नेहरु युवा केंद्र, श्री नवनाथ युवा मंडळ व नवनाथ विद्यालयाचा संयुक्त उपक्रम
गावात दीड हजार झाडे लावून ती जगविण्याचा संकल्प
अहमदनगर (प्रतिनिधी)- नेहरु युवा केंद्र, श्री नवनाथ युवा मंडळ व नवनाथ विद्यालयाच्या वतीने निमगाव वाघा (ता. नगर) येथे जागतिक पर्यावरण दिन वृक्षरोपणाने साजरा करण्यात आला. नेहरु युवा केंद्राच्या मिशन लाईफ अतंर्गत हा उपक्रम घेण्यात आला. तर संस्थेच्या माध्यमातून गावात दीड हजार झाडे लावून ती जगविण्याचा संकल्प करण्यात आला.
प्रारंभी ग्रामपंचायत सदस्य तथा डोंगरे संस्थेचे अध्यक्ष पै. नाना डोंगरे व भरत बोडखे यांच्या हस्ते वृक्षरोपण करुन नवनाथ विद्यालयाच्या परिसरात या अभियानाची सुरुवात करण्यात आली. यावेळी विद्यालयाचे प्रभारी मुख्याध्यापक उत्तम कांडेकर, प्रा. श्यामकुमार पवार, प्रा. संदीप पुरी, तुकाराम खळदकर, गणेश येणारे, युवा मंडळाचे अध्यक्ष पै. संदीप डोंगरे, सचिव प्रतिभा डोंगरे, नवनाथ जाधव, संतोष रोहोकले आदी उपस्थित होते.
पै. नाना डोंगरे म्हणाले की, पर्यावरणाचे गंभीर प्रश्‍नामुळे विनाशाकडे वाटचाल सुरु आहे. सजीव सृष्टीचा विनाश टाळण्यासाठी निसर्गाला शरण जाण्याची वेळ आली आहे. मनुष्याने स्वत:च्या हितासाठी निसर्गाची मोठी हानी केली. स्वत:चे हित साधण्यासाठी निसर्गाकडू ओरबडून घेतले. पर्यावरणाच्या प्रश्‍नामुळे सजीवृष्टीचे अस्तित्व धोक्यात आले असून, भविष्यातील धोके टाळण्यासाठी वृक्षरोपण व संवर्धन हा एकमेव पर्याय असल्याचे त्यांनी सांगितले.
भरत बोडखे यांनी सामाजिक भावनेने वृक्षरोपण करुन त्याचे संवर्धन होणे काळाची गरज बनली आहे. पर्यावरणाचे प्रश्‍न सोडविण्यासाठी नागरिकांनी कर्तव्य म्हणून या चळवळीत योगदान देण्याचे त्यांनी आवाहन केले. उत्तम कांडेकर यांनी दरवर्षी शाळेच्या आवारात लावण्यात आलेल्या झाडांमुळे सपूर्ण परिसर हिरवाईने नटला असून, याप्रकारे संपूर्ण गावात वृक्षरोपण झाल्यास हरित सुंदर गाव म्हणून सर्वांपुढे येणार आहे. यावेळी विविध प्रजातीचे झाडे लावण्यात आली. या उपक्रमास नेहरु युवा केंद्राचे उपनिदेशक शिवाजी खरात व रमेश गाडगे यांचे मार्गदर्शन लाभले.