संविधान जागर रॅलीने वेधले लक्ष
चित्रकला, पोस्टर, गीतगायन व प्रश्‍नमंजुषेत विद्यार्थ्यांचा उत्स्फूर्त सहभाग
अहिल्यानगर (प्रतिनिधी)- पद्मशाली विद्या प्रसारक मंडळ संचालित श्री मार्कंडेय माध्यमिक व उच्च माध्यमिक विद्यालयात संविधान दिन उत्साहात साजरा करण्यात आला. संविधान दिनानिमित्त शाळेत विविध स्पर्धांचे आयोजन करण्यात आले होते. तसेच विद्यार्थ्यांनी काढलेल्या संविधान जागर रॅलीने परिसरातील नागरिकांचे लक्ष वेधले.
संविधान दिनाचे औचित्य साधून विद्यालयात चित्रकला व पोस्टर मेकिंग स्पर्धा, प्रश्‍नमंजुषा स्पर्धा, गीतगायन स्पर्धा उत्साहात पार पडली. या सर्व स्पर्धांमध्ये विद्यार्थ्यांनी उत्साहाने सहभाग नोंदवला आणि स्पर्धा अत्यंत यशस्वीरीत्या पार पडल्या. विद्यार्थ्यांनी स्वातंत्र्य, न्याय, समता, बंधुता, भारतीय संविधान आणि डॉ. बाबासाहेब आंबेडकर यांच्या विचारांचे समर्पक दर्शन त्यांच्या कलाकृतीतून घडवले.
विद्यार्थ्यांनी हातात संविधानाशी संबंधित घोषवाक्य असलेले लहान आकर्षक फलक घेतले होते. “संविधान आमचा अभिमान”, “अधिकारांसोबत कर्तव्यही पाळूया”, “लोकशाहीचा सन्मान करूया” अशा घोषणांनी परिसर दुमदुमला. रॅली शिस्तबद्ध पद्धतीने काढण्यात आली, तर विद्यार्थ्यांनी संविधानाचा जागर केला.
पद्मशाली विद्या प्रसारक मंडळाचे अध्यक्ष तसेच भारतीय जनसंसदेचे अशोक सब्बन यांनी संविधानाची उद्दिष्टे, रचना, महत्त्व आणि नागरिक म्हणून विद्यार्थ्यांची जबाबदारी याविषयी सोप्या भाषेत मार्गदर्शन केले व संविधानाची पार्श्‍वभूमी विद्यार्थ्यांना समजावली. “भारतीय संविधान हे जगातील सर्वात मोठे आणि सक्षम संविधान असून विद्यार्थ्यांनी त्यातील मूल्ये अंगीकारणे गरजेचे असल्याचे ते म्हणाले.
विद्यालयातील शिक्षिका रेणुका खरदास मॅडम यांनी संविधान तयार होण्याची पार्श्‍वभूमी, मसुदा समितीचे कार्य, डॉ. बाबासाहेब आंबेडकरांचे योगदान आणि नागरिकांना मिळणारे अधिकार व कर्तव्ये याची सविस्तर माहिती विद्यार्थ्यांना दिली.
या कार्यक्रमाप्रसंगी मुख्याध्यापक संदिप छिंदम, उपमुख्याध्यापक पांडुरंग गोने, पर्यवेक्षक प्रमोद चन्ना, शिक्षक प्रतिनिधी अर्चना साळुंके, शिक्षकेतर प्रतिनिधी सुहास बोडके, कविता गुडेवार, कल्याणी म्याना, जनाबाई कराळे, मनीषा राठोड, पवन गालपेल्ली, उत्तम लांडगे, तानाजी काळूगे, सेवक मथुरा आढाव, अजय न्यालपेल्ली, निलेश आनंदास आदी मान्यवर उपस्थित होते.