नेहरु युवा केंद्र, श्री नवनाथ युवा मंडळ व नवनाथ विद्यालयाचा संयुक्त उपक्रम
विद्यार्थी, युवक-युवती, ग्रामस्थांनी केली योगासने
अहमदनगर (प्रतिनिधी)- निमगाव वाघा (ता. नगर) येथे नेहरु युवा केंद्र, श्री नवनाथ युवा मंडळ व नवनाथ विद्यालयाच्या संयुक्त विद्यमाने आंतरराष्ट्रीय योग दिवस साजरा करण्यात आला. नवनाथ विद्यालयाच्या मैदानावर शालेय विद्यार्थ्यांना योगाचे धडे प्रात्यक्षिकासह देण्यात आले. योग दिनाच्या कार्यक्रमात विद्यार्थी, युवक-युवती, ग्रामस्थ, शिक्षक व शिक्षकेतर कर्मचारी मोठ्या संख्येने सहभागी झाले होते.
या योग शिबीरात डॉ. सुनिल गंधे, उत्पादन शुल्क निरीक्षक गोपाळ चांदेकर व उद्योजक बाळासाहेब शहाणे यांनी उपस्थितांना योग व प्राणायमाचे धडे दिले. विविध आसन प्रात्यक्षिकासह करुन, त्याचे महत्त्व विशद केले. तर योग, प्राणायम व ध्यान धारणेबद्दल माहिती देवून निरोगी जीवनासाठी योग व प्राणायाम करण्याचे त्यांनी आवाहन केले. तसेच विद्यार्थ्यांना सकस आहाराबद्दल मार्गदर्शन करण्यात आले.
यावेळी डोंगरे संस्थेचे अध्यक्ष तथा ग्रामपंचायत सदस्य पै. नाना डोंगरे, प्र. मुख्याध्यापक उत्तम कांडेकर, ज्येष्ठ शिक्षक निळकंठ वाघमारे, क्रीडा शिक्षक चंद्रकांत पवार, सारिका चांदेकर, मंदा साळवे, सुवर्णा जाधव, तृप्ती वाघमारे, मयुरी जाधव, अमोल वाबळे, तेजस केदारी, युवा मंडळाचे अध्यक्ष संदीप डोंगरे, सचिव प्रतिभा डोंगरे, लहानू जाधव, प्रियंका डोंगरे-ठाणगे आदी उपस्थित होते.
पै.नाना डोंगरे यांनी निरोगी जीवनासाठी योग व प्राणायाम महत्त्वाचा आहे. गावाचे आरोग्य उत्तम राहण्यासाठी प्रत्येकाने व्यायाम व योग करण्याची गरज आहे. भारताने संपूर्ण जगाला योगची देणगी दिली असून, योगाने सक्षम सदृढ पिढी निर्माण होणार असल्याचे त्यांनी सांगितले. या उपक्रमासाठी नेहरु युवा केंद्राचे जिल्हा उपनिदेशक शिवाजी खरात, रमेश गाडगे यांचे मार्गदर्शन लाभले.