केंद्र सरकारच्या कामगार विरोधी धोरणांचा निषेध
सार्वजनिक क्षेत्राचे खाजगीकरण थांबवावे व जुने 44 कायदे पुन्हा लागू करण्याची मागणी
नगर (प्रतिनिधी)- केंद्र सरकारच्या खासगीकरणाच्या आणि कामगार कायद्यांच्या विरोधात देशातील कामगार संघटनांनी बुधवारी (दि. 9 जुलै) भारत बंद पाळला. यामध्ये बीएसएनएल कर्मचाऱ्यांच्या विविध मागण्यांसाठी बीएसएनएल एम्प्लॉईज युनियन व एनएफटीई एकत्रितपणे या संपात सहभागी झाले होते. अहिल्यानगर शहरातील बीएसएनएलच्या कार्यालया समोर जोरदार निदर्शने करुन बीएसएनएल कर्मचाऱ्यांनी केंद्र सरकारच्या कामगार विरोधी धोरणांचा निषेध नोंदवला.
या आंदोलनात कॉ. आप्पासाहेब गागरे, बीएसएनएल युनियनचे सचिव कॉ. विजय शीपणकर, एनएफटीईचे अशोक हिंगे, शंकर चेडे, संतोष शिंदे, चंद्रकला नवले, शिला झेंडे, डी.एम. चक्रनारायण, सुनील ससाणे, संतोष भोसले, प्रशांत अष्टेकर, गौरी बडवे, संगीता सोनवणे, आयशा शेख, यशोदा शिंदे, सागर सोनवणे, अशोक पाखरे, अशोक हजारे, लालाजी शेख, राजू कोकरे, शिवाजी मोढवे, दिलीप कोल्हे, लूथर गायकवाड, रमेश शिंदे, बाळासाहेब गाडळकर आदी सहभागी झाले होते.
यावेळी कॉ. आप्पासाहेब गागरे, कॉ. विजय शीपणकर व एनएफटीईचे अशोक हिंगे यांनी उपस्थितांना मार्गदर्शन करुन हा संप निर्णायक संघर्षासाठी सरकारला इशारा असून, तातडीने प्रश्‍न न सुटल्यास तीव्र आंदोलन करण्याचा इशारा दिला. देशभरातील लाखो कामगार, कर्मचारी व सार्वजनिक क्षेत्रातील सहकारी रस्त्यावर उतरले आहेत. ही केवळ एक संप नाही तर सरकारच्या कामगार विरोधी सार्वजनिक क्षेत्र विरोधी आणि जनविरोधी धोरणाविरुद्धचा आक्रोश असल्याचे स्पष्ट करण्यात आले.
बीएसएनएल भारताच्या जनतेच्या सेवेसाठी समर्पित एक स्वदेशी संस्था आहे. ही संस्था गंभीर संकटातून जात असून, याकडे सरकारचे दुर्लक्ष करुन खाजगीकरणाचे धोरण स्विकारुन कॉर्पोरेट घराण्यांना फायदा पोहोचवण्याचे काम केले जात असल्याने बीएसएनएल सारख्या संस्थेच्या मुळावरच घाव टाकला जात असल्याचा आरोप आंदोलकांनी केला. सरकार श्रम कायदे रद्द करून भांडवलदारांच्या बाजूने नवीन कायदे लादत आहेत. त्यामुळे केवळ संघटित कामगार नाही, तर असंघटित क्षेत्रातील कोट्यावधी कामगार देशोधडीस लागणार आहे. बीएसएनएल कर्मचारी बीएसएनएल एम्प्लॉईज युनियन व एनएफटीई यांच्या संघर्षात खांद्याला खांदा लावून उभे असल्याची भूमिका यावेळी मांडण्यात आली.
बीएसएनएलसह सर्व सार्वजनिक क्षेत्राचे खाजगीकरण थांबवावे, सर्व कर्मचाऱ्यांना वेतन सुधारणाचा प्रश्‍न त्वरित निकाली काढून वेळेवर वेतन व भत्ते द्यावे, बीएसएनएलला कमकुवत न करता सुविधा देण्यासाठी आधार द्यावा, चांगल्या दर्जाची फोरजी, फाईव्हजी सेवा त्वरीत सुरु करावी, तृतीय व चतुर्थ श्रेणी कर्मचाऱ्यांसाठी नवीन पदोन्नती धोरण लागू करावे, मनुष्यबळाचे पूर्ण रचनेचा आढावा घेऊन तृतीय व चतुर्थ श्रेणी कर्मचाऱ्यांसाठीच्या पुरेशा जागा भराव्या, कंत्राटी कामगारांना नियमानुसार आणि वेळेवर त्यांच्या पगार द्यावा, सर्वांना खात्यामध्ये कायम करावे, ट्रेड युनियनच्या जुने 44 कायदे पुन्हा लागू करावे आणि ट्रेड युनियन यांच्या हक्कांवर हल्ले थांबविण्याची मागणी करण्यात आली आहे.