शहरात झालेल्या बैठकित एकमताने निर्णय
अहमदनगर (प्रतिनिधी)- जिल्ह्यातील राज्य परिवहन निवृत्त कर्मचार्यांची महत्त्वाच्या विषयावर सोमवारी (दि.21 फेब्रुवारी) शहरातील टिळक रोड येथील मधुकर कात्रे सभागृहात बैठक पार पडली. राज्य परिवहन सेवा निवृत्त कर्मचारी संघटनेचे सचिव गोरख बेळगे यांच्या अध्यक्षतेखाली पार पडलेल्या बैठकीस संघटनेचे अध्यक्ष बलभिम कुबडे यांची प्रमुख उपस्थिती होती. या बैठकित सन 1996 ते 2000 दरम्यान कामगार करारातील कपात केलेले 5 टक्के निधी परत मिळण्याबाबत न्यायालयात जाण्याचा एकमताने निर्णय घेण्यात आला.
या बैठकित संघटनेच्या आतापर्यंतच्या कामकाजाबाबत व सेवानिवृत्त कर्मचार्यांचे प्रश्नांची सोडवणूक करण्याबाबत केलेल्या कार्याची सुरु असलेल्या पाठपुराव्याची माहिती देण्यात आली. प्रास्ताविकात संघटनेचे कार्याध्यक्ष अर्जुन बकरे यांनी कामगार संघटनेने 1996 ते 2000 जो करार केला, त्यामध्ये फरकाची रक्कम मधून 5 टक्के रक्कम कपात करून घेतली. ती रक्कम परत मिळण्याबाबत सुरु असलेली कार्यवाहीची सविस्तर माहिती दिली.
गोरख बेळगे म्हणाले की, सेवानिवृत्त कर्मचार्यांच्या न्याय हक्कासाठी संघर्ष सुरु आहे. सन 1996 ते 2000 दरम्यान कामगार करारातील कपात केलेले पाच टक्के निधी परत मिळण्यासाठी संघटनेच्या वतीने वैयक्तिक न्यायालयात दावा दाखल केला जाणार असल्याचे स्पष्ट केले. या निर्णयाला उपस्थित सर्व सेवा निवृत्त एस.टी. कर्मचार्यांनी सहमती दर्शवली.
बलभिम कुबडे यांनी सन 1996 ते 2000 च्या कामगार करारातील मिळालेल्या एकूण रकमेतून पाच टक्के कपात केलेली मान्यताप्राप्त संघटनेकडून निधी परत मिळवण्यासाठी प्रत्येकाचा वैयक्तिक अर्ज भरून घेतला जाणार आहे. ऑक्टोबर 1999 ते नोव्हेंबर 1999 मध्ये पाच टक्के कपात केलेली एकूण रक्कम किती? व आज रोजी मिळणारी व्याजासह रक्कम किती? अशी माहिती संबंधित युनिट कडून प्राप्त करून घेण्यासाठी प्रत्येकाचा माहिती अधिकार फॉर्म भरून घेण्यात येणार आहे. या सोबतच मे 2019 पासून सेवानिवृत्तीच्या थकीत रकमेबाबत संघटना वरिष्ठस्तरावर पाठपुरावा करणार असल्याचे सांगितले. तर कोरोनामुळे विस्कळीत झालेली राज्य परिवहन महामंडळाची सेवा सुरळीत सुरु झाल्यावर जिल्ह्यातील सर्व आगारांना पदाधिकारी भेट देणार असून, राहिलेल्या सेवानिवृत्त कर्मचारी यांनी फॉर्म त्वरित सादर करण्याचे आवाहन त्यांनी केले. यावेळी खजिनदार विठ्ठल देवकर, अॅड. साहेबराव चौधरी यांनी उपस्थितांना मार्गदर्शन केले. या बैठकीसाठी जिल्ह्यातील एस.टी. महामंडळाचे सेवानिवृत्त कर्मचारी उपस्थित होते.