आम आदमी पक्षातील युवा कार्यकर्त्यांचा सामाजिक उपक्रम
स्वावलंबी होण्यासाठी व समाजात सन्मानाने जगण्यासाठी शिक्षण आवश्यक -राजेंद्र कर्डिले
अहमदनगर (प्रतिनिधी)- आम आदमी पक्षाचे युवा कार्यकर्ते महेश घावटे व विक्रम क्षीरसागर यांच्या वतीने तपोवन रोड येथील बालघर प्रकल्पातील निराधार, वंचित व गरजू घटकातील विद्यार्थ्यांना थंडीनिमित्त ऊबदार कपड्यांचे वाटप करण्यात आले. यावेळी आम आदमी पार्टीचे शहर कार्याध्यक्ष भरत खाकाळ, शहराध्यक्ष राजेंद्र कर्डिले, कार्याध्यक्ष रिटायर्ड सुभेदार भरत खाकाळ, निता घावटे, प्रकाश फराटे, संतोष हारेर, गणेश थोरात, अनिल साठे, युवराज गुंड आदी पदाधिकारी उपस्थित होते.
शहराध्यक्ष राजेंद्र कर्डिले म्हणाले की, आम आदमी पक्षाची भूमिका ही वंचितांचे प्रश्‍न सोडविण्याची आहे. पक्षातील प्रत्येक पदाधिकारी व कार्यकर्ता सामाजिक भावनेने योगदान देत आहे. राजकारण बाजूला ठेऊन, समाजाचे देणे लागते या भावनेने गरजूंना मदत केली जात आहे. स्वावलंबी होण्यासाठी व समाजात सन्मानाने जगण्यासाठी शिक्षण आवश्यक असल्याचे त्यांनी सांगितले.
महेश घावटे म्हणाले की, महेश घावटे यांनी वंचित घटकातील मुलांसह वेळ घालविताना बालपणातील आठवणी ताज्या झाल्या. परिस्थिती कितीही हलाखीची असली तरी, शिक्षणाची कास सोडू नका. शिक्षणाने जीवनात बदल घडणार असल्याचे त्यांनी सांगितले.
विक्रम क्षीरसागर यांनी जीवनातील ध्येय निश्‍चित करुन त्या दिशेने वाटचाल करण्याचे मुलांना आवाहन केले. तर शिक्षणाने परिस्थितीवर मात करता येते. जिद्द व कष्टाने केलेल्या कामात यश मिळून स्वप्न साकारली जात असल्याचे त्यांनी सांगितले.
आपचे कार्याध्यक्ष रिटायर्ड सुभेदार भरत खाकाळ यांनी विद्यार्थ्यांना शिस्तीचे महत्व समजावून गुरुजन व ज्येष्ठांचा सन्मान करण्याचे सांगितले. विद्यार्थ्यांना मिष्टान्न भोजनाचे वाटप करुन कार्यक्रमाची सांगता झाली.
