जन्मदिनानिमित्त शाहू-फुले-आंबेडकर-साठे-कलाम सामाजिक विचार मंच व उषा सामाजिक संस्थेचा उपक्रम;
‘माणसाची सेवा हीच खरी ईश्वरसेवा’ -सुनिल सकट
अहिल्यानगर (प्रतिनिधी)- गरजू, दुःखी आणि आजारी व्यक्तींच्या सेवेसाठी आपले संपूर्ण जीवन समर्पित करणाऱ्या संत मदर टेरेसा यांच्या जन्मदिनानिमित्त बुथ हॉस्पिटल, अहिल्यानगर येथे रुग्णांची अहोरात्र सेवा करणाऱ्या डॉक्टर, रुग्णसेविका आणि परिचारिकांचा पुष्पगुच्छ देऊन सन्मान करण्यात आला. रुग्णसेवेच्या माध्यमातून मानवतेची सेवा करणाऱ्या आरोग्य कर्मचाऱ्यांप्रती कृतज्ञता व्यक्त करण्यासाठी शाहू-फुले-आंबेडकर-साठे-कलाम सामाजिक विचार मंच आणि उषा सामाजिक संस्थेच्या वतीने हा उपक्रम राबविण्यात आला.
कोरोना महामारीच्या काळात बुथ हॉस्पिटलने रुग्णसेवेत महत्त्वपूर्ण योगदान देत अनेक रुग्णांना उपचार देऊन जीवदान देण्याचे कार्य केले. या रुग्णालयातील डॉक्टर, परिचारिका आणि रुग्णसेविका निःस्वार्थ भावनेने रुग्णांची सेवा करीत आहेत. त्यांच्या या समर्पित कार्याचा गौरव करण्याच्या उद्देशाने मदर टेरेसा यांच्या जन्मदिनाचे औचित्य साधून हा विशेष सन्मान सोहळा आयोजित करण्यात आला. मदर टेरेसा यांनी आपले संपूर्ण आयुष्य समाजातील गरजू, दुःखी, निराधार आणि आजारी व्यक्तींच्या सेवेसाठी वाहून घेतले. त्यांच्या मानवतावादी कार्यातून प्रेरणा घेत रुग्णांची सेवा करणाऱ्या डॉक्टर, परिचारिका आणि रुग्णसेविकांप्रती कृतज्ञता व्यक्त करण्यासाठी हा उपक्रम घेण्यात आल्याचे आयोजकांनी सांगितले.
यावेळी संस्थेचे अध्यक्ष अशोक शिंदे म्हणाले की, रुग्णांची सेवा ही केवळ नोकरी किंवा कर्तव्य नसून ती मानवतेची सेवा आहे. एखाद्या गरजू व्यक्तीच्या वेदना कमी करण्यासाठी आपण सातत्याने काम केले, तर त्यातून खऱ्या अर्थाने मानवसेवा घडते. सेवा सातत्यपूर्ण आणि निःस्वार्थ भावनेने केली, तर त्यातच जीवनाचे खरे समाधान मिळते आणि देवाची सेवा केल्याचे पुण्यही प्राप्त होते. मदर टेरेसा यांनी संपूर्ण जगाला मानवसेवेचा हाच मार्ग दाखवून दिल्याचे त्यांनी सांगितले.
कोरोना महामारीच्या काळात आरोग्य क्षेत्रासमोर अभूतपूर्व आव्हान निर्माण झाले होते. अशा कठीण परिस्थितीत बुथ हॉस्पिटलमधील डॉक्टर, परिचारिका आणि रुग्णसेविकांनी रुग्णांच्या सेवेसाठी अहोरात्र योगदान दिले. स्वतःच्या आरोग्याची पर्वा न करता रुग्णांची काळजी घेणाऱ्या आरोग्य कर्मचाऱ्यांच्या या सेवाभावाचे यावेळी विशेष कौतुक करण्यात आले. रुग्णालयात दाखल असलेल्या रुग्णांना केवळ वैद्यकीय उपचारच नव्हे, तर मानसिक आधार आणि आपुलकीची वागणूक देणेही महत्त्वाचे असते. या दृष्टिकोनातून बुथ हॉस्पिटलमधील कर्मचारी सातत्याने काम करीत असल्याचे उपस्थितांनी नमूद केले.
महाराष्ट्र शासनाचा साहित्यरत्न लोकशाहिर डॉ. अण्णा भाऊ साठे पुरस्कार प्राप्त समाजसेवक डॉ. सुनील सकट यांची कार्यक्रमाला विशेष उपस्थिती होती. त्यांनी ‘माणसाची सेवा हीच खरी ईश्वरसेवा’ असल्याचे स्पष्ट केले. बुथ हॉस्पिटलमधील डॉक्टर, परिचारिका आणि रुग्णसेविकांच्या कार्याचे कौतुक केले. रुग्णांच्या सेवेत कार्यरत असलेल्या प्रत्येक व्यक्तीच्या सेवाभावाला शुभेच्छा देत मानवसेवेचे हे कार्य असेच सुरू राहावे, अशी अपेक्षा व्यक्त केली.
या उपक्रमातून रुग्णसेवकांच्या कार्याचा गौरव करण्याबरोबरच समाजात मानवतेचा संदेश देण्यात आला. आजारपण, वेदना आणि संकटाच्या काळात रुग्णांच्या पाठीशी उभे राहणारे डॉक्टर, परिचारिका आणि रुग्णसेविका हे आरोग्य व्यवस्थेतील महत्त्वाचे आधारस्तंभ आहेत. त्यांच्या समर्पित सेवेला सलाम म्हणून हा उपक्रम राबविण्यात आल्याचे आयोजकांनी सांगितले.
यावेळी बुथ हॉस्पिटलचे प्रशासक मेजर सुरेश चोपडे, सहाय्यक प्रशासक मेजर हेलन चोपडे, डॉक्टर शितल शिंदे, मेजर बाबासाहेब थोरात, मेजर भारती थोरात, परिचारिका मुख्याध्यापिका मलिका साबळे, सोनिया थोरात, निकिता केदारी, अमोल देशमुख, सुनीता पारखे, समाजसेवक अमित पठारे, निर्मला वाघमारे, वैद्यकीय सोशल प्रवीण साबळे आदी उपस्थित होते.