थंडीच्या पार्श्‍वभूमीवर ना. शरद पवार यांच्या वाढदिवासानिमित्त राबविला सामाजिक उपक्रम
अहमदनगर (प्रतिनिधी)- शहरातील रयत शिक्षण संस्थेच्या लक्ष्मीबाई भाऊराव पाटील प्राथमिक शाळेच्या विद्यार्थ्यांनी खाऊच्या पैश्यातून जमा झालेल्या रकमेतून अनामप्रेम संस्थेतील अंध व दिव्यांग विद्यार्थ्यांना स्वेटरचे वाटप केले. वाढत्या थंडीच्या कडाक्याची जाणीव ठेऊन शालेय विद्यार्थी व यशवंतराव चव्हाण ग्राहक भांडार यांच्या संयुक्त विद्यमाने रयत शिक्षण संस्थेचे अध्यक्ष तथा माजी केंद्रीय कृषीमंत्री ना. शरद पवार यांच्या वाढदिवासानिमित्त हा सामाजिक उपक्रम राबविण्यात आला.
लक्ष्मीबाई भाऊराव पाटीलच्या शालेय विद्यार्थ्यांनी खाऊच्या पैश्यातून आर्थिक मदत जमा केली. यामध्ये यशवंतराव चव्हाण ग्राहक भांडारच्या वतीने अजून भर घालून तब्बल शंभर अंध व दिव्यांग विद्यार्थ्यांना शाळेच्या प्रांगणात स्वेटरचे वाटप करण्यात आले.
विद्यार्थ्यांना लहानपणापासूनच समाजातील गरजू घटकातील विद्यार्थ्यांना मदत करण्याची सवय लागावी व सामाजिक भावना त्यांच्यात वृध्दींगत करण्यासाठी मुख्याध्यापक शिवाजी लंके यांच्या संकल्पनेतून हा उपक्रम राबविला आला.
रयत शिक्षण संस्थेचे मॅनेजिंग कौन्सिल सदस्य दादाभाऊ कळमकर यांच्या अध्यक्षतेखाली झालेल्या कार्यक्रमाप्रसंगी जनरल बॉडी सदस्य ज्ञानदेव पांडूळे, अर्जुनराव पोकळे, ग्राहक भांडारचे संचालक प्रकाश कराळे, संस्थेचे विभागीय अधिकारी तुकाराम कन्हेरकर, माध्यमिकचे मुख्याध्यापक एस.एल. ठुबे, प्राथमिकचे मुख्याध्यापक शिवाजी लंके, अनामप्रेम संस्थेचे अभय रायकवाड, राजू भगत, अमृत भुसारी, दिपक माळी आदींसह शालेय शिक्षक व शिक्षकेतर कर्मचारी उपस्थित होते.
दादाभाऊ कळमकर म्हणाले की, गरजू घटकांची कुणीतरी जबाबदारी घेतल्यास समाजातील प्रश्‍न सुटणार आहे. लहान वयातच विद्यार्थ्यांमध्ये मदत करण्याची भावना वृध्दींगत होण्यासाठी घेण्यात आलेला उपक्रम कौतुकास्पद असल्याचे त्यांनी सांगितले. ग्राहक भांडारच्या माध्यमातून गरजू विद्यार्थ्यांना नेहमीच मदत केली जात असल्याची माहिती त्यांनी दिली. तर समाजाला दिशा देण्याचे कार्य करणार्‍या महापुरुषांबद्दल भाजपचे मंत्री चंद्रकांत पाटील यांनी केलेल्या वक्तव्याचा निषेध नोंदवला.
अर्जुन पोकळे म्हणाले की, किती व कोणती मदत केली? यापेक्षा त्यामागची भावना महत्त्वाची आहे. विद्यार्थ्यांनी खाऊच्या पैश्यातून केलेली मदत प्रेरणा देणारी असल्याचे त्यांनी सांगितले. ना. शरद पवार सर्वच क्षेत्रात आघाडीवर असून, सर्व क्षेत्राचा अभ्यास त्यामध्ये असलेले कार्याने त्यांचे बहुआयामी व्यक्तिमत्त्व महाराष्ट्राच्या राजकारणात प्रभावी ठरत आहे. बहुजन समाजाला बरोबर घेऊन चालणारा या नेत्याने महाराष्ट्राला एक दिशा दिली असल्याचे त्यांनी सांगितले.
प्रकाश कराळे यांनी अशा सामाजिक उपक्रमास नेहमीच ग्राहक भांडारच्या माध्यमातून सहकार्य राहणार असल्याचे आश्‍वासन दिले. कार्यक्रमाचे सूत्रसंचालन प्रदीप पालवे यांनी केले. आभार सुजाता दोमल यांनी मानले. विद्यार्थ्यांनी आपल्या हातांनी शाळेत पाहुणे म्हणून आलेल्या अंध व दिव्यांग विद्यार्थ्यांना स्वेटरची भेट देऊन त्यांना अल्पोपहाराचे वाटप केले.
