होम मिनिस्टरच्या खेळात लुटला विविध मनोरंजनात्मक स्पर्धेचा आनंद
संस्कार व ज्ञारुपाने कुटुंब प्रकाशमान करण्यासाठी वाण म्हणून दिव्यांचे वाटप
अहमदनगर (प्रतिनिधी)- शहराच्या नालेगाव, झारेकर गल्ली येथे जय तुळजा भवानी महिला बचत गटाचा हळदी-कुंकूचा कार्यक्रम उत्साहात पार पडला. महिलांच्या विविध स्पर्धेने होम मिनिस्टरचा कार्यक्रम रंगला होता. रंगलेला हा खेळ पैठणीचा कार्यक्रमात विविध स्पर्धेचा सामना करीत महिलांनी विविध खेळाचा आनंद लुटला. पैठणी व सोन्याची नथसह महिलांनी विविध बक्षिसे पटकाविली. या कार्यक्रमात परिसरातील महिला मोठ्या संख्येने सहभागी झाल्या होत्या.
लक्ष्मीबाई सोपानराव लोंढे यांच्या हस्ते भारत मातेचे पूजन करुन दीपप्रज्वलनाने कार्यक्रमाची सुरुवात झाली. बचत गटाच्या अध्यक्षा माधुरीताई सुभाष लोंढे यांच्या अध्यक्षतेखाली झालेल्या या कार्यक्रमाप्रसंगी शिवसेनेच्या महिला जिल्हाप्रमुख आशा निंबाळकर, सुषमा पडोळे, बचत गटाच्या सचिव नीलिमाताई येनगुपटला, वृषाली लोंढे, संगीता सब्बन, ममता शिंदे, उर्मिला नलगे, नागमणी संदूपटला, छाया नरसाळे, शितल दगडे, प्रमिला बिंगी, नीतू वाणे आदींसह परिसरातील महिला व बचत गटाच्या सदस्या मोठ्या संख्येने उपस्थित होत्या.
माधुरीताई लोंढे म्हणाल्या की, संस्कृतीचा वारसा महिलांमुळे जपला जात आहे. कार्यक्रमानिमित्त एकत्र येताना महिला विचारांचा जागर करत आहे. प्रत्येक महिलेमध्ये विविध सुप्त कलागुण असतात. पण संसाराच्या जबाबदार्‍या पेलविताना तिच्यामध्ये असलेले कलागुण कोमजतात. या हळदी कुंकूच्या कार्यक्रमात विविध स्पर्धेद्वारे महिलांचे कलागुण फुलविण्याचा प्रयत्न करण्यात आला. महिलांच्या कलागुणांना प्रोत्साहन देण्याचे व महिला सक्षमीकरणासाठी जय तुळजा भवानी महिला बचत गट कार्यकरत असल्याचे त्यांनी सांगितले.
आशा निंबाळकर म्हणाल्या की, धावपळीच्या व तंत्रज्ञानाच्या युगात एकमेकींशी संवाद संपला आहे. संवाद नसल्याने अनेक गैरसमजुती वाढून दुरावा निर्माण होत आहे. मात्र भारतीय संस्कृतीमधील सण-उत्सव एकमेकांना जोडण्याचे काम करतात. संक्रांत निमित्ताचे तिळगुळ समारंभ स्नेहभावाची जपवणूक करणारे असून, यातून ऋणानुबंध जोडले जात असल्याचे त्यांनी सांगितले.
समाजातील अंधकार दूर करण्यासाठी संस्कार व ज्ञारुपाने आपले कुटुंब प्रकाशमान करण्याचा संदेश देत महिलांना वाणच्या स्वरुपात देवघरातील दिवे देण्यात आले. महिला पारंपारिक वेशभुषा परिधान करुन या कार्यक्रमात सहभागी झाल्या होत्या. आर.जे. प्रसन्ना याने घेतलेल्या होम मिनिस्टरच्या खेळात महिलांनी विविध स्पर्धेत सहभाग नोंदवला. यामध्ये विविध खेळांचे फेर्‍या पार पडल्या. विविध स्पर्धेचे टप्पे पार करुन महिलांनी बक्षिसांची लयलुट केली.
यामध्ये विजेत्या ठरलेल्या प्रियंका मिसाळ होम मिनिस्टरच्या पैठणी बक्षिसाच्या मानकरी ठरल्या. तर द्वितीय बक्षिस कावेरी वाघ यांना चांदीचे जोडवे देण्यात आले. राष्ट्रगीताने कार्यक्रमाची सांगता झाली. सर्व महिलांनी एकत्रित स्नेहभोजनाचा आस्वाद घेतला.