भावी पिढीच्या सदृढ आरोग्यासाठी आनंदऋषीजी हॉस्पिटलची भूमिका महत्त्वाची -संजय ताथेड
अहमदनगर (प्रतिनिधी)- आनंदऋषीजी हॉस्पिटलच्या अद्ययावत बालरोग विभागाच्या माध्यमातून नवजात बालकांची सेवा घडत आहे. भावी पिढीच्या सदृढ आरोग्यासाठी या हॉस्पिटलची भूमिका महत्त्वाची राहणार आहे. आनंदऋषीजी हॉस्पिटल मध्येच अद्यावत नवजात शिशु अतिदक्षता विभाग सर्व आरोग्य सुविधांनी सज्ज करण्यात आला आहे. जिल्ह्यासाठी हे वरदान ठरणार आहे. समाजाच्या शेवटच्या घटकापर्यंत आनंदऋषीजी हॉस्पिटलचे कार्य सुरू असून, सर्वसामान्यांमध्ये हॉस्पिटलने मोठा विश्‍वास निर्माण केला असल्याचे प्रतिपादन संजय ताथेड यांनी केले.
जैन सोशल फेडरेशनद्वारा संचलित आनंदऋषिजी हॉस्पिटल ॲण्ड मेडिकल रिसर्च सेंटर मध्ये स्व. रुपचंदजी ताथेड यांच्या स्मरणार्थ सौ. सुवर्णा ताथेड, संजय ताथेड, शैला ताथेड व परिवाराच्या वतीने आयोजित करण्यात आलेल्या मोफत बालरोग तपासणी शिबिराच्या उद्घाटनाप्रसंगी ताथेड बोलत होते. यावेळी चांदमल ताथेड, सुवर्णा ताथेड, संजय ताथेड, राजूभाऊ शेटीया, संतोष बोथरा, सतीश लोढा, मानकचंद कटारिया, प्रकाश छल्लाणी, सुभाष मुनोत, डॉ. आशिष भंडारी, बालरोग तज्ञ डॉ. श्रेयस सुरपुरे, डॉ. रुपेश सिकची, डॉ. सोनाली कणसे, डॉ. वैभवी वंजारे आदी उपस्थित होते.
प्रास्ताविकात संतोष बोथरा म्हणाले की, आनंदऋषीजी हॉस्पिटल मध्ये नवजात शिशु अतिदक्षता विभाग (एनआयसीयू) व बालरोग विभाग सर्व सुविधांनी सज्ज करण्यात आले आहे. हॉस्पिटलच्या एका छताखाली ज्येष्ठ व्यक्तींपासून बालकांसाठी सर्व आरोग्य सुविधा अल्पदरात उपलब्ध करुन देण्यात आल्या आहेत. आनंदऋषी हॉस्पिटल अहमदनगर जिल्ह्यासाठीच नव्हे तर बीड, पुणे जिल्ह्यातील नागरिकांसाठी आधार ठरत आहे. आरोग्य सेवेचे व्रत सर्वांचे सहयोग व सद्भावनेने सुरू आहे. पैसा महत्त्वाचा नसून, सेवा महत्त्वाची आहे. हॉस्पिटलच्या बालरोग विभागात 13 बेडचे एनआयसीयू सेंटर सुरु असून, ते 26 बेडचे करण्यात येणार आहे. महाराष्ट्रातील एक अद्यावत एनआयसीयू सेंटर या हॉस्पिटलच्या माध्यमातून उभे रहावे त्या दृष्टीने कार्य सुरू असल्याची माहिती त्यांनी दिली. तर ताथेड परिवाराच्या सामाजिक योगदानाचे कौतुक करुन हॉस्पिटलच्या सेवा कार्यात त्यांचे मोलाचे योगदान मिळत असल्याचे स्पष्ट केले.
राजूभाऊ शेटीया यांनी ताथेड परिवाराचे नेहमीच निस्वार्थपणे सामाजिक कार्य सुरु आहे. हॉस्पिटलच्या आरोग्य सेवेत मिळालेली संधी हे मोठे भाग्य असून, आरोग्य मंदिराच्या सेवेसाठी ताथेड परिवाराचे नेहमीच योगदान राहणार असल्याचे त्यांनी सांगितले.
डॉ. श्रेयस सुरपुरे म्हणाले की, मोठ्या शहराच्या धर्तीवर बालकांसाठीच्या आरोग्य सुविधा अहमदनगर शहरात आनंदऋषीजी हॉस्पिटलच्या माध्यमातून उपलब्ध करुन देण्यात आल्या आहेत. नुकतेच शिरूर येथून एक बालक सतत प्लेटलेट कमी होत असल्याने हॉस्पिटल मध्ये दाखल झाला होता. त्या बालकाला एक अत्यंत दुर्मिळ आजार असल्याचे निदान या हॉस्पिटलमध्ये करण्यात आले. हॉस्पिटलमध्ये उत्तम प्रकारे सेवा दिली जात असून, बालकांसाठी विशेष अद्यावत एनआयसीयू सेंटर कार्यान्वित आहे. त्यामध्ये देखील वेळोवेळी सुधारणा करण्याचे काम व्यवस्थापनाच्या माध्यमातून होत असल्याचे त्यांनी सांगितले.
या शिबिरात 108 बालकांची आरोग्य तपासणी करण्यात आली. दर शनिवारी बालकांची ओपीडीमध्ये आरोग्य तपासणी मोफत असून, सोमवार ते शुक्रवार 50 रुपयात तपासणी केली जात आहे. बालरोग विभागासाठी 13 बेडचे एन.आय.सी.यू. सेंटर व बालकांच्या उपचारासाठी अद्यावत यंत्रणा सज्ज आहे. नवजात बालकांच्या श्‍वासोच्छवासाच्या होणाऱ्या त्रासावर, बालदमा ए.आर.डी.एस. (श्‍वसनदाह), नवजात कावीळसाठी फोटोथेरपी व रक्त बदलण्याची सुविधा, अनुवंशिक आजार व जन्मजात आजारावर निदान, बालदमा तसेच लहान मुलांचे टु-डी इको, एक्स-रे आरोग्य सुविधा उपलब्ध आहे. तर चोवीस तास पॅथोलॉजी लॅब सेवेसाठी सज्ज आहे. महात्मा ज्योतीबा फुले जनआरोग्य योजने अंतर्गत बालकांच्या शस्त्रक्रिया मोफत केल्या जात आहे. कार्यक्रमाचे सूत्रसंचालन डॉ. आशिष भंडारी यांनी केले. आभार प्रकाश छल्लाणी यांनी मानले.