सांस्कृतिक कार्यक्रमाचे बहारदार सादरीकरण
बालपणातील संघर्ष भविष्यातील यशाची पायरी -न्यायाधीश सुधाकर यार्लगड्डा
अहमदनगर (प्रतिनिधी)- बालपणातील संघर्ष भविष्यातील यशाची पायरी ठरते. प्रेमापोटी पालकांनी मुलांच्या बालपणातील संघर्ष हिरावू नका. त्यांना त्यांच्या जीवनातील अडी-अडचणी स्वत: सोडविण्याची सवय लावा. विद्यार्थ्यांनी देखील मोठे स्वप्न पाहून ते साकार करण्यासाठी जिद्द, मेहनत अंगीकारण्याचे आवाहन प्रधान जिल्हा व सत्र न्यायाधीश सुधाकर यार्लगड्डा यांनी केले.
अ.ए.सो.च्या भाऊसाहेब फिरोदिया हायस्कूलच्या वार्षिक स्नेहसंमेलन व पारितोषिक वितरण कार्यक्रमाच्या अध्यक्षीय भाषणात न्यायाधीश यार्लगड्डा बोलत होते. यावेळी प्रमुख पाहुणे म्हणून मालती यार्लगड्डा, संस्थेच्या प्रमुख कार्यवाह छायाताई फिरोदिया, संस्थेचे उपाध्यक्ष अशोक मुथा, सहकार्यवाह गौरव फिरोदिया, खजिनदार प्रकाश गांधी, विश्वस्त सुनंदा भालेराव, अॅड. गौरव मिरीकर, किशोरजी देशपांडे, सल्लागार मंडळाच्या सदस्या आशाताई फिरोदिया, पुष्पाताई फिरोदिया, मंगलाताई कुलकर्णी, भूषण भंडारी, अॅड. अभय राजे, सौ. राजे, मुख्याध्यापक उल्हास दुगड, उपमुख्याध्यापिका सुषमा चिटमील, पर्यवेक्षक रावसाहेब बाबर, रवींद्र शिंदे, आशा सातपुते, शिक्षक प्रतिनिधी विवेक आटपाडकर, विद्यार्थी प्रतिनिधी संस्कार गिरवले, अर्पिता निकम आदींसह शिक्षक, पालक व विद्यार्थी मोठ्या संख्येने उपस्थित होते.
प्रास्ताविकात छायाताई फिरोदिया म्हणाल्या की, कोरोनाच्या दोन वर्षानंतर मोठ्या उत्साहात शाळेत स्नेहसंमेलन साजरे होत आहेत. स्नेहसंमेलनातून आयुष्यभराची आठवणी रुजल्या जात असल्याचे सांगून त्यांनी आई, वडील, ज्येष्ठ नागरिक व गुरुजनांचा आदर आणि सन्मान करण्याचे सांगितले.
प्रारंभी बँड पथकाच्या गजरात पाहुण्यांचे स्वागत झाले. सरस्वती पूजन व दीपप्रज्वलनाने कार्यक्रमाची सुरुवात झाली. निशिका पितळे व चैतन्य गर्जे या विद्यार्थ्यांनी मुलाखतीद्वारे न्यायाधीश सुधाकर यार्लगड्डा व सौ. मालती यार्लगड्डा यांचा जीवनप्रवास उलगडला. सुधाकर यार्लगड्डा यांनी बालपण, शालेय शिक्षण, शेतकरी कुटुंबातून नागपूरला उच्च शिक्षण व नंतर वकिली करुन न्यायाधीश पदा पर्यंतचा प्रेरणादायी प्रवास सांगितला. तर शेती हा जीवनातील सर्वात आवडता छंद असल्याचे अधोरेखित केले. मालती यार्लगड्डा यांनी आपल्या दोन्ही मुलांना मराठी माध्यमातून शिक्षण देऊन ते आज चांगल्या पदावर कार्यरत असल्याचे स्पष्ट केले.
उपस्थित पाहुण्यांच्या हस्ते शैक्षणिक, कला व क्रीडा क्षेत्रातील गुणवंत विद्यार्थ्यांना पारितोषिके देण्यात आली. पुरस्काराची यादी वाचन अमेय कानडे यांनी केले. प्रारंभी एरोबिक्स, मानवी मनोरे, मल्लखांब चित्तथरारक प्रात्यक्षिकांनी उपस्थितांना मंत्रमुग्ध केले. बॅण्ड पथकाच्या निनादाने वातावरण उत्साहपूर्ण बनले होते. दिंडीतून वारकरी संप्रदायाचे दर्शन विद्यार्थ्यांनी घडविले.
आदिवासी, तांडव नृत्याने कार्यक्रमात उत्साह संचारला होता. विविध लोकनृत्यातून महाराष्ट्र संस्कृतीचे दर्शन घडवित विद्यार्थ्यांनी प्रेक्षकांची मने जिंकली. मोठ्या संख्येने उपस्थित पालक व प्रेक्षकांनी टाळ्यांच्या कडकडाटात विद्यार्थ्यांच्या कला-गुणांना दाद दिली.
कार्यक्रमाचे सूत्रसंचालन रिध्दी कुलकर्णी व निखिल सत्रे या विद्यार्थ्यांनी केले. आभार सुषमा चिटमील यांनी मानले. परशुराम मुळे यांनी सादर केलेल्या वंदे मातरम गीताने कार्यक्रमाची सांगता झाली. कार्यक्रम यशस्वी होण्यासाठी शालेय शिक्षक व शिक्षकेतर कर्मचार्यांनी परिश्रम घेतले.
