समाज बांधवांची एकजुट झाल्यास विकासाला चालना मिळते -आ. संग्राम जगताप
अहमदनगर (प्रतिनिधी)- समाज बांधवांची एकजुट झाल्यास विकासाला चालना मिळते. चर्मकार समाजाला एकजुट करुन व गरजू, आर्थिक दुर्बल कुटुंबाच्या पाठीशी उभे राहण्याचे कार्य चर्मकार विकास संघ व लोकनेते माजी आमदार सितारामजी घनदाट (मामा) सामाजिक प्रतिष्ठान करत आहे. समाजाच्या अडचणी समजून घेऊन ते सोडविण्यासाठी थेट मंत्रालयापर्यंत अधिकाऱ्यांशी चर्चा करण्यापर्यंतचे होत असलेले कार्य विकासाची नांदी ठरणार असल्याचे प्रतिपादन आमदार संग्राम जगताप यांनी केले.
चर्मकार विकास संघ व लोकनेते माजी आमदार सितारामजी घनदाट (मामा) सामाजिक प्रतिष्ठान यांच्या संयुक्त विद्यमाने चर्मकार समाजाचा मेळावा घेऊन समाजातील गुणवंत विद्यार्थी, विविध क्षेत्रात यश प्राप्त करणाऱ्या युवक-युवती व समाजबांधवांचा गुणगौरव करण्यात आला. याप्रसंगी आमदार जगताप बोलत होते. यावेळी अभ्युदय बँकेचे चेअरमन संदीप घनदाट, चर्मकार विकास संघाचे प्रदेशाध्यक्ष संजय खामकर, सार्वजनिक बांधकाम विभागाचे अधीक्षक अभियंता भरतकुमार बाविस्कर, उपविभागीय अधिकारी भूषण अहिरे, नगरसेवक डॉ. सागर बोरुडे, सुनिल त्र्यंबके, कवि सुभाष सोनवणे, ॲड. आदिनाथ बाचकर, रामदास सोनवणे, अरुण गाडेकर, महिला जिल्हाध्यक्षा रुख्मिणी नन्नवरे, संगिता वाकचौरे, दिनेश देवरे, अजय बोबडे, राजेंद्र धस, सुनिल धस, जिल्हाध्यक्ष संतोष कानडे, गोरख वाघमारे आदींसह समाजबांधव, महिला व युवावर्ग मोठ्या संख्येने उपस्थित होता.
पुढे बोलताना आमदार जगताप म्हणाले की, सामाजासाठी झोकून देवून कार्य सुरु असल्याने समाजात आशा व आश्‍वासकतेचे वातावरण निर्माण झाले आहे. उत्तम नेतृत्वाने संघटना पुढे जात असून, समाजातील छोट्या घटकांचा प्रश्‍न देखील तेवढ्याच पोटतिडकीने सोडविण्यात येत आहे. या सोहळ्याच्या माध्यमातून गुणवंत व समाजातील प्रतिभावंत व्यक्तींना प्रोत्साहन व प्रेरणा देण्याचे काम दरवर्षी केले जाते हे कौतुकास्पद असल्याचे त्यांनी सांगितले.
टिळक रोड येथील लक्ष्मीनारायण मंगल कार्यालयात झालेल्या मेळावा व गुणगौरव सोहळ्याचे प्रारंभ महापुरुषांना अभिवादन करुन करण्यात आले. उपस्थित पाहुण्यांच्या हस्ते विविध क्षेत्रातील गुणवंतांचा सन्मान करण्यात आला. शहरातील संत रविदास महाराज विकास केंद्रासाठी 50 लाख रुपयाचा निधी मंजूर केल्याबद्दल आमदार जगताप यांचा समाजाच्या वतीने विशेष सत्कार करण्यात आला.
संदीप घनदाट म्हणाले की, घनदाट प्रतिष्ठानच्या माध्यमातून मोठ्या प्रमाणात मदत देण्यात आली, मात्र या मदतीचे कोणतेही रेकॉर्ड ठेवण्यात आला नाही. समाजासाठी निस्वार्थपणे मदत केली जात आहे. चर्मकार विकास संघाशी एक वेगळी आपुलकी निर्माण झाली असून, संघटना न मागता समाजकार्य करत असल्याने त्यांना भरभरुन मदत दिली जात आहे. समाजाने देखील या कार्यात हातभार लावल्यास ही मदत प्रत्येक गरजूंच्या दारापर्यंत पोहचणार असल्याचे त्यांनी सांगितले. तर महिलांना देखील या समाजकार्यात सक्रीय केल्याबद्दल व मंत्रालयात झालेल्या समाजाच्या प्रश्‍नांवर उत्तपणे प्रश्‍न मांडून ते सोडविण्यासाठी प्रयत्न केल्याबद्दल त्यांनी विशेष कौतुक केले.
संजय खामकर म्हणाले की, संघटना व प्रतिष्ठानच्या माध्यमातून कोरोनात 60 लाख रुपयांचे किराणा वस्तू राज्यातील 15 हजार गरजू चर्मकार बांधवांपर्यंत पोहोचविण्यात आले. कोरोना काळात खरे-खोटे लोक समोर आले. समाजाने देखील काम करणाऱ्यांना ओळखले आहे. समाजाला एकसंघपणे जोडून व युवकांना प्रोत्साहन देवून विकासात्मक दिशेने वाटचाल सुरु असल्याचे त्यांनी स्पष्ट केले. भूषण अहिरे यांनी समाज छोटा असला तरी, एकमेकांना साथ दिल्यास समाजाचा विकास साधला जाणार आहे. समाज एक संघ राहिल्यास मोठी आव्हाने देखील पेळवता येणार असल्याचे त्यांनी सांगितले. भरतकुमार बाविस्कर यांनी युवक-युवतींना स्पर्धा परीक्षेबद्दल मार्गदर्शन केले. तर स्पर्धा परीक्षा मार्गदर्शन केंद्र उभारण्यासाठी सर्वपरीने सहकार्य करण्याचे आश्‍वासन दिले.
कार्यक्रमाचे सूत्रसंचालन संतोष कानडे यांनी केले. आभार प्रा. सुनिल धस यांनी मानले. हा मेळावा यशस्वी करण्यासाठी रामदास सातपुते, गणेश नन्नवरे, संदीप साळवे, गणेश हनवते, अमोल डोईफोडे, संतोष कंगणकर, निलेश आंबेडकर, रुपेश लोखंडे, मनिष कांबळे, किरण घनदाट, संतोष देवराय, अर्जुन कांबळे, संदीप डोळस, विनोद कांबळे, बाळासाहेब दळवी, मच्छिंद्र दळवी, बाळासाहेब कदम, अमोल डोळस, विकी कबाडे, निलेश झरेकर, सुरेखा देवरे, अण्णा खैरे, अतुल साळवे, संतोष कांबळे, किरण सोनवणे, संतोष खैरे, दिलीप कांबळे, विशाल पोटे, महेंद्र लोहकरे आदींनी परिश्रम घेतले.