• Mon. Dec 1st, 2025

ख्रिसमसनिमित्त जेएसएस गुरुकुल स्कूलमध्ये अवतरले सांताक्लॉज

ByMirror

Dec 24, 2022

चिमुकल्या सांताक्लॉजचे विद्यार्थ्यांना गिफ्ट्स व चॉकलेटचे वाटप

अहमदनगर (प्रतिनिधी)- ख्रिसमस नाताळच्या निमित्ताने शहरात उत्साहपूर्ण व चैतन्याचे वातावरण असताना केडगाव येथील जेएसएस गुरुकुल स्कूलमध्ये सांताक्लॉजच्या वेशभुषेत बालगोपाळ अवतरले. या चिमुकल्या सांताक्लॉजनी शाळेतील विद्यार्थ्यांना गिफ्ट्स व चॉकलेटचे वाटप केले.


बच्चेकंपनीला गिफ्ट्स देत आनंद वाटणारा आणि सर्वांनाच हवाहवासा वाटणार्‍या चिमुकल्या सांताक्लॉजचे शाळेत आगमन होताच विद्यार्थ्यांची धमाल रंगली होती. विद्यार्थ्यांना सर्व धर्म व संस्कृतीची माहिती होण्यासाठी व इतर धर्माचा आदर निर्माण करण्याच्या उद्देशाने विविध सण-उत्सव शाळेत साजरे केले जातात. ख्रिसमसनिमित्त शालेय विद्यार्थ्यांनी भूषणनगर येथील चर्च ऑफ द नॅझरीनला भेट दिली.

यावेळी त्यांना येशू ख्रिस्ताच्या जन्माविषयीची माहिती चित्रफितद्वारे दाखवण्यात आली. चिमुकल्या सांताक्लॉजना पाहण्यासाठी आणि त्यांच्यासोबत सेल्फी काढण्यासाठी बच्चेकंपनी आणि मोठ्यांचीही गर्दी झाली होती.


स्कूलचे प्राचार्य आनंद कटारिया म्हणाले की, नाताळचे औचित्य लक्षात घेऊन विद्यार्थ्यांसाठी हा उपक्रम राबविण्यात आला. विविध धर्माचे व संस्कृतीचे पुस्तकी ज्ञान त्यांना प्रत्यक्षात अनुभवण्यासाठी शाळेत विविध उपक्रम राबविण्यात येतात. चिमुकल्या सांताक्लॉजसह विद्यार्थ्यांनी चर्चला भेट देऊन प्रभू येशू व ख्रिस्त धर्माविषयी माहिती जाणून घेतली. या कार्यक्रमासाठी चर्चचे धर्मगुरू रेव्ह. अद्वैत एस. हिडदुगीकर, प्रफुल्लता, अभिज्ञ ए. हिडदुगीकर, अमित मकासरे आदींसह शालेय शिक्षक व विद्यार्थी मोठ्या संख्येने उपस्थित होते.

Leave a Reply

Your email address will not be published. Required fields are marked *