• Mon. Dec 1st, 2025

फिरोदिया शिवाजीयन्स इंटर स्कूल फुटबॉल स्पर्धेत आठरे पाटील स्कूलने पटकाविले विजेतेपद

ByMirror

Aug 19, 2023

मुलींमध्ये आर्मी पब्लिक स्कूल संघ विजयी

शहरात फुटबॉलला चालना देण्यासाठी फिरोदिया शिवाजीयन्सने व्यासपीठ निर्माण केले -नरेंद्र फिरोदिया

वाजिद शेख अहमदनगर (प्रतिनिधी)- फिरोदिया शिवाजीयन्सच्या वतीने घेण्यात आलेल्या इंटर स्कूल फुटबॉल स्पर्धेत दमदार खेळ करुन आठरे पाटील स्कूलने 12, 14, 16 या तिन्ही वर्ष वयोगटातील मुलांच्या संघात विजेतेपद पटकाविले. आठरे पाटीलच्या विजयी खेळाडूंनी मैदानावर एकच जल्लोष केला. तर मुलींच्या संघात आर्मी पब्लिक स्कूलचा संघ विजयी ठरला.


अहमदनगर महाविद्यालयाच्या मैदानावर फुटबॉल स्पर्धेचे अंतिम सामने रंगले होते. विजयी, उपविजयी व तृतीय क्रमांक मिळवलेल्या संघास अहमदनगर जिल्हा फुटबॉल असोसिएशनचे अध्यक्ष तथा उद्योजक नरेंद्र फिरोदिया व फिरोदिया शिवाजीयन्स अकॅडमीचे अध्यक्ष मनोज वाळवेकर यांच्या हस्ते चषक व खेळाडूंना मेडल देण्यात आले. यावेळी अहमदनगर महाविद्यालयाचे उपप्राचार्य रज्जाक सय्यद, दिलीपकुमार भालसिंग, रजिस्टार दिपक आल्हाट, अनिल आठरे प्रमुख पाहुणे म्हणून उपस्थित होते. याचबरोबर पाहुण्यांच्या हस्ते विविध श्रेणीतील उत्कृष्ट खेळाडूंना वैयक्तिक बक्षिसं देण्यात आली.


नरेंद्र फिरोदिया म्हणाले की, शहरात फुटबॉल खेळ रुजत असून, अनेक चांगले खेळाडू पुढे येत आहे. शहरात फुटबॉल चळवळ रुजविण्याचे कार्य स्व. गॉडविन डीक यांनी केले. नवोदित खेळाडूंसाठी घेण्यात आलेली फुटबॉल स्पर्धा हीच त्यांना खरी श्रध्दांजली ठरली आहे. त्यांनी आयुष्यात शेवट पर्यंत खेळाडू घडविण्याचे कार्य केले. फुटबॉल खेळाला चालना देण्यासाठी नवोदित खेळाडूंना फिरोदिया शिवाजीयन्सने एक व्यासपीठ निर्माण करून दिले आहे. पुढील वर्षी देखील फिरोदिया शिवाजीयन्सच्या माध्यमातून भव्य-दिव्य शालेय फुटबॉल स्पर्धेचे नियोजन केले जाणार असल्याचे त्यांनी सांगितले.


उपप्राचार्य रज्जाक सय्यद म्हणाले की, फिरोदिया शिवाजीयन्सने फुटबॉल स्पर्धेतून शालेय विद्यार्थ्यांना चालना देण्याचे कार्य केले आहे. फुटबॉलसाठी शहरात एक चैतन्यदायी वातावरण निर्माण झाले आहे. मुलांमध्ये फुटबॉलची आवड निर्माण करण्याचे व उत्कृष्ट खेळाडू घडविण्याचे सुरु असलेले कार्य कौतुकास्पद असल्याचे त्यांनी सांगितले. मनोज वाळवेकर यांनी विजयी व उपविजयी संघांना शुभेच्छा दिल्या.


12 वर्ष वयोगटातील अंतिम सामना आठरे पाटील स्कूल विरुध्द ऑक्झिलियम कॉन्व्हेंट संघात झाला. यामध्ये 1-0 गोलने आठरे पाटीलचा संघ विजयी ठरला. तर तृतीय क्रमांकासाठी सेक्रेडहार्ट कॉन्व्हेंट स्कूल विरुध्द ओॲसिस संघात झालेल्या सामन्यात 4-1 गोलने सेक्रेडहार्ट कॉन्व्हेंट संघ विजयी झाला.
14 वर्ष वयोगटातील अंतिम सामना आर्मी पब्लिक स्कूल विरुध्द आठरे पाटील यांच्यात रंगला होता. यामध्ये 3-1 गोलने आठरे पाटील स्कूलने विजय संपादन केले. तिसऱ्या स्थानासाठी सेक्रेडहार्ट कॉन्व्हेंट विरुध्द ओॲसिस संघात झालेल्या सामन्यात सेक्रेडहार्ट कॉन्व्हेंट संघ विजयी झाला.
16 वर्ष वयोगटातील अंतिम सामना आर्मी पब्लिक स्कूल विरुध्द आठरे पाटील यांच्यात अत्यंत चुरशीचा झाला. पहिल्या हाफ मध्ये एकही गोल झाला नाही. दुसऱ्या हाफ मध्ये आठरे पाटीलने 1 गोल करुन आपला विजय निश्‍चित केला व शेवट पर्यंत बचावात्मक खेळ करुन विजय मिळवला. तिसऱ्या स्थानासाठी तक्षीला विरुध्द श्री साई इंग्लिश मिडीयम स्कूल संघात झालेल्या सामन्यामध्ये 4-0 गोलने श्री साईने एक हाती विजय मिळवला.
तर मुलींचा अंतिम सामना आर्मी पब्लिक स्कूल विरुध्द श्री साई इंग्लिश मिडीयम स्कूल मध्ये रंगला होता. यामध्ये 3-0 गोलने आर्मे स्कूलने विजय मिळवला.

या स्पर्धेत शहरातील 14 शाळांचे 35 शालेय संघांचा सहभाग होता. तर मुलींचे देखील फुटबॉल सामने खळविण्यात आले. स्पर्धा यशस्वी करण्यासाठी पल्लवी सैंदाणे, जेव्हिअर स्वामी, व्हिक्टर जोसेफ, रॉबीन आंग्रे यांनी परिश्रम घेतले. पंच म्हणून अभय साळवे, अभिषेक सोनवणे, अन्वर सय्यद, अरमान फकीर, हिमांशू थोरात, जॉय जोसेफ, प्रभू इफ्राहिम, राजेश चव्हाण, सलमान शेख, सुशिल लोट यांनी काम पाहिले.



फिरोदिया शिवाजीयन्स इंटर स्कूल फुटबॉल स्पर्धेत वैयक्तिक बक्षिस पटकावणारे खेळाडू पुढील प्रमाणे:-
अपकमिंग प्लेअर- आर्यन साइनी (ओॲसिस),
बेस्ट फॉरवर्ड- भानुदास चाँद (आठरे पाटील), अमर शेख (श्री साई), वेदांत बांगर (ऑक्झिलियम), गौरव आठरे (आठरे पाटील)
बेस्ट मिड फिल्डर- धैर्य कळमकर (आठरे पाटील), वंश फिरोदिया (तक्षिला), सोहेल खान (सेक्रेडहार्ट),
बेस्ट गोलकिपर- यदुंबर कोकर (आयकॉन), अरमान (आठरे पाटील), सार्थक घिगे (आर्मी स्कूल)
बेस्ट डिपेंडर- अथर्व फरताडे (आर्मी स्कूल), अभय थोरात (आठरे पाटील),

Leave a Reply

Your email address will not be published. Required fields are marked *