22 ऑक्टोंबरला राज्यस्तरीय वधु वर मेळाव्यात होणार वितरण
अहमदनगर (प्रतिनिधी)- जय युवा अकॅडमी, जनवार्ता, माळी महासंघ, श्री संत सावता माळी युवक संघ, फिनिक्स फाउंडेशन, समृद्धी महिला संस्था, रयत प्रतिष्ठानच्या वतीने सामाजिक क्षेत्रातील समाज भूषण पुरस्कार जाहीर करण्यात आले आहे. सामाजिक, शैक्षणिक व आरोग्य क्षेत्रात उल्लेखनीय कार्य करणारे व्याख्यात्या प्रा. स्वाती सुडके, कवियत्री विद्या भडके व सामाजिक कार्यकर्ते अशोक भालके यांना हा पुरस्कार जाहीर झाला आहे.
रविवारी (दि.22 ऑक्टोबरला) शहरात होणाऱ्या राज्यस्तरीय वधु-वर मेळाव्यात श्री संत सावता महाराज यांचे सतरावे वंशज ह.भ.प. दादा महाराज वसेकर व राज्य महिला आयोग अध्यक्षा रूपालीताई चाकणकर यांच्या हस्ते पुरस्काराचे वितरण होणार आहे.
सावित्रीबाई फुले पुणे विद्यापीठाच्या व्याख्यात्या प्रा. स्वाती सुडके हे युवक-युवतींना प्रबोधनात्मक व्याखानातून प्रेरित करत आहे. क्रांतीज्योती सावित्रीबाई फुले, आजच्या युवकांची दशा आणि दिशा, जीवन जगणे कला, स्त्री पुरुष समानता, छत्रपती शिवाजी महाराज व्यवस्थापन, शाहू फुले आंबेडकर यांच्या विचारावर आधारित व्याख्याने देऊन युवकांमध्ये जागृती करत आहे.
शेवगाव तालुक्यातील प्रसिध्द कवियत्री तथा शिक्षिका विद्या भडके यांनी उडे तुफान काळजात काव्यसंग्रहाचे लेखन केले आहे. त्याला पाच राष्ट्रीय पुरस्कार प्राप्त झाले आहेत. तर चांदा (ता. नेवासा) येथील जिल्हा परिषद आरोग्य विभागात कार्यरत असलेले व 155 वेळा रक्तदान करून रक्तदानाविषयी जनजागृती करणारे अशोक भालके यांची पुरस्कार निवड समितीने राज्यस्तरीय समाजभूषण पुरस्कारासाठी निवड केली आहे.
शहरातील टिळक रोड, लक्ष्मीनारायण मंगल कार्यालयात होणाऱ्या या राज्यस्तरीय वधु वर मेळाव्यास महाराष्ट्रभरातून प्रतिसाद मिळत असून, प्रथम वधू-वर, विधवा, घटस्फोटीत, विधूर, दिव्यांग, यांचे मोठ्या संख्येने परिचय पत्र आलेले आहे. या मेळाव्यासाठी गृहनिर्माण मंत्री अतुल सावे, माळी महासंघाचे राष्ट्रीय अध्यक्ष अविनाश ठाकरे, प्रदेशाध्यक्ष अरुण तिखे, भगवानराव फुलसौंदर, ॲड. अभय आगरकर, किशोर डागवाले, बाळासाहेब बोराटे, मंगलताई भुजबळ, शरद झोडगे, राम पानमळकर, धनंजय जाधव, दत्ता जाधव, प्रा. माणिक विधाते, गोरक्षनाथ ओहोळ, अनिल बोरुडे, सुवर्णाताई जाधव, अनिल झोडगे, धनंजय गाडेकर, संदीप दातरंगे आदींसह विविध समाजातील उद्योजक, लोकप्रतिनिधी उपस्थित राहणार आहेत.
या मेळाव्यात समाज बांधवांना उपस्थित राहण्याचे आवाहन मुख्य संयोजक पोपटराव बनकर, ॲड. महेश शिंदे, गणेश बनकर, नितीन डागवाले, जालिंदर बोरुडे, सचिन गुलदगड, शेखर होले, स्वाती डोमकावळे, विनायक नेवसे आदींनी केले आहे.