आई महालक्ष्मी संमेलनात पुरस्काराने होणार सामाजिक कार्याचा गौरव
नगर (प्रतिनिधी)- येथील सामाजिक कार्यकर्ते विजय भालसिंग यांना सामाजिक, धार्मिक व पर्यावरण क्षेत्रात सुरु असलेल्या निस्वार्थ कार्याबद्दल ग्रेट महाराष्ट्र गौरव पुरस्कार जाहीर करण्यात आला आहे. कोल्हापूर येथे रविवार दि. 29 डिसेंबर रोजी होणाऱ्या आई महालक्ष्मी संमेलनात चित्रपट अभिनेते संजय खापरे व उद्योजिका पूनम मोरे यांच्या हस्ते भालसिंग यांना पुरस्काराने सन्मानित केले जाणार असल्याची माहिती संमेलनाचे स्वागत अध्यक्ष व निमंत्रक प्रा.डॉ. बी.एन. खरात, स्वप्नपूर्ती फाउंडेशनचे डॉ. मोहन गोखले यांनी दिली.
समृद्धी प्रकाशन, स्वप्नपूर्ती फाउंडेशन, जिद्द फाउंडेशन, वेद फाउंडेशन, स्वामी इंटरप्राईजेसच्या संयुक्त विद्यमाने शाहू स्मारक भवन, दसरा चौक येथे आई महालक्ष्मी संमेलन कोल्हापूर 2024 चे आयोजन करण्यात आले आहे. या सोहळ्यात विविध क्षेत्रात पुरोगामी विचाराने निस्वार्थ कार्य करणाऱ्यांचा सन्मान होणार आहे.
सामाजिक, शैक्षणिक, धार्मिक, निसर्ग व पर्यावरण क्षेत्रात विजय भालसिंग गेल्या दोन दशकापासून योगदान देत आहे. मुळगाव वाळकी (ता. नगर) येथील असलेले भालसिंग एसटी बॅकेची नोकरी सांभाळून निस्वार्थपणे कार्यरत असून, कोणत्याही प्रकारचे शासकीय अनुदान व वर्गणी न घेता स्वखर्चातून सामाजिक कार्य करत आहे. वृक्षरोपण व संवर्धनासाठी ते सातत्याने योगदान देत आहे. उन्हाळ्यात पशु-पक्ष्यांना जगणे सुसह्य व्हावे म्हणून पाणवठे तयार करुन पाणी उपलब्ध करणे, विविध परिसरात पक्ष्यांसाठी झाडांवर धान्य व पाण्याची भांडी बसविणे, सर्वत्र वाढत चाललेल्या सिमेंटच्या जंगलामुळे पशु-पक्ष्यांचे अस्तित्व राहण्यासाठी नारळाच्या साली पासून कृत्रिमरीत्या पक्ष्यांसाठी बनवलेले घरटी बसविणे आदी निसर्ग व पर्यावरणपुरक उपक्रम ते सातत्याने राबवित आहे.
त्यांच्या या सामाजिक कार्याची दखल घेऊन त्यांना कोल्हापूर येथील मानाचा ग्रेट महाराष्ट्र गौरव पुरस्कार जाहीर करण्यात आला आहे. सदर पुरस्कार जाहीर झाल्याबद्दल भालसिंग यांचे सर्वत्र अभिनंदन होत आहे