उद्यान फुलविण्यासाठी व उद्यानाच्या उभारणीसाठी योगदान देणाऱ्यांचा सन्मान; हरदिन मॉर्निंग ग्रुपचा उपक्रम
क्रीडांगणे ओस पडल्याने नवीन पिढीचे आरोग्य बिघडले -पद्मश्री पोपट पवार
अहमदनगर (प्रतिनिधी)- भिंगार येथे नागरिकांच्या आरोग्याच्या दृष्टीकोनाने व फिरण्यासाठी पंचवीस वर्षापूर्वी उभारण्यात आलेल्या व हिरवाईने नटलेल्या भगवान गौतम बुद्ध जॉगिंग पार्कचा रौप्य महोत्सवी वर्षाचा स्थापना दिवस हरदिन मॉर्निंग ग्रुपच्या वतीने आरोग्य व पर्यावरण संवर्धनाचा जागर करत उत्साहात साजरा करण्यात आला.
उद्यानाच्या रौप्य महोत्सवाची पहाट विविध कार्यक्रमांनी बहरली होती. अल्हाददायक वातावरणात उद्यानाच्या हिरवळीवर युवक-युवतींचा सुरु असलेला व्यायाम, ग्रुपच्या सदस्य व ज्येष्ठ नागरिकांचा योगा-प्राणायामनंतर निसर्गाच्या प्रसन्न वातावरणात रंगलेल्या हास्य योगात कार्यक्रमाचे प्रमुख पाहुणे असलेले पद्मश्री पोपट पवार व कॅन्टोमेंटचे मुख्य कार्यकारी अधिकारी विक्रांत मोरे सहभागी झाले होते. प्रमुख पाहुण्यांच्या हस्ते उद्यानातील भगवान गौतम बुद्ध यांच्या पुतळ्यास अभिवादन करण्यात आले. देशभक्तीच्या सुमधूर गीतांनी रंगलेल्या कार्यक्रमात आकाशात फुगे सोडण्यात आले. तर उद्यानात वृक्षरोपण करुन पर्यावरण संवर्धनाचा संदेश देण्यात आला. उद्यान फुलविण्यासाठी राबणारे व्यक्ती व 25 वर्षापूर्वी उद्यानाच्या उभारणीसाठी योगदान देणारे तत्कालीन कॅन्टोन्मेंट सदस्यांचा गौरवपूर्ण सत्कार करण्यात आला. यावेळी हरदिनचे संस्थापक अध्यक्ष संजय सपकाळ, स्वच्छता निरीक्षक रमेशराव साके, गणेश भोर, कॅन्टोन्मेंटचे माजी सदस्य सुरेश मेहतानी, उद्योजक लॉरेन्स स्वामी, महेश पतसंस्थेचे संस्थापक नंदकुमार झंवर उपस्थित होते.
प्रास्ताविकात संजय सपकाळ म्हणाले की, लष्कराच्या अधिकाऱ्यांशी पाठपुरावा करुन 1998 साली हे उद्यान उभे राहिले. या उद्यानात सर्व ग्रुपचे सदस्य जोडले गेले. ग्रुपच्या माध्यमातून पर्यावरण व आरोग्य चळवळ चालवली जात आहे. प्रत्येक सभासद आपला वाढदिवस वृक्षरोपणाने साजरा करुन वर्षभर त्या झाडाची काळजी घेत असतो. सदस्यांनी लावलेल्या झाडांमुळे उद्यान हिरवाईने फुलले आहे. याचबरोबर विविध क्षेत्रात कर्तृत्व सिध्द करणारे ग्रुपचे सदस्य व त्यांच्या पाल्यांचा देखील गौरव केला जातो. महापुरुषांची जयंती-पुण्यतिथी, राष्ट्रीय सण व विविध सामाजिक उपक्रम राबविण्यात येत आहे. सध्या ग्रुपच्या माध्यमातून वंचित घटकातील विद्यार्थ्यांच्या शिक्षणासाठी मदत दिली जात असल्याचे त्यांनी स्पष्ट करुन उद्यानाच्या स्थापनेच्या इतिहासाला उजाळा दिला.
पद्मशी पोपट पवार म्हणाले की, उद्यानाचा अमृतमहोत्सव साजरा करुन सातत्याने आरोग्य व पर्यावरण चळवळीत योगदान देणारे हरदिन मॉर्निंग ग्रुपचे उपक्रम दिशादर्शक आहे. क्रीडांगणे ओस पडल्याने नवीन पिढीचे आरोग्य बिघडले. मुलांना आर्थिक दृष्टया श्रीमंत होण्यासाठी पालकांची धडपड सुरु आहे, परंतु त्यांच्या आरोग्याकडे लक्ष दिले जात नाही. याचा दुष्परिणाम लहान वयातच अनेक गंभीर आजार दिसत आहे. मैदानात मुले येत नसल्याने खेळातून तणाव सहन करण्याची त्यांच्यातील क्षमता संपली आहे. तणावपूर्ण जीवनशैली रोगांना आमंत्रण ठरत आहे. मोठ्या प्रमाणात वृक्षरोड झाली. तापमान वाढले याचा दुष्परिणाम पर्यावरणावर झाला. यामुळे मनुष्याचे जीवनच धोक्यात आले आहे. सर्व धर्माचे तत्त्वज्ञान मानवतेच्या कल्याणासाठी असून, ता तत्वात निसर्गाला महत्त्व देण्यात आले आहे. निसर्गाचे संरक्षण हे सर्वात मोठे अध्यात्म आहे. मानवी कल्याणासाठी असलेली ही चळवळ धर्म, जात, पंथ विसरुन माणुसकीने पुढे घेवून जाण्याचे त्यांनी आवाहन केले.
कॅन्टोमेंटचे मुख्य कार्यकारी अधिकारी विक्रांत मोरे म्हणाले की, उद्यानाला जीवंतपणा आणण्याचे काम हरदिन मॉर्निंग ग्रुपने केले. ग्रुपचे सदस्य वृक्षरोपण व संवर्धनाचे कार्य उत्तमपणे करत आहे. सर्वांच्या योगदानाने उद्यान बहरले आहे. हे उद्यान शहरातील सर्वात मोठे उद्यान असून, सकाळ संध्याकाळ नागरिक निशुल्क याचा लाभ घेत आहे. या उद्यानाच्या विकासात ग्रुपचे महत्त्वाचे योगदान ठरले असल्याची भावना त्यांनी व्यक्त केली.
या कार्यक्रमात बबनराव वैरागळ, विशाल भामरे, गोरख पुंड, नेत्रदूत जालिंदर बोरुडे, मुकेश मुथीयान, सामाजिक कार्यकर्ते डॉ. उद्धव शिंदे, किशोर भगवाने, एमपीएससी परीक्षा उत्तीर्ण झालेले शुभम डपकर,पीएसआय झालेले प्रतिक भिंगारदिवे, ह.भ.प. अमित महाराज धाडगे, प्रसन्न पवार, कॅन्टोन्मेंट बोर्डचे सदस्य मीना मेहतानी, सचिन चोपडा, श्‍यामराव वागस्कर, ज्येष्ठ नागरिक संघाचे विठ्ठलराव लोखंडे यांचा सत्कार करण्यात आला. कार्यक्रमाचे सूत्रसंचालन एकनाथ जगताप व रमेश वराडे यांनी केले. सर्वेश सपकाळ व अभिजीत सपकाळ यांनी पाहुण्यांचे स्वागत केले. आभार मेजर दिलीप ठोकळ व दीपक बडदे यांनी मानले.