महापुरुषांच्या जयंती उत्सवामुळे प्रेरणा व दिशा मिळते -प्रा. माणिक विधाते
अहमदनगर (प्रतिनिधी)- शहर राष्ट्रवादी काँग्रेसच्या वतीने स्वातंत्र्य भारताचे पहिले पंतप्रधान पंडित जवाहरलाल नेहरु व क्रांतिवीर लहुजी वस्ताद साळवे यांची जयंती साजरी करण्यात आली. लालटाकी येथील पंडित नेहरु व सिध्दार्थनगर येथील क्रांतिवीर लहुजी वस्ताद साळवे यांच्या पुतळ्यास राष्ट्रवादीचे शहर जिल्हाध्यक्ष प्रा. माणिक विधाते यांच्या हस्ते पुष्पहार अर्पण करुन अभिवादन करण्यात आले.
यावेळी सामाजिक न्याय विभागाचे सुरेश बनसोडे, ओबीसी सेलचे अमित खामकर, अल्पसंख्यांक सेलचे साहेबान जहागीरदार, भिंगार राष्ट्रवादीचे शहराध्यक्ष संजय सपकाळ, गणेश बोरुडे, उद्योग व व्यापार सेलचे अनंत गारदे, संजय लोखंडे, अभिजीत सपकाळ, प्रदीप जाधव आदींसह पदाधिकारी व कार्यकर्ते उपस्थित होते.
प्रा. माणिक विधाते म्हणाले की, भारत भूमीच्या प्रत्येक नागरिकावर महापुरुषांचे ऋण कायम राहणार आहे. महापुरुषांच्या जयंती उत्सवामुळे त्यांच्या इतिहासातील घडामोडींना उजाळा मिळून प्रेरणा व दिशा मिळत असते. क्रांतिवीर लहुजी वस्ताद साळवे अतिशय शूरवीर लढवय्ये व्यक्तिमत्त्व होते. त्यांनी अनेक क्रांतीकारक घडविले. अन्यायाविरोधात बंड करण्यासाठी आजच्या युवा पिढीने त्यांचा आदर्श घ्यावा. तत्कालिन पंतप्रधान पंडित जवाहरलाल नेहरु यांच्या हस्ते स्वतंत्र महाराष्ट्र राज्याची मुहूर्तमेढ रोवली गेली. पंडितजींनी यशवंतराव चव्हाण यांच्या हाती महाराष्ट्राचा मंगलकलश दिला आणि नव्या महाराष्ट्राच्या नेतृत्वाची जबाबदारी सोपविली. तसा महाराष्ट्राचा ऐतिहासिक, सांस्कृतिक, सामाजिक वारसा मोठा असल्याचे त्यांनी सांगितले. शहरातील चौका-चौकात पंडित जवाहरलाल नेहरु व क्रांतिवीर लहुजी वस्ताद साळवे यांच्या जयंती दिनाच्या कार्यक्रमास उपस्थित राहून राष्ट्रवादीच्या पदाधिकार्‍यांनी अभिवादन केले.