जास्तीत-जास्त वेळ पोहण्याचा विक्रम करण्याच्या तयारीत
अहमदनगर (प्रतिनिधी)- नुकत्याच झालेल्या जिल्हास्तरीय दिव्यांगांसाठीच्या क्रीडा स्पर्धेत जलतरण प्रकारात दिव्यांग खेळाडू अभिजीत जगन्नाथ माने याने याही वर्षी प्रथम येण्याचा बहुमान पटकावित, विजयाचा षटकार मारला. जिल्हा समाज कल्याण कार्यालय, जिल्हा परिषद व संग्राम संस्था संगमनेर यांच्या संयुक्त विद्यमाने जागतिक अपंग दिनानिमीत्ताने या स्पर्धेचे आयोजन करण्यात आले होते.
सलग सहाव्यांदा जलतरण स्पर्धेत विजयी होण्याचा बहुमान पटकाविणारा अभिजीत माने व त्याला प्रशिक्षण देणारे त्याचे वडिल जगन्नाथ माने या पिता-पुत्रांचा जिल्हा समाज कल्याण अधिकारी राधाकीसन देवढे व प्रदेश युवक काँग्रेसचे अध्यक्ष सत्यजीत तांबे यांच्या बक्षिस देऊन सन्मानित करण्यात आले.
यावेळी समाज कल्याणचे अधिकारी दिनकर नाठे, राणी प्रसाद मुंदडा, डॉ. अरविंद रसाळ, सूर्यकांत शिंदे, डॉ. नामदेवराव गुंजाळ, राजाभाऊ सोमानी, मुख्याध्यापक सुनिल कवडे, खेमनर आदी उपस्थित होते.
अभिजीतने यापूर्वी देखील जिल्हास्तरीय स्पर्धेसह राज्यस्तरीय स्पर्धेत यश मिळवले आहे.
काही वर्षांपूर्वी अभिजीतच्या मातोश्रीचे अल्पशा आजाराने निधन झाल्याने त्याला मोठा मानसिक धक्का बसला होता. मात्र त्याने दु:खातून सावरुन जलतरण स्पर्धेसाठी सराव सुरु ठेवला आहे. त्याचे वडिल जगन्नाथ माने त्याचे पालन-पोषण करुन त्याला पोहण्यासाठी मार्गदर्शन देखील करतात. त्यांच्या मार्गदर्शनाखाली तो एकाच वेळेस न थकता जास्तीत-जास्त वेळ पोहण्याचा सराव करीत आहे. त्याने अत्तापर्यंत सलग 13 तास पाण्यात राहण्याची नोंद केली असून, एक वेगळा विक्रम नावावर करण्यासाठी त्याची तयारी सुरु असल्याची माहिती जगन्नाथ माने यांनी दिली.
अभिजीत हा स्वर्गीय क्रीडा मार्गदर्शक रामदास ढमाले यांच्या मार्गदर्शनाखाली घडला असून, त्याला रावसाहेब बाबर यांचे देखील मार्गदर्शन लाभत आहे. या स्पर्धेत तो ज्योत्सना उद्योग केंद्र कार्यशाळेच्या वतीने उतरला होता. या उत्कृष्ट कामगिरीबद्दल जिल्हा समाज कल्याण अधिकारी देवढे व प्रदेश युवक काँग्रेसचे अध्यक्ष तांबे यांनी अभिजीतचे विशेष कौतुक केले. मुख्याध्यापक सुनिल कवडे, चांगदेव खेमनर आदींसह शालेय शिक्षक व शिक्षकेतर कर्मचार्‍यांनी त्याचे अभिनंदन केले असून, सर्वत्र त्याचे अभिनंदन होत आहे.
