्या. यावेळी शहानवाज शेख यांची जिल्हा उपाध्यक्षपदी नियुक्ती करण्यात आली. उपस्थित कार्यकर्त्यांनी विविध सूचना मांडून उपस्थित प्रमुख पदाधिकाऱ्यांशी चर्चा केली.