संबंधितांवर कारवाई करण्याची डोंगरे यांचे पोलीस अधीक्षकांना निवेदन
अहमदनगर (प्रतिनिधी)- रस्त्यावर असलेले अतिक्रमण हटविण्याची नोटीस बजावल्याप्रकरणी अतिक्रमणधारकांनी निमगाव वाघाचे ग्रामपंचायत सदस्य तथा सामाजिक कार्यकर्ते पै. नाना डोंगरे यांना रस्त्यामध्ये अडवून हाणमार करुन जीवे मारण्याची धमकी दिल्याचा प्रकार घडला आहे. ग्रामपंचायत सदस्य यांनी रस्त्यावर अतिक्रमण करुन जीवे मारण्याची धमकी देणार्‍यांवर कारवाई करण्याच्या मागणीसाठी जिल्हा पोलीस अधीक्षकांना निवेदन दिले.
निमगाव वाघा (ता. नगर) गावात मारुती मंदिराजवळ भर रस्त्यावर एका कुटुंबीयाने अतिक्रमण करून किराणा दुकान टाकले आहे. त्यामुळे गावातील लोकांना व भाविकांना मंदिराला प्रदक्षिणा घालताना मोठा अडथळा निर्माण झाला आहे. याबाबत ग्रामपंचायतकडे अनेक लोकांनी तक्रारी दाखल केलेल्या आहेत. सदरील व्यक्तींना ग्रामपंचायतीने नोटीस बजावलेली आहे. हा राग मनात धरुन सदरील अतिक्रण धारकांनी त्यांच्या किराणा दुकानाजवळ अडवून मारहाण केली व जीवे मारण्याची धमकी दिली असल्याचे डोंगरे यांनी निवेदनात म्हंटले आहे.
सदरील व्यक्तींची गावात दहशत असून, अतिक्रमण हटविण्याच्या कायदेशीर कारवाईत ते अनेक प्रकारे अडथळे आणत आहे. या प्रकरणाची चौकशी करुन, रस्त्यात अडवून जीवे मारण्याची धमकी देणार्‍या अतिक्रमणधारकांवर कारवाई करावी व त्यांचे अतिक्रमण त्वरीत हटविण्यासाठी सहकार्य करण्याची मागणी ग्रामपंचायत सदस्य पै. नाना डोंगरे यांनी केली आहे.
