बहुजन समाजाला सहभागी होण्याचे आवाहन
2024 चा निवडणूक डोळ्यासमोर ठेवून धार्मिक ध्रुवीकरण व नागरिकांच्या डोळ्यात धूळफेक -भगवानराव गायकवाड
अहमदनगर (प्रतिनिधी)- स्वातंत्र्याच्या 75 वर्षानंतरही बहुजनांच्या सामाजिक, शैक्षणिक तथा आर्थिक समस्यांचे निराकरण झालेले नाही. उलट त्या समस्या गंभीर बनत चालल्या असून, देशाच्या विकासाच्या नावाखाली फक्त भांडवलदार वर्गाचा विकास होत आहे. 2024 चा निवडणूक डोळ्यासमोर ठेवून राबविण्यात येणारे अजेंडे, धार्मिक ध्रुवीकरण व नागरिकांच्या डोळ्यात सुरु असलेली धूळफेकबद्दल नागरिकांना बामसेफच्या माध्यमातून जागृत करण्यात येत असल्याचे प्रतिपादन बामसेफचे सीईसी सदस्य भगवानराव गायकवाड यांनी केले.
बामसेफचे 37 वे महाराष्ट्र राज्य अधिवेशन रविवारी (दि.27 ऑगस्ट) शहरातील टिळक रोड येथील माऊली सांस्कृतिक भवन येथे होणार असून, या अधिवेशनाच्या पार्श्‍वभूमीवर झालेल्या बैठकीत गायकवाड बोलत होते. यावेळी कास्ट्राईबचे राज्याध्यक्ष एन.एम. पवळे, डॉ. दत्तात्रय जगताप, अधिवेशनचे मुख्य संयोजक राजेंद्र करंदीकर, प्रा. दशरथ शिंदे, विद्यार्थी मोर्चाचे जिल्हाध्यक्ष सौरव बोरुडे, सुदीप पडवळ, शामराव काते आदी उपस्थित होते.
एन.एम. पवळे यांनी सरकारी, निमसरकारी व सेवानिवृत्त कर्मचारींचे प्रश्‍न गंभीर बनत चालले आहे. केंद्र सरकार कामगार विरोधी धोरण राबवित असल्याने कामगार वर्गामध्ये मोठा असंतोष असल्याचे त्यांनी स्पष्ट केले. तर अधिवेशन यशस्वी होण्यासाठी सर्वपरीने प्रयत्न केले जाणार असल्याचे सांगितले. अधिवेशनचे मुख्य संयोजक राजेंद्र करंदीकर यांनी अधिवेशनाची तयारी अंतिम टप्प्यात असून, बहुजन समाजाने मोठ्या संख्येने सहभागी होण्याचे त्यांनी आवाहन केले.
रविवारी सकाळी 11 वाजता वरिष्ठ प्रबंधक पतन योजना व विकास विभागाचे इंजि. आर.आर. गायकवाड यांच्या हस्ते उद्घाटन होणार आहे. तर बामसेफचे राष्ट्रीय अध्यक्ष कमलाकांत काळे यांच्या अध्यक्षतेखाली हे अधिवेशन संपन्न होत आहे.
या अधिवेशनात शासक जातीद्वारा अनुसूचित जाती, जमाती, भटके, विमुक्त तथा बारा बुलतेदार यांच्यावरील वाढते जाती अत्याचार, मूलनिवासी बहुजन समाजाला त्यांच्या संविधानिक हक्क-अधिकारापासून वंचित करून कायमस्वरूपी गुलामीत ठेवण्याचे षडयंत्र, हिंदू कोड बिल हे युनिफॉर्म सिव्हिल कोडची पहिली पायरी, हिंदू-मुस्लिम यांचे धार्मिक ध्रुवीकरण करून ओबीसी, एसटी यांचा 2024 लोकसभेच्या निवडणुकीसाठी उपयोग करणे तर दुपारच्या सत्रात स्वातंत्र्याच्या अमृतमहोत्सवात मूलनिवासी बहुजन समाजाची दशा आणि दिशा, नवीन शैक्षणिक धोरणाच्या माध्यमातून शिक्षणाचे बाजरीकरण, जुनी पेन्शन योजना लागू न करणे, कंत्राटी पद्धतीने नोकर भरती करून संविधानिक आरक्षण नष्ट करणे आदी प्रमुख विषयावर प्रमुख वक्ते मार्गदर्शन करणार आहेत.